റിയാദ്- 2027 ലെ പൊതുബജറ്റിന് മുന്നോടിയായി രാജ്യത്തിന്റെ ധനസ്ഥിതിയും പ്രാഥമിക ബജറ്റ് സൂചനകളും പ്രഖ്യാപിച്ച് സൗദി അറേബ്യ. പുതിയ കണക്കുകള്‍ പ്രകാരം മൊത്തം ചെലവ് ഏകദേശം 1.392 ബില്യന്‍ റിയാലും മൊത്തം വരുമാനം ഏകദേശം 1.202 ബില്യന്‍ റിയാലും ആയിരിക്കുമെന്ന് പ്രതീക്ഷിക്കുന്നു. ഇതിലൂടെ പ്രതീക്ഷിക്കുന്ന 190 ശതകോടി റിയാലിന്റെ ബജറ്റ് കമ്മി മൊത്ത ആഭ്യന്തര ഉല്‍പ്പാദനത്തിന്റെ ഏകദേശം 3.6% ആയിരിക്കുമെന്ന് ധനകാര്യ മന്ത്രാലയം പുറത്തിറക്കിയ പ്രസ്താവനയില്‍ പറയുന്നു.

സൗദി വിഷന്‍ 2030 ആരംഭിച്ചതിനുശേഷം രാജ്യം കൈവരിച്ച സാമ്പത്തിക പരിഷ്‌കാരങ്ങളുടെ നേട്ടങ്ങള്‍ തുടരുകയാണെന്ന് ബജറ്റ് പ്രസ്താവന വ്യക്തമാക്കുന്നു. സാമ്പത്തിക അടിത്തറ വൈവിധ്യവല്‍ക്കരിക്കാനും ബിസിനസ് അന്തരീക്ഷം മെച്ചപ്പെടുത്താനും സ്വകാര്യ മേഖലയുടെ പങ്ക് ശക്തിപ്പെടുത്താനും പരിഷ്‌കാരങ്ങള്‍ സഹായിച്ചിട്ടുണ്ട്. എണ്ണയിതര മേഖലകളുടെ മികച്ച പ്രകടനത്തിലും പ്രതിസന്ധികളെ പ്രതിരോധിക്കാനുള്ള സൗദി സമ്പദ്വ്യവസ്ഥയുടെ ശേഷിയിലും ഇത് പ്രതിഫലിച്ചു. തുടര്‍ച്ചയായ സാമ്പത്തിക വൈവിധ്യവല്‍ക്കരണ സംരംഭങ്ങള്‍ മൂലം 2015-ല്‍ ഏകദേശം 1.66 ബില്യന്‍ റിയാലായിരുന്ന എണ്ണയിതര വരുമാനം 2025-ല്‍ 5.05 ബില്യന്‍ റിയാലായി ഉയര്‍ന്നു. വരുമാനം 2029-ഓടെ 1.351 ബില്യന്‍ റിയാലായും ചെലവ് 1.544 ബില്യന്‍ റിയാലായും ഉയരുമെന്നാണ് പ്രതീക്ഷ.

2026-ലെ ആഗോള സാമ്പത്തിക, ഭൂരാഷ്ട്രീയ പുരോഗതികള്‍ രാജ്യത്തിന്റെ വളര്‍ച്ചാനിരക്കിനെ സ്വാധീനിച്ചിട്ടുണ്ട്. എണ്ണ മേഖലയിലെ പ്രവചിക്കപ്പെട്ട 21.8% ഇടിവ് മൂലം യഥാര്‍ത്ഥ ജിഡിപിയില്‍ 3.6% കുറവുണ്ടാകാന്‍ സാധ്യതയുണ്ടെങ്കിലും, എണ്ണയിതര മേഖലയിലെ 3.2% സാമ്പത്തിക വളര്‍ച്ച ഈ ഇടിവിന്റെ ആഘാതം പരിമിതപ്പെടുത്താന്‍ സഹായിക്കും. 2026-ന്റെ ആദ്യ പകുതിയില്‍ എണ്ണയിതര പ്രവര്‍ത്തനങ്ങള്‍ 1.8% വളര്‍ച്ച കൈവരിക്കുകയും ജിഡിപിയിലേക്കുള്ള അവയുടെ സംഭാവന റെക്കോര്‍ഡ് തലമായ 57.3% ആയി ഉയരുകയും ചെയ്തു. കൂടാതെ, രാജ്യത്തെ പണപ്പെരുപ്പ നിരക്ക് 2.1% ആയിരിക്കുമെന്നും സ്വദേശികളുടെ തൊഴിലില്ലായ്മ നിരക്ക് 2026 രണ്ടാം പാദത്തില്‍ 6.5% ആയി കുറഞ്ഞുവെന്നും പ്രസ്താവനയില്‍ പറയുന്നു.

