സന്‍ആ: യെമനിലെ ആഭ്യന്തര സംഘര്‍ഷം വീണ്ടും രൂക്ഷമാകുന്നതിനിടെ, തന്ത്രപ്രധാനമായ ചെങ്കടല്‍ തുറമുഖനഗരമായ അല്‍മുഖ ഹൂതി വിമതര്‍ പിടിച്ചെടുത്തതായി സൈനിക വൃത്തങ്ങളെയും പ്രദേശവാസികളെയും ഉദ്ധരിച്ച് റിപ്പോര്‍ട്ട്. സൗദി പിന്തുണയുള്ള സര്‍ക്കാര്‍ അനുകൂല സേനയുമായി രൂക്ഷമായ ഏറ്റുമുട്ടലുകള്‍ക്കൊടുവിലാണ് ഹൂതികള്‍ നഗരത്തിന്റെ നിയന്ത്രണം ഏറ്റെടുത്തതെന്നാണ് വിവരം.
അല്‍മുഖ പിടിച്ചെടുത്തതോടെ ബാബ് അല്‍മന്ദബ് കടലിടുക്കില്‍ നിന്ന് ഏകദേശം 75 കിലോമീറ്റര്‍ മാത്രം അകലെയാണ് ഹൂതി നിയന്ത്രണം എത്തുന്നത്. ഏഷ്യയെയും യൂറോപ്പിനെയും ബന്ധിപ്പിക്കുന്ന പ്രധാന കടല്‍വ്യാപാര പാതയിലെ നിര്‍ണായക കവാടമാണ് ബാബ് അല്‍മന്ദബ്. അതിനാല്‍ മോഖയുടെ നിയന്ത്രണം യെമന്‍ സംഘര്‍ഷത്തിന് പുറമെ ആഗോള കപ്പല്‍ഗതാഗതത്തിനും ഊര്‍ജവിപണിക്കും വലിയ തന്ത്രപ്രധാന പ്രത്യാഘാതങ്ങള്‍ സൃഷ്ടിക്കുമെന്നാണ് വിലയിരുത്തല്‍.
അല്‍മുഖയില്‍ ബുധനാഴ്ച രാത്രി ശക്തമായ ഏറ്റുമുട്ടലുണ്ടായതായും തുടര്‍ന്ന് നിരവധി കുടുംബങ്ങള്‍ വീടുവിട്ട് സുരക്ഷിത പ്രദേശങ്ങളിലേക്ക് പലായനം ചെയ്തതായും പ്രദേശവാസികള്‍ പറഞ്ഞു. സര്‍ക്കാര്‍ അനുകൂല നാഷണല്‍ റെസിസ്റ്റന്‍സ് ഫോഴ്‌സ് നേതാവ് താരിഖ് സാലിഹ് തന്റെ കമാന്‍ഡ് സെന്റര്‍ സുരക്ഷിത കേന്ദ്രത്തിലേക്ക് മാറ്റിയതായി അറിയിച്ചു. ഇറാന്റെ പിന്തുണയോടെ ആസൂത്രണം ചെയ്ത ഹൂതി ആക്രമണത്തെ നേരിടുന്നതിനിടെ തങ്ങളുടെ സേനയ്ക്ക് കനത്ത നഷ്ടമുണ്ടായെന്നും അദ്ദേഹം പറഞ്ഞു.
അല്‍മുഖയ്ക്ക് വടക്കുപടിഞ്ഞാറായി ചെങ്കടലിലുള്ള സുകര്‍ ദ്വീപും ഹൂതികള്‍ പിടിച്ചെടുത്തതായി ഒരു യെമന്‍ സൈനിക ഉദ്യോഗസ്ഥനെ ഉദ്ധരിച്ച് എ.എഫ്.പി റിപ്പോര്‍ട്ട് ചെയ്തു. റോക്കറ്റ് ആക്രമണത്തിനുശേഷം ബോട്ടുകളിലൂടെയുള്ള കരനീക്കത്തിലൂടെയാണ് ദ്വീപ് പിടിച്ചെടുത്തതെന്നാണ് വിവരം.
അന്താരാഷ്ട്ര കപ്പല്‍ഗതാഗതത്തിന് തങ്ങള്‍ ഭീഷണിയല്ലെന്ന് ഹൂതികള്‍ ആവര്‍ത്തിച്ചു. എന്നാല്‍ സൗദി അറേബ്യയുമായി ബന്ധമുള്ള കപ്പലുകള്‍ക്കെതിരായ വിലക്ക് തുടരുമെന്നും അവര്‍ വ്യക്തമാക്കി. ഹോര്‍മുസ് കടലിടുക്ക് വഴിയുള്ള എണ്ണഗതാഗതം തടസ്സപ്പെട്ട സാഹചര്യത്തില്‍ സൗദിയുടെ എണ്ണ കയറ്റുമതിക്ക് ചെങ്കടല്‍ പാതയ്ക്ക് കൂടുതല്‍ പ്രാധാന്യം ലഭിച്ചിരിക്കെയാണ് പുതിയ ഭീഷണി.
ഹൂതി ആക്രമണങ്ങള്‍ക്ക് മറുപടിയായി സൗദി നേതൃത്വത്തിലുള്ള സഖ്യസേന പടിഞ്ഞാറന്‍ യെമനിലെ ഹൂതി നിയന്ത്രിത മേഖലകളില്‍ വ്യോമാക്രമണം ശക്തമാക്കി. തഅസ്, ഹുദൈദ, മാരിബ്, ജൗഫ് പ്രവിശ്യകളില്‍ കഴിഞ്ഞ 24 മണിക്കൂറിനിടെ 64 വ്യോമാക്രമണങ്ങള്‍ നടന്നതായി ഹൂതി സൈനിക വക്താവ് യഹ്യ സരീഅ പറഞ്ഞു.
തെക്കന്‍ സൗദിയിലെ ഖമീസ് മുഷൈത്, അബ്ഹ, ജിസാന്‍ നഗരങ്ങള്‍ക്കെതിരെ ഹൂതികള്‍ നടത്തിയ മിസൈല്‍ഡ്രോണ്‍ ആക്രമണങ്ങള്‍ക്ക് തിരിച്ചടി നല്‍കുമെന്ന് സൗദി നേതൃത്വത്തിലുള്ള സഖ്യസേന നേരത്തെ മുന്നറിയിപ്പ് നല്‍കിയിരുന്നു.
പുതിയ പോരാട്ടം ഇതിനകം നൂറുകണക്കിന് പേരുടെ മരണത്തിനും ആയിരക്കണക്കിന് ആളുകളുടെ കുടിയൊഴിപ്പിക്കലിനും കാരണമായതായാണ് റിപ്പോര്‍ട്ടുകള്‍. സംഘര്‍ഷം രൂക്ഷമായാല്‍ ചെങ്കടല്‍ കപ്പല്‍ഗതാഗതത്തെയും എണ്ണവിലയെയും ആഗോള വിതരണശൃംഖലയെയും ബാധിക്കാനുള്ള സാധ്യതയാണ് ഏറ്റവും വലിയ ആശങ്ക.
.jpg)
Related News
