റിയാദ്: ഫുട്‌ബോള്‍ കരിയറിന് വിരാമമിടാന്‍ ഒരുങ്ങി സൂപ്പര്‍താരം ക്രിസ്റ്റ്യാനോ റൊണാള്‍ഡോ. തന്റെ ഫുട്‌ബോള്‍ കരിയറിലെ അവസാന വര്‍ഷത്തിലൂടെയാണ് താന്‍ കടന്നുപോകുന്നതെന്ന് റൊണാള്‍ഡോ വ്യക്തമാക്കി. വോഗ് മാഗസിന് നല്‍കിയ അഭിമുഖത്തിലാണ് 41 കാരനായ താരം ഇക്കാര്യം വെളിപ്പെടുത്തിയത്.

അല്‍-നസ്‌റുമായുള്ള റൊണാള്‍ഡോയുടെ കരാര്‍ 2027 ജൂണ്‍ വരെയാണെങ്കിലും, വിരമിക്കലിനെക്കുറിച്ച് താരം കൃത്യമായ സമയം ഇതുവരെ വ്യക്തമാക്കിയിരുന്നില്ല. ഇതിനിടയിലാണ് ആരാധകരെ നിരാശപ്പെടുത്തിക്കൊണ്ടുള്ള ഈ പ്രഖ്യാപനം വന്നിരിക്കുന്നത്.

ലോകകപ്പ് മത്സരങ്ങളില്‍ നിന്ന് താരം വിരമിക്കല്‍ പ്രഖ്യാപിച്ചിട്ടുണ്ടെങ്കിലും, ദേശീയ ടീമിനായി ഭാവിയില്‍ വീണ്ടും കളത്തിലിറങ്ങുന്നതിനുള്ള സാധ്യതകള്‍ പൂര്‍ണ്ണമായി തള്ളിക്കളഞ്ഞിട്ടില്ല. പോര്‍ച്ചുഗലിനായി ഏറ്റവും കൂടുതല്‍ മത്സരങ്ങള്‍ കളിച്ചതും (233 ക്യാപ്പുകള്‍) ഏറ്റവുമധികം ഗോളുകള്‍ നേടിയതും (146 ഗോളുകള്‍) റൊണാള്‍ഡോയാണ്. കൂടാതെ, അര്‍ജന്റീനയുടെ ലയണല്‍ മെസ്സിക്കൊപ്പം ആറ് ലോകകപ്പുകളില്‍ കളിക്കുന്ന ആദ്യ പുരുഷ താരമെന്ന അപൂര്‍വ്വ നേട്ടവും 2026-ല്‍ താരം സ്വന്തമാക്കിയിരുന്നു. 2026 ലോകകപ്പില്‍ മൂന്ന് ഗോളുകള്‍ നേടിയെങ്കിലും, ചില ആരാധകരുടെ വിമര്‍ശനങ്ങള്‍ക്ക് താരം പാത്രമായിരുന്നു.

'എന്റെ ഭാവി ഞാന്‍ പ്ലാന്‍ ചെയ്തു കഴിഞ്ഞിട്ടുണ്ട്,' വോഗിന് നല്‍കിയ അഭിമുഖത്തില്‍ റൊണാള്‍ഡോ പറഞ്ഞു. 'എന്നെ തിരക്കില്‍ നിര്‍ത്താന്‍ നിരവധി കാര്യങ്ങളുണ്ട്, അതിനാല്‍ ഒരെണ്ണം മാത്രം ചൂണ്ടിക്കാണിക്കുക പ്രയാസമാണ്.'

'ഫുട്‌ബോള്‍ ജീവിതത്തില്‍ നിന്ന് വിടപറയുമ്പോള്‍ അത് വലിയൊരു ശൂന്യത സൃഷ്ടിച്ചേക്കാം. അതുകൊണ്ട് തന്നെ സമയം വിവിധ കാര്യങ്ങളിലൂടെ നമ്മള്‍ നിറയ്‌ക്കേണ്ടതുണ്ട്. കൂടുതല്‍ യാത്ര ചെയ്യുക, തനിക്ക് ഏറെ ഇഷ്ടമുള്ള പാഡല്‍ കളി ആസ്വദിക്കുക, താന്‍ കഷ്ടപ്പെട്ട് നേടിയ സമ്പാദ്യം ആസ്വദിക്കുക തുടങ്ങിയവയിലൂടെ ജീവിതം മുന്നോട്ട് കൊണ്ടുപോകാനാണ് ആഗ്രഹം. 25 വര്‍ഷത്തെ കഠിനാധ്വാനവും വലിയൊരു ത്യാഗവുമാണ് ഇതിന് പിന്നിലുള്ളത്,' താരം കൂട്ടിച്ചേര്‍ത്തു.

അഞ്ച് തവണ ബാലണ്‍ ഡി ഓര്‍ പുരസ്‌കാരം നേടിയിട്ടുള്ള റൊണാള്‍ഡോ, സ്‌പോര്‍ട്ടിങ് സി.പിയിലാണ് തന്റെ കരിയര്‍ ആരംഭിച്ചത്. തുടര്‍ന്ന് മാഞ്ചസ്റ്റര്‍ യുണൈറ്റഡ്, റയല്‍ മാഡ്രിഡ്, യുവന്റസ് എന്നീ പ്രമുഖ ക്ലബ്ബുകള്‍ക്കായും അദ്ദേഹം ബൂട്ടണിഞ്ഞിട്ടുണ്ട്.