നഗോയ: ഏഷ്യന്‍ ഗെയിംസിന്റെ പുരുഷ ക്രിക്കറ്റ് സെമി ഫൈനലില്‍ ശ്രീലങ്കയെ 45 റണ്‍സിന് എറിഞ്ഞിട്ട ഇന്ത്യ ഫൈനലില്‍ പാക്കിസ്ഥാനുമായി ഏറ്റുമുട്ടും. ബാറ്റിംഗ് പ്രയാസകരമായ പിച്ചില്‍ ഇഷാന്‍ കിഷന്‍ 46 പന്തില്‍ പുറത്താവാതെ നേടിയ 80 റണ്‍സിന്റെ സഹായത്തോടെ ഏഴിന് 169 റണ്‍സടിച്ച ഇന്ത്യ എതിരാളികളെ 9.5 ഓവറില്‍ 45 റണ്‍സിന് ചവിട്ടിക്കൂട്ടി. ജസ്പ്രീത് ബുംറ രണ്ടോവറില്‍ ഏഴ് റണ്‍സിന് രണ്ട് വിക്കറ്റെടുത്തു. ഒപ്പം ബൗളിംഗ് ഓപണ്‍ ചെയ്ത സ്പിന്നര്‍ അക്ഷര്‍ പട്ടേലിന് മൂന്നോവറില്‍ എട്ട് റണ്‍സിന് രണ്ട് വിക്കറ്റ് കിട്ടി. അവസാനം ബൗള്‍ ചെയ്യാനെത്തിയ അഭിഷേഖ് ശര്‍മ അഞ്ച് പന്തില്‍ രണ്ട് വിക്കറ്റെടുത്ത് ഇന്നിംഗ്‌സ് അവസാനിച്ചു. തുടര്‍ച്ചയായ മൂന്ന് പന്തില്‍ അവസാന മൂന്നു വിക്കറ്റുകള്‍ നിലംപതിച്ചു.
ഇന്ത്യന്‍ ഇന്നിംഗ്‌സില്‍ മൂന്നു പേര്‍ മാത്രമാണ് രണ്ടക്കത്തിലെത്തിയത്. ഇശാനെ കൂടാതെ ഓപണര്‍ വൈഭവ് സൂര്യവംശിയും (21 പന്തില്‍ 38) ക്യാപ്റ്റന്‍ ശ്രേയസ് അയ്യരും (13). സഞ്ജു സാംസണിന് ഏഴ് റണ്‍സെടുക്കാനേ സാധിച്ചുള്ളൂ. ശ്രീലങ്കന്‍ ഇന്നിംഗ്‌സില്‍ അഞ്ച് റണ്‍സ് പിന്നിട്ടത് രണ്ടു പേര്‍ മാത്രം. ക്യാപ്റ്റന്‍ സഹാന്‍ അരാചിഗെയും (9) നവനീദു ഫെര്‍ണാണ്ടോയും (15).
മഴ കാരണം ക്വാര്‍ട്ടര്‍ ഫൈനല്‍ കളിക്കാതെയാണ് ഇന്ത്യയും ശ്രീലങ്കയും സെമിയിലെത്തിയത്. ഉയര്‍ന്ന സീഡിംഗിന്റെ ബലത്തില്‍.
മഴ തടസ്സപ്പെടുത്തി.യ രണ്ടാം സെമിയില്‍ പാക്കിസ്ഥാന്‍ ആറ് വിക്കറ്റിന് ബംഗ്ലാദേശിനെ തോല്‍പിച്ചു. 13 ഓവറില്‍ ഏഴിന് 111 റണ്‍സെടുത്ത ബംഗ്ലാദേശിനെ ഒമ്പത് പന്തും ആറ് വിക്കറ്റും ശേഷിക്കെ പാക്കിസ്ഥന്‍ മറികടന്നു. നാലിന് 53ലേക്ക് തകര്‍ന്ന പാക്കിസ്ഥാനെ അഭേദ്യമായ അഞ്ചാം വിക്കറ്റില്‍ ഹസന്‍ നവാസും (27 നോട്ടൗട്ട്) അബ്ദുല്‍സമദും (15 പന്തില്‍ 30 നോട്ടൗട്ട്) വിജയത്തിലേക്ക് നയിക്കുകയായിരുന്നു.