ബുറൈദ: പ്രാദേശിക വിപണികള്‍ കടന്ന് ആഗോളതലത്തില്‍ സൗദി ഈന്തപ്പഴത്തിന് ലഭിക്കുന്ന വന്‍ ജനപ്രീതിക്കു തെളിവാണ് ബുറൈദ അന്താരാഷ്ട്ര ഈന്തപ്പഴ മേളക്കു ലഭിക്കുന്ന ജനസ്വീകാര്യത. ആഗോളതലത്തില്‍ സൗദി ഈന്തപ്പഴങ്ങളുടെ കയറ്റുമതി മൂല്യത്തിലുണ്ടായ തുടര്‍ച്ചയായ വളര്‍ച്ചയും കൂടുതല്‍ രാജ്യങ്ങളിലേക്ക് വിപണി വിപുലീകരിച്ചതുമാണ് ഈ മുന്നേറ്റത്തിന് പ്രധാന കാരണം.

നാഷണല്‍ സെന്റര്‍ ഫോര്‍ പാംസ് ആന്‍ഡ് ഡേറ്റ്‌സ് പുറത്തുവിട്ട കണക്കുകള്‍ പ്രകാരം 2025-ല്‍ സൗദി അറേബ്യയുടെ ഈന്തപ്പഴ കയറ്റുമതി മൂല്യം ഏകദേശം 193.8 കോടി റിയാലില്‍ എത്തിയതായി കണക്കുകള്‍ വ്യക്തമാക്കുന്നു. 2024-നെ അപേക്ഷിച്ച് 14.3 ശതമാനത്തിന്റെ വര്‍ദ്ധനവാണിത്.

കഴിഞ്ഞ അഞ്ച് വര്‍ഷത്തിനിടയില്‍ രാജ്യത്തിന്റെ ഈന്തപ്പഴ കയറ്റുമതിയില്‍ 59.5 ശതമാനത്തിന്റെ വന്‍ വളര്‍ച്ചയാണുണ്ടായത്. 2021-ല്‍ 121.5 കോടി റിയാലായിരുന്ന കയറ്റുമതി മൂല്യം 2025-ഓടെ ഏകദേശം 200 കോടി റിയാലിലേക്ക് ഉയരുകയായിരുന്നു.

നിലവില്‍ ലോകമെമ്പാടുമുള്ള 125-ലധികം രാജ്യങ്ങളിലേക്ക് സൗദി ഈന്തപ്പഴങ്ങള്‍ കയറ്റുമതി ചെയ്യുന്നുണ്ട്. ഇത് അന്താരാഷ്ട്ര വിപണിയില്‍ സൗദി ഉല്‍പ്പന്നങ്ങളുടെ മത്സരശേഷിയും വര്‍ദ്ധിച്ചുവരുന്ന ആവശ്യകതയും വ്യക്തമാക്കുന്നതാണെന്ന് അധികൃതര്‍ ചൂണ്ടിക്കാട്ടി.