ന്യൂദല്‍ഹി: 2026ലെ നിയമസഭാ തെരഞ്ഞെടുപ്പുകളില്‍ കേരളം ഉള്‍പ്പെടെ അഞ്ച് സംസ്ഥാനങ്ങളിലായി ബി.ജെ.പി കേന്ദ്ര പാര്‍ട്ടി ഓഫീസ് ചെലവഴിച്ചത് 529.38 കോടി. ഇതില്‍ 82.67 കോടി കേരളത്തിലാണ് ചെലവഴിച്ചതെന്ന് തിരഞ്ഞെടുപ്പ് കമ്മിഷന് സമര്‍പ്പിച്ച പാര്‍ട്ടിയുടെ ചെലവുകണക്കുകള്‍ വ്യക്തമാക്കുന്നു. ഏറ്റവും കൂടുതല്‍ ചെലവിട്ടത് പശ്ചിമ ബംഗാളിലാണ്, 286 കോടി. ഇത് ഔദ്യോഗിക ചെലവുകളുടെ മാത്രം കണക്കാണ്. അഞ്ച് സംസ്ഥാനങ്ങളിലെ തെരഞ്ഞെടുപ്പ് കാലയളവില്‍ ബി.ജെ.പിയുടെ കേന്ദ്ര ആസ്ഥാനത്തേക്ക് ലഭിച്ച വരവുകളും ശ്രദ്ധേയമാണ്. ഈ കാലയളവില്‍ 1,472.8 കോടി രൂപയുടെ വരവാണ് പാര്‍ട്ടി റിപ്പോര്‍ട്ട് ചെയ്തത്. മറ്റു പാര്‍ട്ടികള്‍ക്ക് ലഭിച്ചതിന്റെ ഏറെ ഇരട്ടിയാണ് ഇത്. ഈ കാലയളവില്‍ ബി.ജെ.പിയുടെ വരുമാനം 1000 കോടിയോളം വര്‍ധിച്ചു.
അസം, തമിഴ്‌നാട്, കേരളം, പശ്ചിമ ബംഗാള്‍, പുതുച്ചേരി എന്നിവിടങ്ങളിലായി യഥാക്രമം 96.26 കോടി, 51.56 കോടി, 82.67 കോടി, 286 കോടി, 11.89 കോടി എന്നിങ്ങനെയാണ് ബി.ജെ.പി റിപ്പോര്‍ട്ട് ചെയ്ത ചെലവ്. അഞ്ച് സംസ്ഥാനങ്ങളിലെയും മൊത്തം ചെലവിന്റെ 15.6 ശതമാനത്തോളം കേരളത്തിലാണ്. ഒരു നിയമസഭാ മണ്ഡലത്തിന് ശരാശരി 84 ലക്ഷം രൂപ. കേരളത്തില്‍ 2026ല്‍ ബി.ജെ.പി 98 മണ്ഡലങ്ങളിലാണ് മത്സരിച്ചത്.
പശ്ചിമ ബംഗാളില്‍ 286 കോടി രൂപയാണ് ബി.ജെ.പി ചെലവഴിച്ചത്. അസമില്‍ 96.26 കോടി, കേരളത്തില്‍ 82.67 കോടി, തമിഴ്‌നാട്ടില്‍ 51.56 കോടി, പുതുച്ചേരിയില്‍ 11.89 കോടി എന്നിങ്ങനെയാണ് മറ്റ് സംസ്ഥാനങ്ങളിലെ കണക്കുകള്‍. അഞ്ചു സംസ്ഥാനങ്ങളിലെയും മൊത്തം ചെലവിന്റെ ഏകദേശം 15.6 ശതമാനം കേരളത്തിലാണ്.
ബംഗാളിലെ ചെലവില്‍ 217.16 കോടി രൂപ പാര്‍ട്ടി പ്രചാരണത്തിനും മറ്റ് പൊതുപ്രചാരണ പ്രവര്‍ത്തനങ്ങള്‍ക്കുമായി ചെലവഴിച്ചതായും 69.83 കോടി രൂപ സ്ഥാനാര്‍ഥികളുമായി ബന്ധപ്പെട്ട ചെലവായും രേഖപ്പെടുത്തിയിട്ടുണ്ട്. ഇതില്‍ 58.80 കോടി രൂപ സ്ഥാനാര്‍ഥികള്‍ക്ക് നല്‍കിയതാണെന്നും കണക്കുകള്‍ വ്യക്തമാക്കുന്നു.
അസം, തമിഴ്‌നാട്, കേരളം, പശ്ചിമ ബംഗാള്‍, പുതുച്ചേരി എന്നീ സംസ്ഥാനങ്ങളിലെ നിയമസഭാ തെരഞ്ഞെടുപ്പുകള്‍ മാര്‍ച്ച്, മേയ് കാലയളവിലാണ് നടന്നത്. തിരഞ്ഞെടുപ്പ് ചെലവുകളുടെ കണക്ക് രാഷ്ട്രീയ പാര്‍ട്ടികള്‍ തിരഞ്ഞെടുപ്പ് കമ്മിഷന് സമര്‍പ്പിക്കേണ്ടതാണ്. സ്ഥാനാര്‍ഥികളുടെ ചെലവിന് നിയമപരമായ പരിധിയുണ്ടെങ്കിലും രാഷ്ട്രീയ പാര്‍ട്ടികളുടെ മൊത്തം തെരഞ്ഞെടുപ്പ് ചെലവിന് സമാനമായ പരിധിയില്ലെന്ന് തിരഞ്ഞെടുപ്പ് കമ്മിഷന്‍ വ്യക്തമാക്കുന്നു.
ഈ കണക്കുകള്‍ ബി.ജെ.പി കേന്ദ്ര പാര്‍ട്ടി ഓഫീസ് സമര്‍പ്പിച്ച തെരഞ്ഞെടുപ്പ് ചെലവ് സംബന്ധിച്ചതാണ്. അതിനാല്‍ സംസ്ഥാന ഘടകങ്ങളോ സ്ഥാനാര്‍ഥികള്‍ സ്വന്തം നിലയില്‍ നടത്തിയതായി സമര്‍പ്പിച്ചിട്ടുള്ള ചെലവുകളോ ഇതിന് പുറമെയാണ്. കേരളത്തിലെ സ്ഥാനാര്‍ഥികളുടെ വ്യക്തിഗത ചെലവുകണക്കുകള്‍ പ്രത്യേകമായി തിരഞ്ഞെടുപ്പ് കമ്മിഷന്‍ പ്രസിദ്ധീകരിക്കുന്നുണ്ട്.