ജിദ്ദ: 'ബി ഇന്‍, ബി മോര്‍' എന്ന പ്രമേയത്തില്‍ രിസാല സ്റ്റഡി സര്‍ക്കിള്‍ (ആര്‍.എസ്.സി) നടത്തിവരുന്ന അംഗത്വ ക്യാമ്പയിന്റെ ഭാഗമായി ഗ്ലോബല്‍ ചെയര്‍മാന്‍ ഫൈസല്‍ ബുഖാരി നടത്തിയ സൗദി വെസ്റ്റ് നാഷണല്‍ യാത്ര 'ഇംപള്‍സോ' സമാപിച്ചു.
വിദ്യാര്‍ത്ഥികളുടെയും യുവാക്കളുടെയും സര്‍വതോമുഖമായ വികസനം ലക്ഷ്യമിട്ടുള്ള ആര്‍.എസ്.സിയുടെ പ്രവര്‍ത്തനങ്ങള്‍ കൂടുതല്‍ പേരിലേക്ക് വ്യാപിപ്പിക്കുകയെന്നതാണ് യാത്രയുടെ പ്രധാന ലക്ഷ്യം. സംഘടനയുടെ ആഗോള വ്യാപനത്തോടൊപ്പം ജി.സി.സി രാജ്യങ്ങളില്‍ സംഘടനാ സംവിധാനം കൂടുതല്‍ ശക്തമാക്കാനും ഈ യാത്ര വഴിയൊരുക്കി.
മക്കയില്‍ നിന്ന് ആരംഭിച്ച് മദീനയില്‍ സമാപിച്ച യാത്രയില്‍ റാബഗ്, ജിസാന്‍, അസീര്‍, അല്‍ബഹ, തായിഫ്, യാമ്പു, ജിദ്ദ സിറ്റി, ജിദ്ദ നോര്‍ത്ത്, തബൂക് ഉള്‍പ്പെടെയുള്ള 11 സോണുകള്‍ സന്ദര്‍ശിച്ചു. യാത്ര കടന്നുപോയ ഓരോ കേന്ദ്രങ്ങളിലും ആര്‍.എസ്.സി സോണ്‍ കമ്മിറ്റികളുടെയും ഐ.സി.എഫ് കമ്മിറ്റികളുടെയും നേതൃത്വത്തില്‍ ഊഷ്മളമായ സ്വീകരണമാണ് നല്‍കിയത്.
ശനിയാഴ്ച ആരംഭിച്ച് ഒരാഴ്ച നീണ്ടുനിന്ന യാത്ര ഞായറാഴ്ചയോടെ സമാപിച്ചു. വിശാലമായ സൗദിയുടെ വ്യത്യസ്ത ഭൂപ്രദേശങ്ങളിലൂടെയുള്ള ഈ യാത്ര പ്രവര്‍ത്തകര്‍ക്ക് വലിയ തോതിലുള്ള സംഘടനാ ഉണര്‍വും പുതിയ അനുഭവവുമാണ് സമ്മാനിച്ചത്.
.jpg)
