മണലാരണ്യങ്ങളുടെ കാഠിന്യത്തിന് നടുവിലും പ്രകൃതിയുടെ മാസ്മരിക സൗന്ദര്യം ഒളിപ്പിച്ചുവെച്ചിരിക്കുന്ന മക്കയുടെ മണ്ണില്‍, പച്ചപ്പിന്റെ പുതിയൊരു അധ്യായം രചിക്കപ്പെടുകയാണ്. വെറുമൊരു കാഴ്ചയെന്നതിലുപരി, പാരിസ്ഥിതിക സന്തുലിതാവസ്ഥയുടെയും സുസ്ഥിര വികസനത്തിന്റെയും പ്രതീകങ്ങളായി മാറുകയാണ് മക്ക മേഖലയിലെ ദേശീയ ഉദ്യാനങ്ങള്‍. പ്രകൃതിഭംഗിയും സമ്പന്നമായ സസ്യവൈവിധ്യവും ഒരുപോലെ ഒത്തിണങ്ങിയ ഈ പ്രദേശങ്ങള്‍, ഇന്ന് ഇക്കോ ടൂറിസത്തിന്റെ സുപ്രധാന കേന്ദ്രങ്ങളായി വളര്‍ന്നുകൊണ്ടിരിക്കുകയാണ്.

സസ്യസമ്പത്ത് വളര്‍ത്തുന്നതിനും മരുഭൂകരണത്തെ പ്രതിരോധിക്കുന്നതിനുമുള്ള ദേശീയ കേന്ദ്രത്തിന്റെ ദീര്‍ഘവീക്ഷണത്തോടെയുള്ള മേല്‍നോട്ടത്തിലാണ് ഈ ഹരിതതുരുത്തുകള്‍ സംരക്ഷിക്കപ്പെടുന്നത്. കേവലം മരങ്ങള്‍ നടുന്നതില്‍ ഒതുങ്ങുന്നില്ല ഇവരുടെ പ്രവര്‍ത്തനം; പ്രകൃതിവിഭവങ്ങളുടെ സംരക്ഷണം, നശിച്ചുകഴിഞ്ഞ പ്രദേശങ്ങളുടെ പുനരുദ്ധാരണം, ആധുനിക അടിസ്ഥാന സൗകര്യങ്ങള്‍ ഒരുക്കല്‍ എന്നിവയ്ക്കൊപ്പം സ്വകാര്യമേഖലയുടെയും പ്രാദേശിക ജനങ്ങളുടെയും കൂട്ടായ്മയും ഇവിടെ വിജയകരമായി നടപ്പിലാക്കുന്നു.

വ്യത്യസ്തമായ പാരിസ്ഥിതിക സവിശേഷതകളാണ് ഈ മേഖലയിലെ ഓരോ ഉദ്യാനത്തെയും മനോഹരമാക്കുന്നത്. തായിഫിന്റെ മടിത്തട്ടില്‍ സ്ഥിതി ചെയ്യുന്ന സയ്‌സാദ് ദേശീയ ഉദ്യാനം ഇതിനകം തന്നെ വിപുലമായ മാറ്റങ്ങള്‍ക്ക് വിധേയമായിക്കഴിഞ്ഞു. ജൈവവൈവിധ്യം പുനഃസ്ഥാപിക്കുന്നതിന്റെ ഭാഗമായി അവിടെ പുതിയ വനവല്‍ക്കരണ പദ്ധതികളും വന്യജീവികളെ സ്വാഭാവിക ആവാസവ്യവസ്ഥയിലേക്ക് തുറന്നുവിടുന്ന പ്രവര്‍ത്തനങ്ങളും നടന്നു വരുന്നു.

