റിയാദ്: മക്കയിലും മദീനയിലും തീര്‍ത്ഥാടകര്‍ക്ക് താമസ സൗകര്യം ഒരുക്കുന്ന സ്ഥാപനങ്ങള്‍ക്കായുള്ള ഹജ്ജ് സീസണ്‍ അക്കോമഡേഷന്‍ റെഗുലേഷന്‍സ്, ലൈസന്‍സിങ്, ക്ലാസിഫിക്കേഷന്‍ മാനദണ്ഡങ്ങള്‍, ലംഘനങ്ങള്‍ക്കുള്ള നിയമങ്ങള്‍ എന്നിവയില്‍ വരുത്തിയ ഭേദഗതികള്‍ ടൂറിസം മന്ത്രാലയം അംഗീകരിച്ചു. 2027 ലെ ഹജ്ജ് സീസണിന് മുന്നോടിയായി സൗകര്യങ്ങളുടെ സജ്ജീകരണ നിലവാരം ഉയര്‍ത്താനും സേവനങ്ങളുടെ ഗുണനിലവാരം വര്‍ദ്ധിപ്പിക്കാനും പ്രവര്‍ത്തനങ്ങള്‍ നിയന്ത്രിക്കാനുമാണ് ഈ ഭേദഗതികള്‍ ലക്ഷ്യമിടുന്നത്.

പ്രവര്‍ത്തന സജ്ജത പരിശോധിക്കുക, സുരക്ഷാ-പരിപാലന മാനദണ്ഡങ്ങള്‍ പാലിക്കുക, അവശ്യ സേവനങ്ങള്‍ ഉറപ്പാക്കുക, തീര്‍ത്ഥാടകര്‍ക്ക് സുരക്ഷിതവും സുവ്യവസ്ഥിതമായതുമായ താമസം ഉറപ്പാക്കാനുള്ള പ്രവര്‍ത്തനപരമായ ആവശ്യകതകള്‍ പാലിക്കുക എന്നിവയാണ് പുതിയ നിയമങ്ങളെന്ന് മന്ത്രാലയ വക്താവ് നസ്ര്‍ അല്‍ അന്‍സാരി പറഞ്ഞു.

ഹജ്ജ് താമസ സൗകര്യങ്ങളെ എക്കോണമി എന്നും ഫസ്റ്റ് ക്ലാസ് എന്നും തരംതിരിച്ചിട്ടുണ്ട്. ഇവ ഓരോന്നിനും പ്രത്യേക നിബന്ധനകളുമുണ്ട്. പൊതുസ്ഥലങ്ങള്‍, മുറികള്‍, റിസപ്ഷന്‍ ഏരിയകള്‍, ശുചിത്വം, പരിപാലനം, അതിഥി സേവനങ്ങള്‍ എന്നിവയെല്ലാം ഇതില്‍ ഉള്‍പ്പെടുന്നു. പാലനവും സേവന നിലവാരവും മെച്ചപ്പെടുത്തുന്നതിനായി ലൈസന്‍സിങ്ങിന് മുമ്പും പ്രവര്‍ത്തനങ്ങള്‍ ആരംഭിക്കുന്നതിന് മുമ്പും പ്രവര്‍ത്തന സമയത്തും പരിശോധനകളും മേല്‍നോട്ടവും ഉണ്ടായിരിക്കുന്നതാണ്.

തീര്‍ത്ഥാടകരെ ആതിഥ്യമരുളുക എന്നത് നൂറ്റാണ്ടുകളുടെ പാരമ്പര്യമുള്ള ഒരു ദേശീയ ഉത്തരവാദിത്തമാണെന്ന് മന്ത്രാലയം വ്യക്തമാക്കി. സേവന നിലവാരം ഉയര്‍ത്തുന്നതിനും, തീര്‍ത്ഥാടകര്‍ക്ക് സുരക്ഷിതവും സംതൃപ്തവുമായ ആതിഥ്യ അനുഭവം നല്‍കുന്നതിനും, തീര്‍ത്ഥാടകരെ സേവിക്കാനുള്ള സൗദി അറേബ്യയുടെ പ്രതിബദ്ധത പ്രതിഫലിപ്പിക്കുന്നതിനുമായാണ് മന്ത്രാലയം ഹജ്ജ് സീസണ്‍ താമസ സൗകര്യങ്ങള്‍ക്കായി മാനദണ്ഡങ്ങള്‍ രൂപീകരിച്ചിരിക്കുന്നത്.

