ടെഹ്റാന്: യു.എസിനെതിരായ മാസങ്ങള്‍ നീണ്ട മിഡില്‍ ഈസ്റ്റ് യുദ്ധത്തില്‍ തങ്ങള്‍ ശക്തമായ നിലയിലാണെന്നും, അതിനാല്‍ യുദ്ധം അവസാനിപ്പിക്കാന്‍ ഇതാണ് അനുയോജ്യമായ സമയമെന്നും ഇറാന്‍ പ്രസിഡന്റ് മസൂദ് പെസെഷ്‌കിയാന്‍. വെള്ളിയാഴ്ച ഡോക്ടര്‍മാരുമായി നടത്തിയ കൂടിക്കാഴ്ചയിലാണ് അദ്ദേഹം നിലപാട് വ്യക്തമാക്കിയത്.
'നാം ഇപ്പോള്‍ കരുത്തിന്റെയും അന്തസ്സിന്റെയും നിലയിലാണ് നില്‍ക്കുന്നത്. ഇറാനെ ലോകം മുഴുവന്‍ വിജയശ്രീലാളിതരായി അംഗീകരിക്കുന്നു. എല്ലാ അന്താരാഷ്ട്ര നിയമങ്ങളും ലംഘിച്ച് അമേരിക്ക ഇറാന്റെ സ്‌കൂളുകള്‍ക്കും ആശുപത്രികള്‍ക്കും അടിസ്ഥാന സൗകര്യങ്ങള്‍ക്കും നേരെ ആക്രമണം നടത്തിയെന്നും, അതിലൂടെ അവര്‍ ലോകമെമ്പാടും വെറുക്കപ്പെടുകയാണെന്നും തെളിഞ്ഞിരിക്കുന്നു. അതിനാല്‍ യുദ്ധം ഇപ്പോള്‍ അവസാനിപ്പിക്കുന്നതാണ് നല്ലത്,' മസൂദ് പെസെഷ്‌കിയാന്‍ പറഞ്ഞു.
ഇറാനുമേല്‍ ഉപരോധം കൂടുതല്‍ കടുപ്പിക്കുമെന്ന് വാഷിംഗ്ടണ്‍ വ്യക്തമാക്കിയതിന് പിന്നാലെ, യു.എസിന്റേത് 'സാമ്പത്തിക ഭീകരവാദവും' 'മാനവികതയ്‌ക്കെതിരായ കുറ്റകൃത്യവുമാണെന്ന്' ഇറാന്‍ വിദേശകാര്യ മന്ത്രാലയം ആരോപിച്ചു. ഇത്തരം ക്രൂരമായ കുറ്റകൃത്യങ്ങള്‍ ചെയ്ത ഉപരോധത്തിന്റെ സൂത്രധാരന്മാരും അത് നടപ്പിലാക്കിയവരും വിചാരണയും ശിക്ഷയും അര്‍ഹിക്കുന്നുണ്ടെന്ന് ഇറാന്‍ സ്റ്റേറ്റ് മീഡിയ പുറത്തുവിട്ട പ്രസ്താവനയില്‍ വ്യക്തമാക്കി.
ട്രംപിന്റെ 'സാമ്പത്തിക ഡി-ഡേ': യുദ്ധം അവസാനത്തിലേക്ക് എത്തുന്നോ?
ഇറാന്‍-യു.എസ് യുദ്ധം ആറുമാസത്തോട് അടുക്കുമ്പോള്‍, വേറിട്ടൊരു ആയുധവുമായാണ് യു.എസ് പ്രസിഡന്റ് ഡൊണാള്‍ഡ് ട്രംപ് രംഗത്തെത്തുന്നത്. മാസങ്ങള്‍ നീണ്ട വ്യോമാക്രമണങ്ങള്‍ക്കും വലിയ തോതിലുള്ള ഭീഷണികള്‍ക്കും പരാജയപ്പെട്ട നയതന്ത്ര ശ്രമങ്ങള്‍ക്കും ശേഷം, ടെഹ്റാന് നേരെ 'സാമ്പത്തിക ഡി-ഡേ (economic D-Day)' നടപ്പിലാക്കുമെന്ന് ട്രംപ് വാഗ്ദാനം ചെയ്തിരിക്കുകയാണ്.
