റിയാദ്: തിരുവനന്തപുരം റിയാദ് സെക്ടറില്‍ എയര്‍ ഇന്ത്യ എക്‌സ്പ്രസ്സ് നേരിട്ടുള്ള വിമാന സര്‍വീസ് ആരംഭിക്കാനുള്ള നടപടികളെ തിരുവനന്തപുരം സൗദി പാസഞ്ചേഴ്‌സ് ഫോറം സ്വാഗതം ചെയ്തു. തിരുവനന്തപുരം സൗദി അറേബ്യ നേരിട്ടുള്ള വിമാന സര്‍വീസ് വേണമെന്ന പ്രവാസികളുടെ ദീര്‍ഘകാല ആവശ്യത്തിന് ലഭിച്ച ഭാഗിക അംഗീകാരമായാണ് ഈ നീക്കത്തെ കാണുന്നതെന്ന് ഫോറം അറിയിച്ചു.
അതേസമയം, എയര്‍ ഇന്ത്യ എക്‌സ്പ്രസ്സ് സര്‍വീസ് ആരംഭിക്കുന്നതുകൊണ്ട് മാത്രം തിരുവനന്തപുരം ഉള്‍പ്പെടെയുള്ള തെക്കന്‍ കേരളത്തിലെ സൗദി പ്രവാസികളുടെ യാത്രാപ്രശ്‌നങ്ങള്‍ക്ക് പൂര്‍ണ്ണ പരിഹാരമാകില്ലെന്നും ഫോറം വ്യക്തമാക്കി. സൗദിയ തിരുവനന്തപുരം സര്‍വീസ് പുനരാരംഭിക്കണമെന്ന ഫോറത്തിന്റെ പ്രധാന ആവശ്യം ഇപ്പോഴും ശക്തമായി നിലനില്‍ക്കുകയാണ്.
മുന്‍പ് തിരുവനന്തപുരം സൗദി അറേബ്യ സെക്ടറില്‍ സൗദിയ നേരിട്ടുള്ള വിമാന സര്‍വീസുകള്‍ നടത്തിയിരുന്നു. ഈ സര്‍വീസുകള്‍ പുനരാരംഭിക്കാത്തത് സൗദിയിലെ നിരവധി പ്രവാസികള്‍ക്ക്, പ്രത്യേകിച്ച് സര്‍ക്കാര്‍ മേഖലയിലും പ്രമുഖ കമ്പനികളിലും ജോലി ചെയ്യുന്നവര്‍ക്ക്, വലിയ യാത്രാബുദ്ധിമുട്ടുകള്‍ സൃഷ്ടിക്കുന്നുണ്ട്. ഇത്തരം സ്ഥാപനങ്ങളില്‍ ഔദ്യോഗിക യാത്രകള്‍ക്കും അവധിക്കാല യാത്രകള്‍ക്കും പലപ്പോഴും സൗദിയയുടെ ടിക്കറ്റുകളാണ് അനുവദിക്കുന്നത്. അതിനാല്‍ എയര്‍ ഇന്ത്യ എക്‌സ്പ്രസ്സ് സര്‍വീസ് ലഭ്യമായാലും ഈ വിഭാഗത്തില്‍പ്പെടുന്ന നിരവധി യാത്രക്കാര്‍ക്ക് അതിന്റെ പ്രയോജനം ലഭിക്കില്ല.
ഈ സാഹചര്യത്തില്‍ എയര്‍ ഇന്ത്യ എക്‌സ്പ്രസ്സിന്റെ പുതിയ സര്‍വീസിനെ സൗദിയയുടെ തിരുവനന്തപുരം സര്‍വീസിന് പകരമായോ, സൗദിയ സര്‍വീസ് പുനരാരംഭിക്കണമെന്ന ആവശ്യത്തിനുള്ള പൂര്‍ണ്ണ പരിഹാരമായോ കാണാനാകില്ലെന്ന് ഫോറം ചൂണ്ടിക്കാട്ടി.
തിരുവനന്തപുരം അന്താരാഷ്ട്ര വിമാനത്താവളത്തിന് സൗദിയയുടെ Point of Call അനുമതി ലഭ്യമാക്കി റിയാദ് തിരുവനന്തപുരം ഉള്‍പ്പെടെയുള്ള നേരിട്ടുള്ള സൗദിയ സര്‍വീസുകള്‍ പുനരാരംഭിക്കണമെന്ന ആവശ്യം കേന്ദ്ര സര്‍ക്കാരിന്റെയും ബന്ധപ്പെട്ട വ്യോമയാന അധികൃതരുടെയും മുന്നില്‍ കൂടുതല്‍ ശക്തമായി ഉന്നയിക്കും. ഇതിനായുള്ള തുടര്‍നടപടികള്‍ വരും ദിവസങ്ങളില്‍ ഊര്‍ജ്ജിതമാക്കുമെന്നും ഫോറം അറിയിച്ചു.
ഫോറം ചെയര്‍മാന്‍ ഡോ. അബ്ദുല്‍ അസീസ്, ജനറല്‍ സെക്രട്ടറി അലക്‌സ് കൊട്ടാരക്കര, ട്രഷറര്‍ ബഷീര്‍ കോട്ടയം, മീഡിയ കോര്‍ഡിനേറ്റര്‍ ഷംനാദ് കരുനാഗപ്പള്ളി എന്നിവരാണ് ഇക്കാര്യം അറിയിച്ചത്.
.jpg)
Related News
