ദുബായ്: മേഖലയിലെ സുരക്ഷാ ആശങ്കകളെത്തുടര്‍ന്ന് അബുദാബി സായിദ് അന്താരാഷ്ട്ര വിമാനത്താവളത്തിലും ദുബായ് അന്താരാഷ്ട്ര വിമാനത്താവളത്തിലും വിമാന സര്‍വീസുകള്‍ വൈകുന്നത് തുടരുന്നു. എന്നിരുന്നാലും, എമിറേറ്റ്‌സ്, ഇത്തിഹാദ്, എയര്‍ അറേബ്യ, ഫ്‌ലൈ ദുബായ് എന്നീ വിമാനക്കമ്പനികള്‍ പ്രധാന പ്രാദേശിക റൂട്ടുകളില്‍ സര്‍വീസുകള്‍ തുടരുന്നുണ്ട്.

ബഹ്‌റൈന്‍, കുവൈത്ത് എന്നിവിടങ്ങളിലേക്കുള്ള ചില സര്‍വീസുകള്‍ നിലവില്‍ കൃത്യസമയത്ത് ഓപ്പറേറ്റ് ചെയ്യുന്നുണ്ടെങ്കിലും, അവസാന നിമിഷം വിമാനങ്ങള്‍ റദ്ദാക്കപ്പെടാനോ വൈകാനോ സാധ്യതയുണ്ടെന്ന് അധികൃതര്‍ മുന്നറിയിപ്പ് നല്‍കി. പ്രാദേശിക സുരക്ഷാ സാഹചര്യം കണക്കിലെടുത്ത് ഫ്രഞ്ച് വിമാനക്കമ്പനിയായ 'എയര്‍ ഫ്രാന്‍സ്' ദുബായിലേക്കും തിരിച്ചുമുള്ള സര്‍വീസുകളുടെ വിലക്ക് സെപ്റ്റംബര്‍ 15 വരെ നീട്ടി.

അമേരിക്ക-ഇറാന്‍ സംഘര്‍ഷം രൂക്ഷമാകുന്നു; അസംസ്‌കൃത എണ്ണവില കുതിച്ചുയര്‍ന്നു

ഇറാന്റെ തീരദേശ മേഖലകളിലും സൗദി അറേബ്യയിലെ സൈനിക താവളത്തിന് സമീപവും ശക്തമായ സ്‌ഫോടനങ്ങള്‍ നടന്നതായി റിപ്പോര്‍ട്ടുകളുണ്ട്. അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്, ഇറാനുമായുള്ള യുദ്ധം അമേരിക്കന്‍ മിഡ്ടേം തിരഞ്ഞെടുപ്പിന് ശേഷവും തുടര്‍ന്നേക്കാമെന്ന് വ്യക്തമാക്കിയിട്ടുണ്ട്.

തീരദേശ മേഖലയായ ഹോര്‍മുസ്ഗാന്‍ പ്രവിശ്യയിലെ ഖെഷ്ം ദ്വീപ്, സിരിക്, മിനാബ് എന്നിവിടങ്ങളിലാണ് സ്‌ഫോടനങ്ങള്‍ ഉണ്ടായതെന്ന് ഇറാനിയന്‍ സ്റ്റേറ്റ് മീഡിയ റിപ്പോര്‍ട്ട് ചെയ്തു. കൂടാതെ സൗദിയിലെ തായിഫിലുള്ള കിംഗ് ഫഹദ് എയര്‍ ബേസിന് സമീപവും സ്‌ഫോടനങ്ങള്‍ നടന്നു. ആറുമാസമായി തുടരുന്ന സംഘര്‍ഷത്തില്‍ എണ്ണക്കപ്പലുകള്‍ക്ക് നേരെ ഇരുവിഭാഗവും നടത്തിയ ഏറ്റവും വലിയ ആക്രമണങ്ങളെ തുടര്‍ന്ന് ബ്രെന്റ് ക്രൂഡ് ഓയില്‍ വില ബാരലിന് 100 ഡോളറിന് മുകളിലെത്തി.


വിവിധ എയര്‍ലൈനുകളുടെ നിലവിലെ അവസ്ഥ
ഇത്തിഹാദ് എയര്‍വേയ്സ് (അബുദാബി)

ബഹ്‌റൈനിലേക്കും കുവൈത്തിലേക്കുമുള്ള സര്‍വീസുകള്‍ തടസ്സമില്ലാതെ തുടരുന്നു (അബുദാബി-ബഹ്‌റൈന്‍: EY647, EY641, EY645; അബുദാബി-കുവൈത്ത്: EY553). മോശം കാലാവസ്ഥ കാരണം സെപ്റ്റംബര്‍ 9-ന് ബാഴ്‌സലോണയിലേക്ക് പുറപ്പെട്ട EY111 വിമാനം മാഡ്രിഡിലേക്ക് തിരിച്ചുവിട്ടു. ജക്കാര്‍ത്തയില്‍ നിന്നുള്ള EY473 സര്‍വീസും ബാങ്കോക്കിലേക്കുള്ള EY400 വിമാനവും വൈകിയതായി റിപ്പോര്‍ട്ട്.