ഇറാന്റെ സാമ്പത്തിക വ്യവസ്ഥയെ പൂര്‍ണ്ണമായി തകര്‍ക്കാനും വരുമാന മാര്‍ഗ്ഗങ്ങള്‍ അടയ്ക്കാനും യു.എസിന്റെ ആവശ്യങ്ങള്‍ അംഗീകരിക്കാന്‍ ഇറാന്‍ ഭരണകൂടത്തെ നിര്‍ബന്ധിതരാക്കാനും ലക്ഷ്യമിട്ടുള്ളതാണ് ഈ പുതിയ സാമ്പത്തിക ഉപരോധ തന്ത്രം. ഉപരോധ ഭീഷണി പ്രത്യക്ഷത്തില്‍ യുദ്ധത്തിന്റെ വ്യാപ്തി വര്‍ദ്ധിപ്പിക്കുന്നതായി തോന്നാമെങ്കിലും, വലിയ തോതിലുള്ള സൈനിക നടപടികളിലേക്ക് ഉടനടി മടങ്ങാന്‍ വാഷിംഗ്ടണിന് താല്‍പ്പര്യമില്ലെന്ന സൂചനയും ഇത് നല്‍കുന്നുണ്ട്.
ട്രംപിന്റെ ഈ സാമ്പത്തിക നീക്കം യുദ്ധം അവസാനിപ്പിക്കാനുള്ള ശ്രമത്തിന്റെ തുടക്കമാണോ, അതോ ഇരുപക്ഷത്തിനും പരിഹരിക്കാന്‍ കഴിയാത്ത സംഘര്‍ഷത്തിന്റെ അടുത്ത ഘട്ടമാണോ എന്ന ചോദ്യവും ഇതിനകം ഉയര്‍ന്നുകഴിഞ്ഞു.
ചൈനയുടെ നിലപാട്
ഇറാന്‍ സാമ്പത്തിക വ്യവസ്ഥയെ ഒറ്റപ്പെടുത്താനുള്ള ശ്രമങ്ങളില്‍ ചൈന ഉള്‍പ്പെടെയുള്ള രാജ്യങ്ങള്‍ പങ്കാളികളാകണമെന്ന് അമേരിക്ക ആവശ്യപ്പെട്ടിരുന്നു. എന്നാല്‍ ഉപരോധങ്ങളും ഭീഷണികളും മിഡില്‍ ഈസ്റ്റ് സംഘര്‍ഷത്തിന് പരിഹാരമാകില്ലെന്ന് ചൈന വ്യക്തമാക്കി. ഉപരോധങ്ങള്‍ പ്രശ്‌നപരിഹാരത്തിന് സഹായിക്കില്ലെന്നും നയതന്ത്രപരവും രാഷ്ട്രീയവുമായ മാര്‍ഗ്ഗങ്ങളിലൂടെ പ്രശ്‌നം പരിഹരിക്കാന്‍ എല്ലാ കക്ഷികളും ഉത്തരവാദിത്തമുള്ള നടപടികള്‍ സ്വീകരിക്കണമെന്നും ചൈനീസ് വിദേശകാര്യ മന്ത്രാലയ വക്താവ് ലിന്‍ ജിയാന്‍ വെള്ളിയാഴ്ച മാധ്യമങ്ങളോട് പറഞ്ഞു. അന്താരാഷ്ട്ര നിയമങ്ങളുടെയോ യു.എന്‍ രക്ഷാസമിതിയുടെയോ അംഗീകാരമില്ലാത്ത ഏകപക്ഷീയമായ അനധികൃത ഉപരോധങ്ങളെ ചൈന എതിര്‍ക്കുന്നതായും അദ്ദേഹം കൂട്ടിച്ചേര്‍ത്തു.
.jpg)
Related News
