ജിദ്ദ: ജിദ്ദ കെഎംസിസി മലപ്പുറം ജില്ലാ കമ്മിറ്റിയുടെ ബൗദ്ധിക വിഭാഗമായ 'ഫിറ്റ് ജിദ്ദ' തങ്ങളുടെ പത്താം വാര്‍ഷികത്തോടനുബന്ധിച്ച് പുറത്തിറക്കുന്ന ദശവാര്‍ഷിക സുവനീര്‍ 'പാനീസ്'-ന്റെ കവര്‍ ചിത്രം പ്രകാശനം ചെയ്തു. കഴിഞ്ഞ പത്തു വര്‍ഷത്തോളമായി ഫിറ്റ് ജിദ്ദ ഈ മേഖലയില്‍ സജീവമായി പ്രവര്‍ത്തിച്ചുവരുന്നുണ്ട്.
പ്രമുഖ കവി അരുവി മോങ്ങമാണ് കവര്‍ ചിത്രത്തിന്റെ പ്രകാശനം നിര്‍വഹിച്ചത്. ജിദ്ദയ്ക്ക് അകത്തും പുറത്തുനിന്നുമുള്ള പ്രമുഖ രാഷ്ട്രീയ-സാംസ്‌കാരിക നേതാക്കളുടെ ലേഖനങ്ങള്‍, സംഘടനയുടെ ചരിത്രപരമായ അടയാളപ്പെടുത്തലുകള്‍, സമകാലിക പ്രസക്തമായ ആനുകാലിക ചര്‍ച്ചകള്‍, മികച്ച സാഹിത്യ രചനകള്‍ എന്നിവ ഉള്‍പ്പെടുത്തി തികച്ചും വൈവിധ്യമാര്‍ന്ന ഒരു പുസ്തകമായിട്ടാണ് 'പാനീസ്' വായനക്കാരിലേക്ക് എത്തുന്നത്.
സുവനീറിന്റെ അണിയറ പ്രവര്‍ത്തനങ്ങള്‍ക്കായി ചീഫ് എഡിറ്ററായി ഇസ്ഹാഖ് പൂണ്ടോളിയെയും, എഡിറ്ററായി നൗഫല്‍ ഉള്ളാടനെയും, ഫിനാന്‍സ് ഡയറക്ടറായി അബു കട്ടുപ്പാറയെയും തിരഞ്ഞെടുത്തു.
കൗണ്‍സില്‍ യോഗം ഇല്യാസ് കല്ലിങ്ങല്‍ ഉദ്ഘാടനം ചെയ്തു. ചടങ്ങില്‍ ജാഫര്‍ വെന്നിയൂര്‍, നാസര്‍ മമ്പുറം, എം.പി. ബഷീറലി, ഫൈറൂസ് കെ.കെ, മുസ്തഫ മാസ്റ്റര്‍, ജംഷീര്‍ കെ.വി, ജാഫര്‍ അത്താണിക്കല്‍, അലി പാങ്ങാട്ട് തുടങ്ങിയ പ്രമുഖര്‍ സംബന്ധിച്ചു.
.jpg)
