റിയാദ്: ഐസ്‌ക്രീം കടകളുടെ പ്രവര്‍ത്തനങ്ങള്‍ നിയന്ത്രിക്കുന്നതിനും ഭക്ഷ്യസുരക്ഷാ മാനദണ്ഡങ്ങള്‍ കര്‍ശനമാക്കുന്നതിനുമായി പുതിയ ചട്ടങ്ങള്‍ പുറത്തിറക്കി സൗദി മുനിസിപ്പാലിറ്റികളും ഭവന നിര്‍മ്മാണ മന്ത്രാലയവും. നിക്ഷേപകര്‍ക്ക് കൃത്യമായ മാനദണ്ഡങ്ങള്‍ നല്‍കാനും സേവന നിലവാരം ഉയര്‍ത്താനുമാണ് പുതിയ ഭേദഗതികളിലൂടെ ലക്ഷ്യമിടുന്നത്.
വസ്തുക്കള്‍ സ്വീകരിക്കുന്നത് മുതല്‍ സംഭരണം, തയ്യാറാക്കല്‍, വിളമ്പല്‍ എന്നിവ വരെയുള്ള എല്ലാ ഘട്ടങ്ങളിലും ഭക്ഷ്യസുരക്ഷ ഉറപ്പാക്കുന്നതാണ് പുതിയ നിയന്ത്രണങ്ങള്‍. താപനില നിയന്ത്രണം, അലര്‍ജി സംബന്ധമായ വിവരങ്ങള്‍ വെളിപ്പെടുത്തല്‍, ശുചിത്വം, അണുവിമുക്തമാക്കല്‍ നടപടികള്‍ എന്നിവയും ഇതില്‍ ഉള്‍പ്പെടുന്നു.
ഇതിനുപുറമെ, ജീവനക്കാര്‍ ഹെല്‍ത്ത് സര്‍ട്ടിഫിക്കറ്റ് നേടിയിരിക്കണമെന്നും വ്യക്തിഗത ശുചിത്വം പാലിക്കണമെന്നും സുരക്ഷാ വസ്ത്രങ്ങള്‍ ധരിക്കണമെന്നും ഭക്ഷ്യസുരക്ഷാ രീതികള്‍ കൃത്യമായി പിന്തുടരണമെന്നും മന്ത്രാലയം നിര്‍ദേശിക്കുന്നു. കൂടാതെ, സ്ഥാപനങ്ങളില്‍ ഇലക്ട്രോണിക് പെയ്‌മെന്റ് സംവിധാനങ്ങളും സ്റ്റാന്‍ഡേര്‍ഡൈസ്ഡ് ക്യു.ആര്‍ കോഡുകളും നിര്‍ബന്ധമാക്കിയിട്ടുണ്ട്.
സ്ഥാപനം ആരംഭിക്കുമ്പോഴും പ്രവര്‍ത്തിക്കുമ്പോഴും നിക്ഷേപകരുടെയും ബിസിനസ്സ് ഉടമകളുടെയും ഉത്തരവാദിത്തങ്ങള്‍ എന്തൊക്കെയാണെന്ന് പുതിയ ചട്ടങ്ങള്‍ വ്യക്തമാക്കുന്നുവെന്ന് മന്ത്രാലയം അറിയിച്ചു. ഉപഭോക്താക്കളുടെ സുരക്ഷയ്ക്കും സേവന നിലവാരത്തിനും മുന്‍ഗണന നല്‍കിക്കൊണ്ട് ബിസിനസ്സ് രംഗത്തിന്റെ വളര്‍ച്ചയെ പിന്തുണയ്ക്കുന്നതാണ് ഈ നടപടി.
.jpg)
Related News