സൗദി അറേബ്യ പ്രാദേശിക, അന്തര്‍ദേശീയ തലങ്ങളില്‍ ധനസമാഹരണ പ്രവര്‍ത്തനങ്ങള്‍ തുടര്‍ന്നും മുന്നോട്ട് കൊണ്ടുപോകാന്‍ പദ്ധതിയിടുന്നതായി പ്രസ്താവന വ്യക്തമാക്കി. ഇടക്കാല കടമെടുപ്പ് തന്ത്രത്തിന്റെ ഭാഗമായി ബോണ്ടുകള്‍, സുകൂക്കുകള്‍, ന്യായമായ ചെലവിലുള്ള വായ്പകള്‍ എന്നിവ വഴിയും പദ്ധതി ധനസഹായം, ഇന്‍ഫ്രാസ്ട്രക്ചര്‍ ഫിനാന്‍സിങ്, എക്‌സ്‌പോര്‍ട്ട് ക്രെഡിറ്റ് ഏജന്‍സികള്‍ എന്നിവ വിപുലീകരിച്ചും സര്‍ക്കാര്‍ ധനസമാഹരണം നടത്തും. ദീര്‍ഘകാല സാമ്പത്തിക ആസൂത്രണത്തിലധിഷ്ഠിതമായ ഈ ധനനയം സൗദി വിഷന്‍ 2030 ലക്ഷ്യങ്ങള്‍ കൈവരിക്കുന്നതിനും വികസന പദ്ധതികള്‍ തടസ്സമില്ലാതെ തുടരുന്നതിനും സഹായിക്കും.

ആഗോള സാമ്പത്തിക അനിശ്ചിതത്വങ്ങള്‍ നിലനില്‍ക്കുന്ന സാഹചര്യത്തിലാണ് 2027-ലെ പ്രാഥമിക ബജറ്റ് എസ്റ്റിമേറ്റുകള്‍ പുറത്തുവന്നിട്ടുള്ളതെന്ന് ധനകാര്യ മന്ത്രി മുഹമ്മദ് അല്‍-ജദാന്‍ സ്ഥിരീകരിച്ചു. ദീര്‍ഘകാല വീക്ഷണത്തോടെ പൊതു ധനകാര്യം കൈകാര്യം ചെയ്യുന്നത് മാറ്റങ്ങളെ നേരിടാനും വികസന മുന്‍ഗണനകള്‍ക്ക് തടസ്സമില്ലാതെ ചെലവഴിക്കാനും രാജ്യത്തെ പ്രാപ്തമാക്കുന്നുവെന്ന് അദ്ദേഹം പറഞ്ഞു. തുടര്‍ച്ചയായ ഒന്‍പതാം വര്‍ഷമാണ് സൗദി അറേബ്യ പ്രാഥമിക ബജറ്റ് പ്രസ്താവന പുറപ്പെടുവിക്കുന്നത്. പൊതു ധനകാര്യ പ്രകടനത്തില്‍ കൂടുതല്‍ സുതാര്യത കൊണ്ടുവരുന്നതിനും സാമ്പത്തിക വിവരങ്ങള്‍ പൗരന്മാരെയും നിക്ഷേപകരെയും സുതാര്യമായി അറിയിക്കുന്നതിനുമായാണ് ഈ കണക്കുകള്‍ പുറത്തുവിടുന്നത്.