റിയാദ്: സൗദി അറേബ്യയിലെ വിവിധ നഗരങ്ങളെ ലക്ഷ്യമാക്കി ഹൂതികള്‍ നടത്തിയ ആക്രമണങ്ങളില്‍ സ്ത്രീകളും കുട്ടികളും ഉള്‍പ്പെടെ 70-ലേറെ പേര്‍ക്ക് പരിക്കേറ്റതായി സഖ്യസേന. ഹൂതി ഗ്രൂപ്പിന്റെ പ്രകോപനങ്ങള്‍ക്കെതിരെ ശക്തമായ തിരിച്ചടി നല്‍കുമെന്ന് സൗദി നയിക്കുന്ന സഖ്യസേന മുന്നറിയിപ്പ് നല്‍കി.
യെമനിലെ നിയമസാധുതയെ പിന്തുണയ്ക്കുന്ന അറബ് സഖ്യസേനയുടെ വക്താവ് മേജര്‍ ജനറല്‍ തുര്‍ക്കി അല്‍ മാലിക്കിയാണ് വാര്‍ത്താസമ്മേളനത്തില്‍ ഇക്കാര്യം അറിയിച്ചത്. സൗദിയുടെ പരമാധികാരത്തിനും ജനങ്ങളുടെ സുരക്ഷയ്ക്കും നേര്‍ക്കുള്ള കടുത്ത വെല്ലുവിളിയാണ് ഹൂതികളുടെ ഭാഗത്തുനിന്നുണ്ടായതെന്ന് അദ്ദേഹം വിശേഷിപ്പിച്ചു.
അബ്ഹ, ഖമീസ് മുശൈത്ത്, ജിസാന്‍, നജ്റാന്‍ എന്നീ നഗരങ്ങളിലെ ജനവാസ കേന്ദ്രങ്ങളെയും സാമ്പത്തിക സ്ഥാപനങ്ങളെയുമാണ് ഹൂതികള്‍ ലക്ഷ്യമിട്ടത്. ആക്രമണത്തില്‍ 73 സാധാരണക്കാര്‍ക്ക് പരിക്കേറ്റതായി അല്‍ മാലിക്കി സ്ഥിരീകരിച്ചു. രാജ്യത്തിന്റെ സുരക്ഷയ്ക്ക് ഭീഷണിയാകുന്ന കേന്ദ്രങ്ങളെ നിര്‍വീര്യമാക്കാന്‍ ആവശ്യമായ എല്ലാ സൈനിക നടപടികളും സഖ്യസേന സ്വീകരിക്കുമെന്നും അദ്ദേഹം കൂട്ടിച്ചേര്‍ത്തു.
അതേസമയം, സൗദിയുടെ തെക്കന്‍ മേഖലയിലുള്ള ഊര്‍ജ്ജ കേന്ദ്രങ്ങള്‍ക്ക് നേരെയും അടിസ്ഥാന സൗകര്യങ്ങള്‍ക്ക് നേരെയും ആക്രമണമുണ്ടായതായി സൗദി ഊര്‍ജ്ജ മന്ത്രാലയം അറിയിച്ചു. ചിലയിടങ്ങളില്‍ തീപിടുത്തമുണ്ടായതിനെത്തുടര്‍ന്ന് പ്രവര്‍ത്തനം താല്‍ക്കാലികമായി നിര്‍ത്തിവെക്കേണ്ടി വന്നതായും സ്ഥിതിഗതികള്‍ നിയന്ത്രണവിധേയമാക്കാന്‍ ബന്ധപ്പെട്ട അധികൃതര്‍ നടപടികള്‍ ആരംഭിച്ചതായും മന്ത്രാലയം വ്യക്തമാക്കി.
.jpg)
Related News
