നാഗോയ: ഐച്ചി-നഗോയ ഏഷ്യന്‍ ഗെയിംസില്‍ ഇന്ത്യക്ക് ആദ്യ സ്വര്‍ണം. വനിതാ ക്രിക്കറ്റില്‍ ശ്രീലങ്കയെ 147 റണ്‍സിന് തകര്‍ത്ത് ഇന്ത്യ ആദ്യ സ്വര്‍ണം സ്വന്തമാക്കി. പുരുഷ ബാഡ്മിന്റണ്‍ ടീം ജപ്പാനെ 3-0ന് തോല്‍പ്പിച്ച് സെമിഫൈനലിലെത്തി മെഡല്‍ ഉറപ്പാക്കിയപ്പോള്‍ വനിതാ ടീം ജപ്പാനോട് ക്വാര്‍ട്ടര്‍ ഫൈനലില്‍ പരാജയപ്പെട്ടു. പുരുഷ കബഡിയില്‍ ദക്ഷിണ കൊറിയയെ 63-31ന് തോല്‍പ്പിച്ച് ഇന്ത്യ ഗ്രൂപ്പ് എയില്‍ തുടര്‍ച്ചയായ രണ്ടാം ജയം നേടി.
വനിതാ ക്രിക്കറ്റില്‍ ശ്രീലങ്കയ്‌ക്കെതിരായ ഫൈനലില്‍ ആദ്യം ബാറ്റ് ചെയ്ത ഇന്ത്യ 20 ഓവറില്‍ 3 വിക്കറ്റ് നഷ്ടത്തില്‍ 216 റണ്‍സ് നേടി. സ്മൃതി മന്ദാന 79 റണ്‍സും ഷഫാലി വര്‍മ 48 റണ്‍സും റിച്ച ഘോഷ് പുറത്താകാതെ 49 റണ്‍സും നേടി. ശ്രീലങ്ക 15.4 ഓവറില്‍ 69 റണ്‍സിന് ഓള്‍ഔട്ടായി. ദീപ്തി ശര്‍മ മൂന്ന് വിക്കറ്റ് വീഴ്ത്തി. ഷഫാലി വര്‍മ, ശ്രേയങ്ക പാട്ടീല്‍, ശ്രീചരണി എന്നിവര്‍ രണ്ട് വീതം വിക്കറ്റ് നേടി. ഇതോടെ ഇന്ത്യ തുടര്‍ച്ചയായ രണ്ടാം ഏഷ്യന്‍ ഗെയിംസ് വനിതാ ക്രിക്കറ്റ് സ്വര്‍ണം സ്വന്തമാക്കി.
പുരുഷ ബാഡ്മിന്റണില്‍ ലക്ഷ്യ സെന്‍ ഉള്‍പ്പെടെയുള്ള ഇന്ത്യന്‍ പുരുഷ ടീം ആതിഥേയരായ ജപ്പാനെ 3-0ന് തോല്‍പ്പിച്ച് സെമിഫൈനലില്‍ കടന്നു. നിര്‍ണായക സിംഗിള്‍സില്‍ ലക്ഷ്യ സെന്‍ പിന്നില്‍ നിന്നെത്തി വിജയം സ്വന്തമാക്കിയതിന് പിന്നാലെ സാത്വിക്‌സായിരാജ് രങ്കിറെഡ്ഡി-ചിരാഗ് ഷെട്ടി സഖ്യവും ആയുഷ് ഷെട്ടിയും വിജയിച്ചതോടെയാണ് ഇന്ത്യയുടെ സെമി പ്രവേശം ഉറപ്പായത്. സെമിഫൈനലില്‍ ഇന്ത്യ ചൈനയെയോ ദക്ഷിണ കൊറിയയെയോ നേരിടും.
പി.വി. സിന്ധു ഉള്‍പ്പെട്ട ഇന്ത്യന്‍ വനിതാ ടീം ജപ്പാനോട് ക്വാര്‍ട്ടര്‍ ഫൈനലില്‍ 1-3ന് തോറ്റു.
കബഡിയില്‍ നിലവിലെ ചാമ്പ്യന്മാരായ ഇന്ത്യ ദക്ഷിണ കൊറിയയെ 63-31ന് തോല്‍പ്പിച്ചു. ഗ്രൂപ്പ് എയിലെ തുടര്‍ച്ചയായ രണ്ടാം ജയത്തോടെ ഇന്ത്യ മുന്നിലെത്തി.
ഷൂട്ടിങ് 10 മീറ്റര്‍ എയര്‍ റൈഫിള്‍ മിക്‌സഡ് ടീം ഇനത്തില്‍ എലവെനില്‍ വാളറിവനും പാര്‍ഥ് റാകേഷ് മാനെയും നാലാം സ്ഥാനത്താണ് ഫിനിഷ് ചെയ്തത്. യോഗ്യതാ റൗണ്ടില്‍ രണ്ടാം സ്ഥാനത്തെത്തിയ ഇന്ത്യന്‍ സഖ്യത്തിന് ഫൈനലില്‍ ആ ഫോം നിലനിര്‍ത്താനായില്ല. പുരുഷന്മാരുടെ സ്‌കീറ്റ് വ്യക്തിഗത ഇനത്തില്‍ അനന്ത്ജീത് സിങ് നറൂകയും വനിതാ സ്‌കീറ്റില്‍ റൈസ ധില്ലനും മെഡല്‍ പ്രതീക്ഷ നിലനിര്‍ത്തി മുന്നേറുകയാണ്.
വനിതാ ക്രിക്കറ്റിലെ സ്വര്‍ണം കൂടി ചേര്‍ന്നതോടെ ഇന്ത്യയുടെ ആകെ മെഡല്‍ നേട്ടം 7 ആയി. ഇന്ത്യ എട്ടാം സ്ഥാനത്താണ്. ചൈന 29 സ്വര്‍ണം ഉള്‍പ്പെടെ 48 മെഡലുകളുമായി ഒന്നാം സ്ഥാനത്ത്; ജപ്പാന്‍ 9 സ്വര്‍ണവും 38 മെഡലുമായി രണ്ടാം സ്ഥാനത്ത്. കസാഖിസ്ഥാന്‍ മൂന്നാമതും ദക്ഷിണ കൊറിയ നാലാമതുമാണ്.
ഇന്ത്യയുടെ ഏഴ് മെഡലുകളില്‍ അഞ്ചും ഷൂട്ടിങ്ങില്‍ നിന്നാണ്. ഒരു സ്വര്‍ണം വനിതാ ക്രിക്കറ്റിലും രണ്ട് വെങ്കലങ്ങളില്‍ ഒന്ന് ഷൂട്ടിങ്ങിലും മറ്റൊന്ന് എംഎംഎയിലുമാണ്.