ന്യൂയോര്‍ക്ക്: അരനൂറ്റാണ്ടിലേറെ നീണ്ട ചരിത്രത്തിന് വിരാമമിട്ട് ലോകപ്രശസ്ത നിക്ഷേപകനായ വാറന്‍ ബഫറ്റ് തന്റെ വിഖ്യാതമായ ബെര്‍ക്ഷയര്‍ ഹാത്തവേ കമ്പനിയുടെ ചെയര്‍മാന്‍ സ്ഥാനത്തുനിന്ന് പിന്മാറി. 96കാരനായ ബഫറ്റിനെ ഉടന്‍ പ്രാബല്യത്തില്‍ ചെയര്‍മാന്‍ എമിറിറ്റസ് ആയി നിയമിച്ചതായി കമ്പനി അറിയിച്ചു. ബഫറ്റ് ഡയറക്ടര്‍ ബോര്‍ഡില്‍ തുടരും.
ബഫറ്റിന്റെ മകന്‍ ഹോവാര്‍ഡ് ബഫറ്റ് ആണ് പുതിയ ചെയര്‍മാന്‍. 1993 മുതല്‍ ബെര്‍ക്ഷയറിന്റെ ഡയറക്ടര്‍ ബോര്‍ഡ് അംഗമായ ഹോവാര്‍ഡിനാണ് ഇനി കമ്പനിയുടെ പാരമ്പര്യവും മൂല്യങ്ങളും സംരക്ഷിക്കാനുള്ള ചുമതല. 'കാലം എല്ലാവരെയും കീഴടക്കും. എന്നോട് പക്ഷേ അത് ഉദാരമായിരുന്നു' എന്നായിരുന്നു സ്ഥാനമാറ്റത്തെക്കുറിച്ച് ഓഹരിയുടമകള്‍ക്ക് അയച്ച കത്തില്‍ ബഫറ്റിന്റെ പ്രതികരണം.
1970 മുതല്‍ ബെര്‍ക്ഷയര്‍ ഹാത്തവേയുടെ ചെയര്‍മാനായിരുന്ന ബഫറ്റ് കഴിഞ്ഞ വര്‍ഷം കമ്പനിയുടെ ചീഫ് എക്‌സിക്യൂട്ടീവ് ഓഫീസര്‍ സ്ഥാനവും ഒഴിഞ്ഞിരുന്നു. അദ്ദേഹത്തിന് പകരം ഗ്രെഗ് ഏബല്‍ ചുമതലയേറ്റു. ചെയര്‍മാന്‍ എമിറിറ്റസ് എന്ന നിലയില്‍ ബഫറ്റ് ഡയറക്ടര്‍ ബോര്‍ഡില്‍ തുടരുന്നതിനൊപ്പം തന്റെ അനുഭവവും വിലയിരുത്തലുകളും കമ്പനിക്ക് നല്‍കുമെന്നും ബെര്‍ക്ഷയര്‍ വ്യക്തമാക്കി.
ഒരുകാലത്ത് പ്രതിസന്ധിയിലായിരുന്ന ടെക്‌സ്‌റ്റൈല്‍ ബിസിനസായ ബെര്‍ക്ഷയര്‍ ഹാത്തവേ ബഫറ്റിന്റെ നേതൃത്വത്തിലാണ് ലോകത്തെ ഏറ്റവും വലിയ നിക്ഷേപബിസിനസ് കൂട്ടായ്മകളിലൊന്നായി മാറിയത്. ഏകദേശം 1.03 ട്രില്യണ്‍ ഡോളര്‍ മൂല്യമുള്ള കമ്പനിയുടെ കീഴില്‍ ഇന്‍ഷുറന്‍സ്, റെയില്‍വേ, ഊര്‍ജം, പാലുല്‍പന്നം തുടങ്ങിയ നിരവധി ബിസിനസുകളുണ്ട്.
ഉയര്‍ന്ന നിലവാരമുള്ള കമ്പനികളെ ന്യായമായ വിലയ്ക്ക് വാങ്ങുകയും ദീര്‍ഘകാലം കൈവശം വയ്ക്കുകയും ചെയ്യുന്ന നിക്ഷേപ സമീപനമാണ് ബഫറ്റിനെ പ്രശസ്തനാക്കിയത്. ദീര്‍ഘകാല ചിന്ത, മൂലധനത്തിന്റെ അച്ചടക്കമുള്ള വിനിയോഗം, ലളിതമായ മാനേജ്‌മെന്റ് സമീപനം എന്നിവയിലൂടെ നിരവധി നിക്ഷേപകരെയും കോര്‍പ്പറേറ്റ് നേതാക്കളെയും അദ്ദേഹം സ്വാധീനിച്ചു.
ബഫറ്റിന്റെ സ്ഥാനമാറ്റത്തോടെ ബെര്‍ക്ഷയര്‍ ഹാത്തവേയുടെ ഒരു യുഗത്തിനാണ് ഔപചാരികമായി അന്ത്യമാകുന്നത്. എന്നാല്‍ ഡയറക്ടര്‍ എന്ന നിലയില്‍ അദ്ദേഹത്തിന്റെ പരിചയവും നിക്ഷേപവീക്ഷണവും കമ്പനിയില്‍ തുടരും.
.jpg)
Related News
