മസ്‌കറ്റ്: മധ്യപൂര്‍വേഷ്യന്‍ സംഘര്‍ഷത്തെ തുടര്‍ന്ന് ഗതാഗതം തടസ്സപ്പെട്ട ഹോര്‍മുസ് കടലിടുക്കില്‍ താത്കാലിക നാവിക പാത സ്ഥാപിക്കുന്നതിനും മൈനുകള്‍ നീക്കം ചെയ്യുന്നതിനുമുള്ള സംയുക്ത പദ്ധതിക്ക് ധാരണയായതായി ഇറാന്, ഒമാന്‍ വിദേശകാര്യ മന്ത്രിമാര്‍ അറിയിച്ചു. ടെഹ്റാനില്‍ നടന്ന ചര്‍ച്ചകള്‍ക്ക് ശേഷം ഒമാന്‍ പുറത്തുവിട്ട സംയുക്ത പ്രസ്താവനയിലാണ് നിര്‍ണായക പ്രഖ്യാപനം.
ഒമാന്‍ വിദേശകാര്യ മന്ത്രി ബദര്‍ അല്‍ ബുസൈദിയും ഇറാന്റെ വിദേശകാര്യ മന്ത്രി അബ്ബാസ് അറാഗ്ചിയും തമ്മില്‍ നടന്ന ചര്‍ച്ചയിലാണ് ഘട്ടംഘട്ടമായുള്ള പ്രായോഗിക ചട്ടക്കൂടിന് രൂപം നല്‍കിയത്. സ്ഥിരമായ നാവിക പാത, ഗതാഗത നിയന്ത്രണം, വിവരശേഖരണം, സുരക്ഷാ സേവനങ്ങള്‍ എന്നിവ ഉറപ്പാക്കുന്നതിനായി വരും ദിവസങ്ങളില്‍ സാങ്കേതികതല ചര്‍ച്ചകള്‍ തുടരും. പ്രദേശത്തെ മറ്റ് ഗള്‍ഫ് രാജ്യങ്ങളുമായും ചര്‍ച്ചകള്‍ അനിവാര്യമാണെന്ന് ഇരു രാജ്യങ്ങളും വ്യക്തമാക്കി.
അതേസമയം, ഹോര്‍മുസ് കടലിടുക്കിലെ അന്താരാഷ്ട്ര സമുദ്രാതിര്‍ത്തിയിലുള്ള മൈനുകള്‍ നീക്കം ചെയ്തതായി യു.എസ് നാവികസേനയെ ഉദ്ധരിച്ച് പ്രസിഡന്റ് ഡൊണാള്‍ഡ് ട്രംപ് സോഷ്യല്‍ മീഡിയയിലൂടെ അവകാശപ്പെട്ടു. പുതിയതായി മൈനുകള്‍ സ്ഥാപിക്കുന്ന കപ്പലുകള്‍ തകര്‍ക്കുമെന്നും ഇതില്‍ വിട്ടുവീഴ്ചയുണ്ടാകില്ലെന്നും ട്രംപ് മുന്നറിയിപ്പ് നല്‍കി.
ഫെബ്രുവരി 28-ന് യു.എസും ഇസ്രായേലും ഇറാന് നേരെ നടത്തിയ ആക്രമണത്തെത്തുടര്‍ന്നാണ് മേഖലയില്‍ യുദ്ധം പൊട്ടിപ്പുറപ്പെട്ടത്. ഇതിന് മറുപടിയായി ഇറാന് ഹോര്‍മുസ് കടലിടുക്ക് ഉപരോധിക്കുകയും, യു.എസ് തിരിച്ചടി നല്‍കുകയും ചെയ്തു. ലോകത്തെ അഞ്ചിലൊന്ന് എണ്ണ-എല്‍.എന്‍.ജി കയറ്റുമതി നടക്കുന്ന പ്രധാന ജലപാത സ്തംഭിച്ചത് ആഗോള ഇന്ധന വിപണിയെ കടുത്ത പ്രതിസന്ധിയിലാക്കിയിട്ടുണ്ട്. ഉപരോധം പിന്‍വലിക്കല്‍ ഉള്‍പ്പെടെയുള്ള ആവശ്യങ്ങള്‍ യു.എസ് അംഗീകരിക്കുന്നത് വരെ കടലിടുക്ക് പൂര്‍ണ്ണമായി തുറക്കില്ലെന്ന നിലപാടിലാണ് ഇറാന്.
.jpg)
Related News
