ജിദ്ദ: മൂന്നര പതിറ്റാണ്ടുകാലത്തെ പ്രവാസം അവസാനിപ്പിച്ച് ജന്മനാട്ടിലേക്ക് മടങ്ങുന്ന ഖാലിദ് ബിന്‍ വലീദ് ഏരിയ കെ.എം.സി.സി ഉപദേശക സമിതി അംഗം സലീം കൂട്ടിലങ്ങാട്രിക്ക് (സലീം സദാഫ്‌കൊ) ഏരിയ കമ്മിറ്റിയുടെ നേതൃത്വത്തില്‍ ഊഷ്മളമായ യാത്രയയപ്പ് നല്‍കി. യാത്രയയപ്പ് സമ്മേളനത്തോടൊപ്പം കെ.എം.സി.സി പ്രസ്ഥാനത്തില്‍ പുതുതായി അണിചേരാന്‍ സജ്ജരായ ഏരിയയിലെ നവാഗതരെ സ്വീകരിക്കുന്നതിനുള്ള നവാഗത സംഗമവും നടന്നു.

സജാ പാര്‍ക്കില്‍ നടന്ന പരിപാടി ജിദ്ദ കെ.എം.സി.സി സെക്രട്ടറി സിറാജ് കണ്ണവം ഉദ്ഘാടനം ചെയ്തു. പ്രവാസ ലോകത്ത് സാന്ത്വനത്തിന്റെയും ചേര്‍ത്തുപിടിക്കലിന്റെയും പ്രതീകമാണ് കെ.എം.സി.സി എന്ന് നവാഗതരെ സ്വാഗതം ചെയ്തുകൊണ്ട് അദ്ദേഹം പറഞ്ഞു.

ഏരിയ കമ്മിറ്റി പ്രസിഡന്റ് റഷീദ് ഒതുക്കുങ്ങല്‍ അധ്യക്ഷത വഹിച്ചു. കെ.എം.സി.സിയുടെ കുടുംബ സുരക്ഷാ പദ്ധതി, പ്രവാസി പെന്‍ഷന്‍ പദ്ധതി, നോര്‍ക്ക ഇന്‍ഷുറന്‍സ്, നോര്‍ക്ക ഐ.ഡി എന്നിവയില്‍ അംഗമാകേണ്ടതിന്റെ പ്രാധാന്യം അദ്ദേഹം വിശദീകരിച്ചു. കെ.പി. അബ്ദുറഹ്‌മാന്‍ പുളിക്കല്‍, പി.കെ. സുഹൈല്‍, സുബൈര്‍ വാണിമേല്‍, സൈതലവി മോങ്ങം, മുജീബ് മണ്ണാര്‍ക്കാട്, സഫീര്‍ ബാവ, മുഹ്‌സിന്‍ നാദാപുരം, കെ.പി. റഷീദ്, മുഹ്യുദ്ദീന്‍ താപ്പി, സലാം കൊന്നക്കാട്, റസാഖ് പേരാമ്പ്ര, റഷീദ് ഇരിട്ടി, അന്‍വര്‍ സാദിഖ്, മന്‍സൂര്‍ ഷാനിബ്, നിയാഫ്, ഷംനാദ്, ഷാനിഫ്, സുല്‍ത്താന്‍, തന്‍വീര്‍ തുടങ്ങിയവര്‍ യാത്രാമംഗളം നേര്‍ന്നു സംസാരിച്ചു.

ഏരിയ കെ.എം.സി.സിയുടെ ഉപഹാരം പ്രസിഡന്റ് റഷീദ് ഒതുക്കുങ്ങല്‍ അബ്ദുല്‍ സലീമിനു സമ്മാനിച്ചു. പ്രവാസ ലോകത്ത് കെ.എം.സി.സി ചെയ്യുന്ന സേവനപ്രവര്‍ത്തനങ്ങള്‍ തുല്യതയില്ലാത്തതാണെന്നും കെ.എം.സി.സി വഴി നേടാന്‍ കഴിഞ്ഞ നന്മകളും പ്രതിപാദിച്ച് സലീം മറുപടി പ്രസംഗം നടത്തി. പരിപാടിയില്‍ നൗഷാദ് ചപ്പാരപ്പടവ് സ്വാഗതവും മുജീബ് മൂപ്പിലാഴി നന്ദിയും പറഞ്ഞു.