മറുവശത്ത്, ഖുലൈസ് ഗവര്‍ണറേറ്റിലെ ജബല്‍ അല്‍-ഖമര്‍ ദേശീയ ഉദ്യാനം വിസ്മയിപ്പിക്കുന്നത് അതിന്റെ വിശാലത കൊണ്ടാണ്. 1.8 കോടി ചതുരശ്ര മീറ്ററിലധികം പരന്നുകിടക്കുന്ന ഈ മലനിരകള്‍, അപൂര്‍വ്വമായ പാറക്കെട്ടുകളുടെയും വൈവിധ്യമാര്‍ന്ന സസ്യസമ്പത്തിന്റെയും സംഗമവേദിയാണ്. പ്രകൃതിസ്‌നേഹികളെയും സാഹസിക സഞ്ചാരികളെയും ഒരുപോലെ ആകര്‍ഷിക്കുന്നതാണ് ഇവിടത്തെ കാഴ്ചകള്‍.

ശാസ്ത്രീയ ഗവേഷണങ്ങള്‍ക്ക് പ്രാധാന്യം നല്‍കുന്ന വാദി ഖുദൈദ് പാര്‍ക്ക് മറ്റൊരു പ്രത്യേകതയാണ്. സസ്യങ്ങളെയും മണ്ണിലെ ഘടനയെയും ജലസ്രോതസ്സുകളെയും കുറിച്ച് ആഴത്തിലുള്ള പഠനങ്ങള്‍ നടക്കുന്ന ഒരു ഗവേഷണ കേന്ദ്രം ഇവിടെ പ്രവര്‍ത്തിക്കുന്നുണ്ട്. പരിസ്ഥിതി പുനരുദ്ധാരണത്തെ ശാസ്ത്രീയ മുന്നേറ്റങ്ങളുമായി ഒരേ പാതയില്‍ ഒന്നിപ്പിക്കുകയാണ് ഈ പദ്ധതി. അതേസമയം, ജുമൂം ഇക്കോ പാര്‍ക്കിലും അല്‍-ഖുന്‍ഫുധ ഗവര്‍ണറേറ്റിലെ ഹാലി വൈല്‍ഡ് ലൈഫ് പാര്‍ക്കിലും പച്ചപ്പിന്റെ ആരവങ്ങള്‍ നിറഞ്ഞുതുടങ്ങിയിട്ടുണ്ട്. ഓരോ പാര്‍ക്കിലും ഏകദേശം 90,000-ത്തോളം മരങ്ങളാണ് ഇതിനകം വെച്ചുപിടിപ്പിച്ചിട്ടുള്ളത്.

ഈ ഹരിതമേഖലകള്‍ കേവലം കാഴ്ചകളില്‍ ഒതുങ്ങുന്നില്ല. ഇക്കോ ടൂറിസത്തിലും വിനോദമേഖലയിലും വലിയ തോതിലുള്ള നിക്ഷേപങ്ങള്‍ ആകര്‍ഷിക്കാനും അതുവഴി പ്രാദേശികമായി പുതിയ സാമ്പത്തിക അവസരങ്ങള്‍ സൃഷ്ടിക്കാനും ഈ പാര്‍ക്കുകള്‍ക്ക് കഴിയുന്നുണ്ട്. 'സൗദി ഗ്രീന്‍ ഇനിഷ്യേറ്റീവ്', 'സൗദി വിഷന്‍ 2030' എന്നീ ദീര്‍ഘവീക്ഷണമുള്ള പദ്ധതികളുടെ സുപ്രധാന ലക്ഷ്യങ്ങളിലേക്ക് രാജ്യത്തെ നയിക്കുന്നതില്‍ ഈ ദേശീയ ഉദ്യാനങ്ങള്‍ വഹിക്കുന്ന പങ്ക് നിസ്തുലമാണ്. പ്രകൃതിയെയും വികസനത്തെയും ഒരുപോലെ കൈപിടിച്ചുയര്‍ത്തുന്ന മക്കയുടെ ഈ ഹരിത മാതൃക ലോകത്തിന് തന്നെ ഒരു പുതിയ സന്ദേശമാണ് നല്‍കുന്നത്.