റിയാദ്: യെമനിലെ ഹൂതി വിമതര്‍ തൊടുത്തുവിട്ട പ്രൊജക്ടൈല്‍ സൗദി അറേബ്യയുടെ തെക്കന്‍ പ്രദേശമായ ജിസാനില്‍ പതിച്ച് രണ്ട് പേര്‍ക്ക് പരിക്കേറ്റു. ഒരു പള്ളിക്കും നിരവധി കെട്ടിടങ്ങള്‍ക്കും വാഹനങ്ങള്‍ക്കും ആക്രമണത്തില്‍ കേടുപാടുകള്‍ സംഭവിച്ചതായി സൗദി സിവില്‍ ഡിഫന്‍സ് അറിയിച്ചു. അല്‍-തുവാല്‍ ഗവര്‍ണറേറ്റിലാണ് പ്രൊജക്ടൈല്‍ പതിച്ചത്. സംഭവത്തെ തുടര്‍ന്ന് സിവില്‍ ഡിഫന്‍സ് സംഘം ഉടന്‍ തന്നെ സ്ഥലത്തെത്തി രക്ഷാപ്രവര്‍ത്തനം ഏറ്റെടുത്തു.
ജനവാസ കേന്ദ്രങ്ങളെയും സാധാരണക്കാരെയും ലക്ഷ്യമിട്ടുള്ള ഇത്തരം ആക്രമണങ്ങള്‍ 'അന്താരാഷ്ട്ര മാനുഷിക നിയമങ്ങളുടെ നഗ്‌നമായ ലംഘനമാണെന്ന്' സിവില്‍ ഡിഫന്‍സ് വക്താവ് വ്യക്തമാക്കി. സംഭവവുമായി ബന്ധപ്പെട്ട് അടിയന്തര പ്രതിരോധ നടപടികള്‍ സ്വീകരിച്ചിട്ടുണ്ടെന്നും അധികൃതര്‍ അറിയിച്ചു.
കഴിഞ്ഞ ദിവസങ്ങളില്‍ തെക്കന്‍ സൗദി അറേബ്യ ലക്ഷ്യമിട്ട് ഹൂതികള്‍ തുടര്‍ച്ചയായി നടത്തിയ മിസൈല്‍-ഡ്രോണ്‍ ആക്രമണങ്ങളുടെ പശ്ചാത്തലത്തില്‍ രാജ്യത്ത് സുരക്ഷാ ഭീഷണി നിലനില്‍ക്കെയാണ് പുതിയ ആക്രമണം ഉണ്ടായിരിക്കുന്നത്.
കഴിഞ്ഞ ചൊവ്വാഴ്ച അബ്ഹ, ഖമീസ് മുഷൈത്, ജിസാന്‍, നജ്‌റാന്‍ എന്നിവിടങ്ങളിലെ വ്യവസായ- ജനവാസ കേന്ദ്രങ്ങള്‍ ലക്ഷ്യമിട്ട് നടത്തിയ ആക്രമണങ്ങളില്‍ സ്ത്രീകളും കുട്ടികളും അടക്കം 73 പേര്‍ക്ക് പരിക്കേറ്റിരുന്നു.
.jpg)