എയര്‍ അറേബ്യ അബുദാബി

തഷ്‌കന്റ് (3L763), തിബിലിസി (3L714), ബാക്കു (3L730), തിരുവനന്തപുരം (3L248), കെയ്റോ (3L431), അമ്മാന്‍ (3L032), കുവൈത്ത് (3L020) എന്നീ വിമാനങ്ങള്‍ വൈകിയാണ് സര്‍വീസ് നടത്തുന്നത്.

എമിറേറ്റ്‌സ് (ദുബായ്)

ദുബായ്-ബഹ്‌റൈന്‍ (EK837, EK839), ദുബായ്-കുവൈത്ത് (EK857) വിമാനങ്ങള്‍ സര്‍വീസ് നടത്തുന്നുണ്ട്. യാത്രക്കാര്‍ ഔദ്യോഗിക വിവരങ്ങള്‍ പരിശോധിക്കണം. യുകെ-യുഎഇ യാത്രകളില്‍ പുതിയ തടസ്സങ്ങളില്ല; സര്‍വീസുകള്‍ കൃത്യസമയത്താണ്.

ഫ്‌ലൈ ദുബായ്

കുവൈത്ത്, ബഹ്‌റൈന്‍ റൂട്ടുകള്‍ സാധാരണ നിലയില്‍ പ്രവര്‍ത്തിക്കുന്നു. ദുബായില്‍ നിന്ന് യാത്ര തിരിക്കുന്നവര്‍ പുറപ്പെടുന്നതിന് കുറഞ്ഞത് നാല് മണിക്കൂര്‍ മുമ്പെങ്കിലും വിമാനത്താവളത്തില്‍ എത്താന്‍ നിര്‍ദ്ദേശമുണ്ട്.

എയര്‍ അറേബ്യ (ഷാര്‍ജ)

ഷാര്‍ജയില്‍ നിന്നുള്ള ചില കുവൈത്ത് (G9068, G9124), ബഹ്‌റൈന്‍ (G9107) സര്‍വീസുകള്‍ റദ്ദാക്കി. എന്നാല്‍ മറ്റ് ചില സര്‍വീസുകള്‍ പുനരാരംഭിച്ചിട്ടുണ്ട്.

അന്താരാഷ്ട്ര യാത്രാ നിര്‍ദ്ദേശങ്ങള്‍
യുകെ : യുഎഇ, ദുബായ്, അബുദാബി, കുവൈത്ത്, ഖത്തര്‍ എന്നീ പ്രധാന മേഖലകളിലേക്കുള്ള 'അത്യാവശ്യമല്ലാത്ത യാത്രകള്‍ ഒഴിവാക്കുക' എന്ന നിര്‍ദ്ദേശം യുകെ പിന്‍വലിച്ചു. എന്നാല്‍ പെട്ടെന്നുള്ള വ്യോമപാത മാറ്റങ്ങള്‍ക്ക് സാധ്യതയുണ്ടെന്ന് മുന്നറിയിപ്പുണ്ട്.

യു.എസ്.എ: യുഎഇ, സൗദി അറേബ്യ, ജോര്‍ദാന്‍, ഒമാന്‍ എന്നീ രാജ്യങ്ങളെ 'ലെവല്‍ 3: യാത്ര പുനഃപരിശോധിക്കുക' പട്ടികയില്‍ ഉള്‍പ്പെടുത്തി. അത്യാവശ്യക്കാരല്ലാത്ത അമേരിക്കന്‍ ഗവണ്‍മെന്റ് ഉദ്യോഗസ്ഥരോടും അവരുടെ കുടുംബങ്ങളോടും യുഎഇ വിടാന്‍ നിര്‍ദ്ദേശിച്ചിട്ടുണ്ട്.

ഓസ്‌ട്രേലിയ: യുഎഇയിലേക്കുള്ള യാത്രാ മുന്നറിയിപ്പ് 'ലെവല്‍ 4'ല്‍ നിന്ന് 'ലെവല്‍ 3' ലേക്ക് കുറച്ചു.

കാനഡ: യുഎഇ, ബഹ്‌റൈന്‍, കുവൈത്ത്, ഖത്തര്‍ എന്നിവിടങ്ങളിലുള്ള തങ്ങളുടെ പൗരന്മാരോട് ജാഗ്രത പാലിക്കാനും ആവശ്യത്തിന് സാധനങ്ങള്‍ കരുതാനും നിര്‍ദ്ദേശിച്ചു.