ദുബായ്: അടുത്ത ഏഴ് വര്‍ഷത്തിനുള്ളില്‍ പ്രതിവര്‍ഷം 20 കോടി (200 മില്യണ്‍) യാത്രക്കാരെ കൈകാര്യം ചെയ്യാന്‍ ശേഷിയുള്ള വിധത്തില്‍ വിമാനത്താവള ശൃംഖല വികസിപ്പിക്കുന്നതിനായി അദാനി എയര്‍പോര്‍ട്ട് ഹോള്‍ഡിംഗ്‌സ് ലിമിറ്റഡ് (AAHL) 1 ശതകോടി ഡോളറിന്റെ ഇക്വിറ്റി സ്വരൂപിക്കുന്നു. ആഗോള, ആഭ്യന്തര നിക്ഷേപക കൂട്ടായ്മയില്‍ നിന്നാണ് കമ്പനി പുതിയ ഓഹരി നിക്ഷേപം കണ്ടെത്തുന്നത്.

ആല്‍ഫ വേവ് ഗ്ലോബല്‍, പ്രേംജി ഇന്‍വെസ്റ്റ്, ടെമാസെക്, ബ്ലാക്ക്‌റോക്ക് നിയന്ത്രണത്തിലുള്ള ഫണ്ടുകള്‍ എന്നിവരടങ്ങിയ നിക്ഷേപക കൂട്ടായ്മയാണ് തുക മുടക്കുന്നത്. പുതിയ നിക്ഷേപത്തിന് മുന്‍പുള്ള വിലയിരുത്തല്‍ അനുസരിച്ച് കമ്പനിയുടെ വിപണി മൂല്യം ഏകദേശം 18 ശതകോടി ഡോളറാണ്. ഇത് ഇന്ത്യയിലെ വിമാനത്താവള അടിസ്ഥാനസൗകര്യ മേഖലയിലെ ഏറ്റവും വലിയ ഇക്വിറ്റി നിക്ഷേപങ്ങളിലൊന്നായി മാറും.

മൂന്ന് ഘട്ടങ്ങളായാണ് നിക്ഷേപകര്‍ പുതിയ ഓഹരികള്‍ വാങ്ങുന്നത്. 2027 ജൂലൈയോടെ അവസാന ഘട്ടം പൂര്‍ത്തിയാകും. ഇതോടെ അദാനി എയര്‍പോര്‍ട്ട് ഹോള്‍ഡിംഗ്‌സില്‍ നിക്ഷേപക കൂട്ടായ്മയ്ക്ക് ആകെ 5.54 ശതമാനം ഓഹരി പങ്കാളിത്തം ലഭിക്കും. ആവശ്യമായ നിയമാനുസൃത അനുമതികള്‍ക്ക് വിധേയമായായിരിക്കും ഇടപാട് അന്തിമമാക്കുക.

വികസന പദ്ധതികള്‍:

നിലവിലുള്ള വിമാനത്താവളങ്ങളിലെ അടിസ്ഥാനസൗകര്യങ്ങള്‍ വികസിപ്പിക്കാനും നവീകരിക്കാനും തുക ഉപയോഗിക്കും. ഗ്രൗണ്ട് ഹാന്‍ഡ്ലിംഗ്, മറ്റ് അനുബന്ധ സേവനങ്ങള്‍ എന്നിവയും മെച്ചപ്പെടുത്തും. വിമാനത്താവളങ്ങള്‍ക്ക് ചുറ്റുമായി സംയോജിത 'എയര്‍പോര്‍ട്ട് സിറ്റി' പദ്ധതികള്‍ യാഥാര്‍ത്ഥ്യമാക്കും. ആദ്യ ഘട്ടത്തില്‍ 2.2 കോടി ചതുരശ്ര അടി വിസ്തീര്‍ണ്ണത്തില്‍ വാണിജ്യ ആവശ്യങ്ങള്‍ക്കായുള്ള സമുച്ചയങ്ങള്‍ നിര്‍മ്മിക്കും.

അദാനി എന്റര്‍പ്രൈസസ് ലിമിറ്റഡിന്റെ സബ്സിഡിയറിയായ AAHL, ഇന്ത്യയിലെ ഏറ്റവും വലിയ സ്വകാര്യ വിമാനത്താവള ഓപ്പറേറ്റര്‍മാരില്‍ ഒന്നാണ്. നോണ്‍-ഫിനാന്‍ഷ്യല്‍ കോര്‍പ്പറേറ്റ് മേഖലയില്‍ ഇന്ത്യയിലെ ഏറ്റവും വലിയ ക്യു.ഐ.പി വഴി അദാനി എന്റര്‍പ്രൈസസ് 15,000 കോടി രൂപ സ്വരൂപിച്ചതിന് തൊട്ടുപിന്നാലെയാണ് അദാനി എയര്‍പോര്‍ട്ടിന്റെ ഈ വമ്പന്‍ ധനസമാഹരണം.