ടുണിസ്: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിനെ പരിഹസിക്കാന്‍ ബോളിവുഡ് നടന്‍ അക്ഷയ് കുമാറിന്റെ പ്രശസ്ത മീം ഉപയോഗിച്ച് തുനീഷ്യയിലെ ഇറാന്‍ എംബസി. ഹോര്‍മുസ് കടലിടുക്കിന് സമീപം ആളില്ലാ അമേരിക്കന്‍ ഡ്രോണ്‍ പിടിച്ചെടുത്തതായ അവകാശവാദം സ്ഥാപിക്കാനാണ് ഇറാന്‍ എംബസി ബോളിവുഡ് മീം ഉപയോഗിച്ചത്. ടുണിസിലെ ഇറാന്‍ എംബസിയുടെ ഔദ്യോഗിക എക്‌സ് അക്കൗണ്ടിലാണ് ബോളിവുഡ് ട്രോള്‍ പ്രത്യക്ഷപ്പെട്ടത്.
സെപ്റ്റംബര്‍ എട്ടിന് ഹോര്‍മുസ് കടലിടുക്കിന്റെ പ്രവേശന മേഖലയിലാണ് ഇറാന്റെ ഇസ്ലാമിക് റെവല്യൂഷനറി ഗാര്‍ഡ് അമേരിക്കയുടെ ആളില്ലാ അണ്ടര്‍വാട്ടര്‍ സബ്മറൈന്‍ പിടിച്ചെടുത്തതെന്ന് അവകാശപ്പെട്ടത്. പുലര്‍ച്ചെ നടന്ന സങ്കീര്‍ണമായ രഹസ്യാന്വേഷണസൈനിക നീക്കത്തിലൂടെയാണ് വാഹനം പിടിച്ചെടുത്തതെന്ന് ഐആര്‍ജിസി വ്യക്തമാക്കി. പിടിച്ചെടുത്തതായി പറയുന്ന വാഹനത്തിന്റെ ചിത്രങ്ങളും വീഡിയോയും ഇറാന്‍ പുറത്തുവിടുകയും ചെയ്തു.
എന്നാല്‍ ഇറാന്റെ അവകാശവാദത്തിന് വ്യത്യസ്തമായ വിശദീകരണമാണ് അമേരിക്ക നല്‍കിയത്. പിടിച്ചെടുത്തത് പുതിയ സൈനിക ഉപകരണമല്ലെന്നും പ്രവര്‍ത്തനത്തിനിടെ തകരാറിലായ പഴയ മോഡലിലുള്ള ആളില്ലാ അണ്ടര്‍വാട്ടര്‍ വാഹനമാണെന്നുമാണ് അമേരിക്കയുടെ നിലപാട്. ഇതോടെ സംഭവത്തെച്ചൊല്ലി ഇരുരാജ്യങ്ങളും തമ്മിലുള്ള വാദപ്രതിവാദം ശക്തമായി.
ഇതിനിടെയാണ് ടുണിസിലെ ഇറാന്‍ എംബസി ഔപചാരിക നയതന്ത്ര പ്രസ്താവനയ്ക്ക് പകരം സോഷ്യല്‍ മീഡിയയിലെ ജനപ്രിയ മീം ഉപയോഗിച്ചത്. 2011ല്‍ പുറത്തിറങ്ങിയ അക്ഷയ് കുമാര്‍ അഭിനയിച്ച 'ഹേയ് ബേബി' എന്ന ചിത്രത്തിലെ രംഗമാണ് മീമായി ഉപയോഗിച്ചത്. അതിനൊപ്പം എണ്ണവിലയും അമേരിക്കയിലെ വരാനിരിക്കുന്ന തെരഞ്ഞെടുപ്പുകളും പരാമര്‍ശിച്ചുകൊണ്ടുള്ള പരിഹാസ സന്ദേശവും എംബസി പങ്കുവച്ചു.
പോസ്റ്റ് ഉടന്‍ തന്നെ ഇന്ത്യന്‍ സോഷ്യല്‍ മീഡിയ ഉപയോക്താക്കളുടെ ശ്രദ്ധയും നേടി. അക്ഷയ് കുമാറിന്റെ മീം തെരഞ്ഞെടുത്തതാണ് പ്രധാനമായും ചര്‍ച്ചയായത്.
.jpg)
Related News
