ജിദ്ദ: സൗദി അറേബ്യയിലെ വിവിധ പ്രദേശങ്ങളില്‍ മിന്നലോടും കാറ്റോടും കൂടിയ കനത്ത മഴയ്ക്കും പ്രളയത്തിനും സാധ്യതയുള്ളതായി ദേശീയ കാലാവസ്ഥാ കേന്ദ്രം മുന്നറിയിപ്പ് നല്‍കി. ഇതിനെ തുടര്‍ന്ന് ബുധനാഴ്ച രാജ്യത്തെ ചില ഭാഗങ്ങളില്‍ റെഡ് അലര്‍ട്ട് പ്രഖ്യാപിച്ചു. മക്കയിലെ മൈസാന്‍, അസീറിലെ അല്‍-മജാരിദ, റിജാല്‍ അല്‍മ തുടങ്ങിയ പ്രദേശങ്ങളിലാണ് കനത്ത മഴ മുന്നറിയിപ്പായ റെഡ് അലര്‍ട്ട് നല്‍കിയിട്ടുള്ളത്.

ഓറഞ്ച് അലര്‍ട്ട്: ജിസാനിലെ അബു അരീഷ്, അഹദ് അല്‍-മസാരിഹ എന്നിവിടങ്ങളില്‍ മിതമായ മഴയ്ക്കും, അസീറിലെ അബഹയിലും സമീപ പ്രദേശങ്ങളിലും ശക്തമായ മൂടല്‍മഞ്ഞിനും ഓറഞ്ച് അലര്‍ട്ട് പ്രഖ്യാപിച്ചു. യല്ലോ അലര്‍ട്ട്: ജിസാനിലെ അല്‍-ദര്‍ബ്, അസീറിലെ അല്‍-ബിര്‍ക്ക്, മക്ക എന്നിവിടങ്ങളില്‍ നേരിയ മഴയുടെ ലക്ഷണമുള്ള യല്ലോ അലര്‍ട്ടാണ് നല്‍കിയിരിക്കുന്നത്.ജിസാന്‍, അസീര്‍, അല്‍-ബാഹ, മക്ക, മദീന എന്നീ മേഖലകളില്‍ ആലിപ്പഴ വര്‍ഷത്തോടും ശക്തമായ കാറ്റോടും കൂടിയ ഇടിമിന്നലുള്ള മഴയ്ക്ക് സാധ്യതയുണ്ട്.

ഉയര്‍ന്ന താപനിലയും കാലാവസ്ഥയും

രാജ്യത്ത് ഏറ്റവും ഉയര്‍ന്ന താപനില ദമാമിലാണ് രേഖപ്പെടുത്തിയത് (46°C). റിയാദ്, മദീന, ബുറൈദ എന്നിവിടങ്ങളില്‍ 45°C താപനില രേഖപ്പെടുത്തി. മറ്റ് പ്രധാന നഗരങ്ങളിലെ താപനില: സകാക്ക (44°C), അറാര്‍ (43°C), മക്ക, ഹാഇല്‍ (42°C), തബൂക്ക് (41°C), നജ്‌റാന്‍ (40°C), ജിദ്ദ, ജിസാന്‍ (38°C), അല്‍-ബാഹ (31°C), അബഹ (30°C).

റിയാദിലും ബുറൈദയിലും ഭാഗികമായി മേഘാവൃതമായ അന്തരീക്ഷവും പൊടിക്കാറ്റും പ്രതീക്ഷിക്കുന്നു. മക്ക, മദീന, ജിദ്ദ, ജിസാന്‍, ഹായില്‍ എന്നിവിടങ്ങളില്‍ ഇടിമിന്നലോടു കൂടിയ മഴയ്ക്കും കാറ്റിനും സാധ്യതയുണ്ട്. തബൂക്കില്‍ തെളിഞ്ഞ കാലാവസ്ഥയായിരിക്കും. ഹ്യുമിഡിറ്റി കൂടുതല്‍ രേഖപ്പെടുത്തിയത് ദമാമിലാണ് (90%).