തിരുവനന്തപുരം: മൂന്നു പതിറ്റാണ്ടിലേറെ നീണ്ട ഇടവേളയ്ക്കുശേഷം മമ്മൂട്ടിയും അടൂര്‍ ഗോപാലകൃഷ്ണനും 'പദയാത്ര'യില്‍ വീണ്ടും ഒന്നിക്കുന്നു. 'പദയാത്ര രാഷ്ട്രീയ സിനിമയല്ലെന്നും പക്ഷേ സാമൂഹിക വിഷയങ്ങള്‍ വരുമ്പോള്‍ രാഷ്ട്രീയമാനം സ്വാഭാവികമാണെന്നും അടൂര്‍ വ്യക്തമാക്കി.
'പദയാത്ര'യുടെ ഏകദേശം 70 സെക്കന്‍ഡ് ദൈര്‍ഘ്യമുള്ള ട്രെയിലറില്‍ സങ്കീര്‍ണമായ സാമൂഹികസാംസ്‌കാരിക പശ്ചാത്തലത്തിലൂടെ കടന്നുപോകുന്ന ഡോക്ടറായാണ് മമ്മൂട്ടിയെ അവതരിപ്പിക്കുന്നത്. മാവോയിസ്റ്റ് ആക്രമണം, രാജ്യദ്രോഹവുമായി ബന്ധപ്പെട്ട നിയമനടപടി, വ്യാജ ഡോക്ടറെക്കുറിച്ചുള്ള മുന്നറിയിപ്പ് തുടങ്ങിയ സൂചനകളും ട്രെയിലറിലുണ്ട്. അലന്‍സിയര്‍ അവതരിപ്പിക്കുന്ന പൊലീസ് ഉദ്യോഗസ്ഥന്റെ അന്വേഷണവും ട്രെയിലറില്‍ കാണാം.
സാമൂഹിക വിഷയങ്ങളെ അഭിസംബോധന ചെയ്യുമ്പോള്‍ അതിന് രാഷ്ട്രീയമാനം സ്വാഭാവികമായി ഉണ്ടാകുമെന്ന് അടൂര്‍ പറഞ്ഞു. അതിനാല്‍ പാര്‍ട്ടിരാഷ്ട്രീയത്തെ കേന്ദ്രീകരിച്ചുള്ള സിനിമയല്ലെങ്കിലും സമകാലിക സാമൂഹിക യാഥാര്‍ഥ്യങ്ങളിലേക്ക് ചിത്രം കടന്നുചെല്ലുമെന്ന സൂചനയാണ് സംവിധായകന്റെ വാക്കുകള്‍ നല്‍കുന്നത്.
മമ്മൂട്ടി അവതരിപ്പിക്കുന്നത് ഡോ. ദേവദാസ് എന്ന കഥാപാത്രത്തെയാണ്. നഗരത്തിലെ വിജയകരമായ വൈദ്യശുശ്രൂഷ ഉപേക്ഷിച്ച് ആദിവാസി മേഖലയില്‍ സേവനത്തിനായി എത്തുന്ന ഡോക്ടറാണ് അദ്ദേഹം. ഗാന്ധിയന്‍ ആശയങ്ങളില്‍ വിശ്വസിക്കുന്ന ദേവദാസ് പിന്നാക്കവിഭാഗങ്ങളുടെ ജീവിതവുമായി അടുത്തിടപഴകുന്നതിനിടെ അവര്‍ നേരിടുന്ന ചൂഷണവും വ്യവസ്ഥാപരമായ അനീതികളും തിരിച്ചറിയുന്നു. ഇതോടെ ഭൂവുടമകള്‍, പൊലീസിലെ ചില വിഭാഗങ്ങള്‍, രാഷ്ട്രീയ സ്വാധീനമുള്ള വ്യക്തികള്‍ എന്നിവരുമായി അദ്ദേഹം ഏറ്റുമുട്ടുന്ന സാഹചര്യത്തിലേക്ക് കഥ നീങ്ങുന്നു. ആദിവാസി ജീവിതവും അവരുടെ ചൂഷണവും പ്രതിരോധവുമാണ് സിനിമ കൈകാര്യം ചെയ്യുന്നത്. മമ്മൂട്ടിയുടെ കഥാപാത്രത്തിന്റെ സഹായിയായി വേഷമിടുന്നത് ഇന്ദ്രന്‍സാണ്. ഗ്രേസ് ആന്റണി, ജനാര്‍ദനന്‍, ജഗദീഷ്, സുധീര്‍ കരമന, സീനത്ത്, നന്ദു, അലിയാര്‍, സന്തോഷ് കീഴാറ്റൂര്‍, ശ്രീഷ്മ ചന്ദ്രന്‍, പി. ശ്രീകുമാര്‍ തുടങ്ങിയവരും ചിത്രത്തിലുണ്ട്.
1994ല്‍ പുറത്തിറങ്ങിയ 'വിധേയനാണ് മമ്മൂട്ടിയും അടൂരും ഒന്നിച്ച അവസാന ചിത്രം്. അനന്തരം, മതിലുകള്‍, വിധേയന്‍ എന്നിവയ്ക്കുശേഷമുള്ള ഇരുവരുടെയും നാലാമത്തെ സിനിമയാണ് 'പദയാത്ര'. 'വിധേയനി'ലെ ഭാസ്‌കര പട്ടേലര്‍ എന്ന കഥാപാത്രത്തിനും 'പൊന്തന്‍ മാട'യിലെ പ്രകടനത്തിനും മമ്മൂട്ടിക്ക് മികച്ച നടനുള്ള ദേശീയ പുരസ്‌കാരം ലഭിച്ചിരുന്നു.
അടൂര്‍ ഗോപാലകൃഷ്ണനും മുന്‍ ഐ.എ.എസ് ഉദ്യോഗസ്ഥനും എഴുത്തുകാരനുമായ കെ.വി. മോഹന്‍കുമാറും ചേര്‍ന്നാണ് തിരക്കഥ ഒരുക്കിയത്. മമ്മൂട്ടി കമ്പനിയാണ് നിര്‍മ്മാണം. എറണാകുളത്തെ ഫാക്ട് സമുച്ചയവും പരിസരപ്രദേശങ്ങളും പ്രധാന ലൊക്കേഷനുകളായ ചിത്രത്തിന്റെ ചില ഭാഗങ്ങള്‍ പൂയംകുട്ടിയിലെ ആദിവാസി മേഖലകളിലും ചിത്രീകരിച്ചിട്ടുണ്ട്. ആദിവാസി ഗ്രാമവും വനാശുപത്രിയും ഉള്‍പ്പെടെയുള്ള വലിയ സെറ്റുകളും ഒരുക്കിയിട്ടുണ്ട്.
ഷഹനാദ് ജലാല്‍ ഛായാഗ്രഹണം, പ്രവീണ്‍ പ്രഭാകര്‍ എഡിറ്റിങ്, മുജീബ് മജീദ് സംഗീതം, ഷാജി നടുവില്‍ കലാസംവിധാനം എന്നിവ നിര്‍വഹിക്കുന്നു. ചിത്രത്തിന്റെ ഔദ്യോഗിക റിലീസ് തീയതി ഇതുവരെ പ്രഖ്യാപിച്ചിട്ടില്ല.
.jpg)
