ലണ്ടന്‍: റിഫോം യുകെ പാര്‍ട്ടി നേതാവ് നൈജല്‍ ഫെറാഷ് ക്രിസ്ത്യന്‍ വിശ്വാസത്തെ ഇസ്ലാം വിരുദ്ധ വികാരങ്ങള്‍ പ്രചരിപ്പിക്കാനായി ദുരുപയോഗം ചെയ്യുകയാണെന്ന് മുന്‍ കാന്റര്‍ബറി ആര്‍ച്ച്ബിഷപ്പ് റോവന്‍ വില്യംസ്. പ്രമുഖ ബ്രിട്ടീഷ് മാസികയായ 'ന്യൂ ഹ്യൂമനിസ്റ്റിന്' നല്‍കിയ അഭിമുഖത്തിലാണ് സി.ഒ.ഇ (Church of England) മുന്‍ തലവന്‍ കൂടിയായ റോവന്‍ വില്യംസ് ഗുരുതരമായ ആരോപണം ഉന്നയിച്ചത്.

ഇസ്ലാം വിരുദ്ധ നേതാവായ ടോമി റോബിന്‍സണ്‍ താന്‍ ക്രിസ്തുമത വിശ്വാസിയാണെന്ന് അവകാശപ്പെടുന്നതിനെയും അദ്ദേഹം ചോദ്യം ചെയ്തു. വിദ്വേഷവും അക്രമവും വളര്‍ത്തുന്ന പൊതു പ്രസംഗങ്ങള്‍ നടത്തുന്ന ഒരാള്‍ക്ക് എങ്ങനെയാണ് ക്രിസ്തീയ ജീവിതമാര്‍ഗ്ഗം പിന്തുടരാന്‍ കഴിയുന്നതെന്ന് റോബിന്‍സണോട് തനിക്ക് ചോദിക്കാനുണ്ടെന്ന് അദ്ദേഹം വ്യക്തമാക്കി.

'രാജ്യത്ത് വര്‍ദ്ധിച്ചുവരുന്ന ഇസ്ലാം വിരുദ്ധ വികാരങ്ങളെ സ്വന്തം ആവശ്യങ്ങള്‍ക്കായി ഉപയോഗപ്പെടുത്താനാണ് ഫെറാഷും കൂട്ടരും ശ്രമിക്കുന്നത്. 'നമ്മള്‍ ഒരു ക്രിസ്ത്യന്‍ സമൂഹമാണ്' എന്ന് ഊന്നിപ്പറയുന്നത് അവര്‍ക്കൊരു ആയുധമായി മാറുന്നു,' റോവന്‍ വില്യംസ് പറഞ്ഞു.

ബ്രിട്ടീഷ് മൂല്യങ്ങളെ എതിര്‍ക്കുന്ന ഒരു വലിയ വിഭാഗം യുവാക്കള്‍ രാജ്യത്തുണ്ടെന്നും അത് മുസ്ലീങ്ങളെ ഉദ്ദേശിച്ചാണെന്നും 2024-ല്‍ ഫെറാഷ് നടത്തിയ പരാമര്‍ശം വലിയ വിവാദമായിരുന്നു. കൂടാതെ, ലണ്ടനിലെ ട്രഫാല്‍ഗര്‍ സ്‌ക്വയറില്‍ സംഘടിപ്പിച്ച ഇഫ്താര്‍ സംഗമത്തെക്കുറിച്ച് സംസാരിക്കവെ, അത് തങ്ങളുടെ ജീവിതരീതിയെ കൈയ്യേറാനും ഭയപ്പെടുത്താനുമുള്ള ശ്രമമാണെന്നും ഫെറാഷ് ആരോപിച്ചിരുന്നു. ഇത്തരത്തിലുള്ള തീവ്ര ദേശീയവാദ രാഷ്ട്രീയ നീക്കങ്ങള്‍ക്കെതിരെയാണ് ഇപ്പോള്‍ മുന്‍ ആര്‍ച്ച്ബിഷപ്പ് രംഗത്തെത്തിയിരിക്കുന്നത്.

ഫോട്ടോ: നൈജല്‍ ഫെറാഷ്