ഹഫര്‍ അല്‍ ബാത്തിന്‍: ട്രക്കിനുള്ളില്‍ മരിച്ച നിലയില്‍ കണ്ടെത്തിയ തമിഴ്‌നാട് പുതുക്കോട്ട സ്വദേശി പ്രഭാകറിന്റെ (49) മൃതദേഹം നാട്ടിലെത്തിച്ച് സംസ്‌കരിച്ചു. ഹഫര്‍ അല്‍ ബാത്തിനില്‍ നിന്ന് ഏകദേശം 180 കിലോമീറ്റര്‍ അകലെയുള്ള അല്‍ സൈറ പ്രദേശത്ത് നിര്‍ത്തിയിട്ടിരുന്ന ട്രക്കിനുള്ളിലാണ് പ്രഭാകറിനെ മരിച്ച നിലയില്‍ കണ്ടെത്തിയത്.
കഴിഞ്ഞ രണ്ട് വര്‍ഷമായി സൗദി അറേബ്യയിലെ ഒരു ട്രാന്‍സ്‌പോര്‍ട്ടിങ് കമ്പനിയില്‍ ട്രക്ക് ഡ്രൈവറായി ജോലി ചെയ്തുവരികയായിരുന്നു പ്രഭാകര്‍. ദമാമില്‍ നിന്ന് ഹഫര്‍ അല്‍ ബാത്തിനിലേക്ക് ചരക്കുമായി പുറപ്പെട്ട ഒമ്പത് ട്രക്കുകളുടെ സംഘത്തിലായിരുന്നു അദ്ദേഹം ഓടിച്ചിരുന്ന വാഹനവും. നിശ്ചിത സമയത്തിനുള്ളില്‍ മറ്റ് വാഹനങ്ങള്‍ ഹഫര്‍ അല്‍ ബാത്തിനില്‍ എത്തിയിട്ടും പ്രഭാകറിന്റെ ട്രക്ക് എത്താതിരുന്നതോടെയാണ് സഹപ്രവര്‍ത്തകര്‍ക്ക് സംശയം തോന്നിയത്. ഫോണില്‍ ബന്ധപ്പെടാന്‍ പലതവണ ശ്രമിച്ചെങ്കിലും പ്രതികരണമുണ്ടായില്ല. തുടര്‍ന്ന് സഹപ്രവര്‍ത്തകര്‍ നടത്തിയ അന്വേഷണത്തിലാണ് അല്‍ സൈറയില്‍ നിര്‍ത്തിയിട്ടിരുന്ന ട്രക്ക് കണ്ടെത്തിയത്.
വാഹനം പരിശോധിച്ചപ്പോഴാണ് പ്രഭാകറിനെ മരിച്ച നിലയില്‍ കണ്ടെത്തിയത്. തുടര്‍ന്ന് വിവരം അല്‍ സൈറ പോലീസ് സ്റ്റേഷനില്‍ അറിയിച്ചു. പോലീസും ഫോറന്‍സിക് വിഭാഗവും സ്ഥലത്തെത്തി പരിശോധന നടത്തി. മെഡിക്കല്‍ പരിശോധനാ റിപ്പോര്‍ട്ടിന്റെ അടിസ്ഥാനത്തില്‍ ഹൃദയാഘാതമാണ് മരണകാരണമെന്ന് സ്ഥിരീകരിച്ചു. കഴിഞ്ഞ ആഴ്ചയാണ് മരണം സംഭവിച്ചത്.
പോലീസ് സ്റ്റേഷനില്‍ നിന്ന് വിവരമറിഞ്ഞതിനെ തുടര്‍ന്ന് ഹഫര്‍ അല്‍ ബാത്തിന്‍ ഒ.ഐ.സി.സി. പ്രസിഡന്റ് വിബിന്‍ മറ്റത്തിന്റെ നേതൃത്വത്തില്‍, ഇന്ത്യന്‍ എംബസിയുടെ സഹകരണത്തോടെ ആവശ്യമായ നിയമനടപടികള്‍ പൂര്‍ത്തിയാക്കി മൃതദേഹം നാട്ടിലെത്തിച്ചു. എംബാമിംഗ്, ട്രാന്‍സ്‌പോര്‍ട്ടേഷന്‍ ഉള്‍പ്പെടെയുള്ള ചെലവുകള്‍ പ്രഭാകര്‍ ജോലി ചെയ്തിരുന്ന കമ്പനിയാണ് വഹിച്ചത്. ചെന്നൈ വിമാനത്താവളത്തിലെത്തിച്ച മൃതദേഹം ബന്ധുക്കള്‍ ഏറ്റുവാങ്ങി.
പളനിവേലാണ് പ്രഭാകറിന്റെ പിതാവ്, മാതാവ്: വേലായു, ഭാര്യ: യോഗലക്ഷ്മി, മക്കള്‍: മണികണ്ഠന്‍, മനോജ് കുമാര്‍.
.jpg)
Related News
