കോതമംഗലം: എല്ലാ പൊതുസ്ഥലങ്ങളും പൂര്‍ണ്ണമായും ഭിന്നശേഷി സൗഹൃദമാക്കുന്ന ബാരിയര്‍ ഫ്രീ സംസ്ഥാനമാക്കി കേരളത്തെ മാറ്റുമെന്ന് സാമൂഹ്യനീതി വകുപ്പ് മന്ത്രി വി ഇ അബ്ദുല്‍ ഗഫൂര്‍ പറഞ്ഞു. സംസ്ഥാന സര്‍ക്കാരിന്റെയും സാമൂഹ്യ നീതി വകുപ്പിന്റെയും ആഭിമുഖ്യത്തില്‍ മദര്‍ തെരേസ ദിനാചരണത്തിന്റെ സംസ്ഥാനതല ഉദ്ഘാടനം കോതമംഗലം പീസ് വാലിയില്‍ നിര്‍വഹിക്കുകയായിരുന്നു മന്ത്രി.
കാരുണ്യ പ്രവര്‍ത്തനങ്ങളില്‍ മദര്‍ തെരേസ കാണിച്ചുതന്ന മാതൃകയാണ് ഇന്നത്തെ ജനാധിപത്യ സര്‍ക്കാരുകളുടെ സാമൂഹ്യക്ഷേമ പദ്ധതികള്‍ക്ക് പിന്‍ബലം. ഭിന്നശേഷിക്കാരായ കുട്ടികളെ പരിചരിക്കുന്നവര്‍ നേരിടുന്ന കടുത്ത മാനസിക-സാമൂഹിക പ്രയാസങ്ങള്‍ക്ക് പരിഹാരമായാണ് അന്‍പുവീട് പദ്ധതിക്ക് സര്‍ക്കാര്‍ തുടക്കം കുറിച്ചതെന്നും മന്ത്രി വ്യക്തമാക്കി. തുടക്കത്തില്‍ മൂന്ന് കേന്ദ്രങ്ങളില്‍ തീരുമാനിച്ച ഈ പദ്ധതി, ലഭിച്ച നിവേദനങ്ങളുടെ അടിസ്ഥാനത്തില്‍ സംസ്ഥാനമൊട്ടാകെ വ്യാപിപ്പിക്കാന്‍ തീരുമാനിച്ചിട്ടുണ്ട്. കൂടാതെ, ഭിന്നശേഷിക്കുട്ടികളുടെ പരിചാരകര്‍ക്ക് നല്‍കിയിരുന്ന ആശ്വാസധനം 600 രൂപയില്‍ നിന്ന് 1000 രൂപയായി വര്‍ദ്ധിപ്പിച്ച കാര്യവും അദ്ദേഹം ഓര്‍മ്മിപ്പിച്ചു.
പ്രമേഹം ബാധിച്ച കുട്ടികള്‍ക്കായി ഇന്‍സുലിന്‍ പമ്പുകളും ഉയര്‍ന്ന ഗുണനിലവാരമുള്ള ഇന്‍സുലിന്‍ സപ്പോര്‍ട്ടും നല്‍കുന്ന പദ്ധതികള്‍ വകുപ്പ് മുഖേന വിജയകരമായി നടപ്പിലാക്കി വരുന്നുണ്ട്. നിരന്തരമായ മോണിറ്ററിംഗ് ആവശ്യമായ ഇത്തരം കുട്ടികളുടെ മാതാപിതാക്കളുടെ ആശങ്കകള്‍ പരിഹരിക്കാന്‍ സര്‍ക്കാരിന്റെ ഇടപെടലുകളിലൂടെ സാധിച്ചിട്ടുണ്ടെന്ന് മന്ത്രി പറഞ്ഞു. സര്‍ക്കാര്‍ ഫണ്ടുകളുടെ പരിമിതികള്‍ക്കുള്ളില്‍ നിന്നുകൊണ്ടുമാത്രം ഇത്തരം ബൃഹത്തായ പദ്ധതികള്‍ പൂര്‍ണ്ണമായി നടപ്പിലാക്കുക പ്രയാസകരമാണ്. അതിനാല്‍, സമൂഹത്തിലെ സന്നദ്ധ സംഘടനകളെയും വ്യക്തികളെയും പങ്കാളികളാക്കിക്കൊണ്ട് വലിയൊരു സാമൂഹിക മുന്നേറ്റത്തിന് തയ്യാറെടുക്കുകയാണെന്നും അദ്ദേഹം കൂട്ടിച്ചേര്‍ത്തു.
ഷിബു തെക്കുംപുറം എം എല്‍ എ അധ്യക്ഷത വഹിച്ചു. കോതമംഗലം ബ്ലോക്ക് പഞ്ചായത്ത് പ്രസിഡന്റ് ജെസി സാജു, നെല്ലിക്കുഴി ഗ്രാമപഞ്ചായത്ത് പ്രസിഡന്റ് സനീറ നസീര്‍, വാര്‍ഡ് അംഗം ഷാന്റി, ജില്ലാ സാമൂഹ്യനീതി ഓഫീസര്‍ കെ ജെ ജോണ്‍ ജോഷി, ഒ സി ബി ചെയര്‍മാന്‍ എന്‍ അലി അബ്ദുളള, റെജി, ഒ സി ബി അംഗം ഫാ. ജോര്‍ജ് ജോഷ്വ, അസോസിയേഷന്‍ ഓഫ് ഓര്‍ഫനേജ് ആന്‍ഡ് ചാരിറ്റബിള്‍ ഇന്‍സ്റ്റിറ്റിയൂഷന്‍സ് സംസ്ഥാന പ്രസിഡന്റ് ഡോ. ആന്റണി സിജന്‍ മണുവേലിപ്പറമ്പില്‍, പീസ് വാലി ചെയര്‍മാന്‍ പി എം അബൂബക്കര്‍ തുടങ്ങിയവര്‍ പങ്കെടുത്തു. ക്ഷേമ സ്ഥാപനങ്ങളിലെ താമസക്കാര്‍ വിവിധ കലാപരിപാടികള്‍ അവതരിപ്പിച്ചു.
.jpg)