ജനറല്‍ അതോറിറ്റി ഫോര്‍ സ്റ്റാറ്റിസ്റ്റിക്‌സിന്റെ കണക്കുകള്‍ പ്രകാരം 2026-ല്‍ 1.7 ദശലക്ഷത്തിലധികം തീര്‍ത്ഥാടകരാണ് ഹജ്ജ് കര്‍മ്മം നിര്‍വഹിച്ചത്. ഇതില്‍ 1,546,655 പേര്‍ വിദേശത്തുനിന്നുള്ളവരും 160,646 പേര്‍ രാജ്യത്തിനകത്തുനിന്നുള്ള പൗരന്മാരുമാണ്.

കഴിഞ്ഞ സീസണിലെ വിപുലമായ നിരീക്ഷണങ്ങളുടെ തുടര്‍ച്ചയായാണ് മന്ത്രാലയത്തിന്റെ ഈ പുതിയ നടപടികള്‍. ഹജ്ജ് വേളയില്‍ മക്കയിലും മദീനയിലുമായി ഹോസ്പിറ്റാലിറ്റി സൗകര്യങ്ങളിലും താല്‍ക്കാലിക തീര്‍ത്ഥാടക താമസസ്ഥലങ്ങളിലും 19,000-ത്തിലധികം പരിശോധനകള്‍ നടത്തിയതായി ഏപ്രിലില്‍ മന്ത്രാലയം അറിയിച്ചിരുന്നു.

ഇതില്‍ മക്കയില്‍ 11,000-ത്തിലധികം പരിശോധനകളും മദീനയില്‍ 5,000 പരിശോധനകളും ഉള്‍പ്പെടുന്നു. കൂടാതെ താല്‍ക്കാലിക പാര്‍പ്പിടങ്ങളുടെ സേവന നിലവാരം വിലയിരുത്തുന്നതിനായി ഏകദേശം 3,000 സന്ദര്‍ശനങ്ങളും നടത്തി. ഗുണനിലവാര മാനദണ്ഡങ്ങളും ലൈസന്‍സിങ് ആവശ്യകതകളും പാലിക്കുന്നത് പ്രോത്സാഹിപ്പിക്കുന്നതിനായി ഫീല്‍ഡ് ടീമുകള്‍ 3,300-ലധികം 'ബോധവല്‍ക്കരണവും നടത്തിയിട്ടുണ്ട്. സംശയങ്ങള്‍ക്കും അഭിപ്രായങ്ങള്‍ക്കുമായി തീര്‍ത്ഥാടകരെ യൂണിഫൈഡ് ടൂറിസം സെന്ററിലേക്ക് (930) നയിക്കുകയും ചെയ്തു.

തീര്‍ത്ഥാടകരുടെ താമസ വിതരണം മെച്ചപ്പെടുത്തുന്നതിനായി മന്ത്രാലയം നേരത്തെ സ്മാര്‍ട്ട് അക്കോമഡേഷന്‍ സേവനം ആരംഭിച്ചിരുന്നു. തത്സമയ അറൈവല്‍ ട്രാക്കിംഗ്, ഒക്യുപ്പന്‍സി ഇന്‍ഡിക്കേറ്ററുകള്‍, കാത്തിരിപ്പ് സമയം കുറയ്ക്കുന്നതിനുള്ള ഓട്ടോമേറ്റഡ് വെരിഫിക്കേഷന്‍ എന്നിവ ഈ സേവനത്തില്‍ ഉള്‍പ്പെടുന്നു.

2027 ലെ ഹജ്ജ് സീസണിലേക്കുള്ള താമസ സൗകര്യങ്ങള്‍ക്ക് ലൈസന്‍സ് തേടുന്നവര്‍ ആവശ്യകതകള്‍ മുന്‍കൂട്ടി പൂര്‍ത്തിയാക്കണമെന്നും അറ്റകുറ്റപ്പണികളും ഒരുക്കങ്ങളും തീര്‍ത്ത് ലൈസന്‍സിനായി അപേക്ഷ സമര്‍പ്പിക്കണമെന്നും മന്ത്രാലയം അഭ്യര്‍ത്ഥിച്ചു.