വാഷിങ്ടണ്‍: 250 ദിവസത്തിലധികമായി കടലില്‍ തുടരുന്ന യു.എസ്. നാവികസേനയുടെ വിമാനവാഹിനിക്കപ്പലായ 'യു.എസ്.എസ്. അബ്രഹാം ലിങ്കണി'ലെ ദയനീയ സാഹചര്യങ്ങളില്‍ പ്രതിരോധ സെക്രട്ടറി പിറ്റ് ഹെഗ്‌സെത്തിനും ആക്ടിങ് നേവി സെക്രട്ടറി ഹങ് കാവോയ്ക്കും എതിരെ യു.എസ്. സെനറ്റര്‍ റിചാര്‍ഡ് ബ്ലൂമെന്റല്‍ രംഗത്ത്. കപ്പലിലെ ജീവനക്കാരുടെ ദുരിതങ്ങള്‍ ചൂണ്ടിക്കാട്ടി അദ്ദേഹം ഔദ്യോഗികമായി വിശദീകരണം ആവശ്യപ്പെട്ടു.

തുര്‍ക്കി വാര്‍ത്താ ഏജന്‍സിയായ അനമറീഹൗ പുറത്തുവിട്ട വിവരങ്ങള്‍ പ്രകാരം, 2025 നവംബര്‍ 21-നാണ് ഏഴ് മാസം മാത്രം നീളേണ്ട ദൗത്യത്തിനായി കപ്പല്‍ സാന്‍ ഡീഗോ നാവല്‍ ബേസില്‍ നിന്നും പുറപ്പെട്ടത്. മെയ് മാസത്തില്‍ അവസാനിക്കേണ്ടിയിരുന്ന ദൗത്യം പിന്നീട് നീട്ടുകയായിരുന്നു. നിലവില്‍ കപ്പലിന്റെ മടക്കയാത്രയെക്കുറിച്ച് യാതൊരു ഔദ്യോഗിക അറിയിപ്പും നല്‍കിയിട്ടില്ല. മാത്രമല്ല, തുറമുഖങ്ങളില്‍ അടുപ്പിക്കാതെ 200 ദിവസത്തിലേറെയായി കപ്പല്‍ കടലില്‍ തുടരുന്നത് ചരിത്രത്തിലെ തന്നെ റെക്കോര്‍ഡാണ്.

ശുദ്ധജല ലഭ്യതക്കുറവ്, ജലമലിനീകരണം, പ്ലംബിങ് തകരാറുകള്‍, ശുചിമുറി-ലോണ്‍ട്രി സൗകര്യങ്ങളിലെ പ്രശ്‌നങ്ങള്‍, പൂപ്പല്‍ ബാധ തുടങ്ങിയവയാണ്
കപ്പലിലെ പ്രധാന പ്രശ്‌നങ്ങള്‍. നീണ്ട നാളത്തെ കടല്‍വാസം കാരണം ക്രൂ അംഗങ്ങളുടെ മാനസികാര്യം തകര്‍ന്നു. കപ്പലില്‍ നിന്ന് ജീവനക്കാര്‍ കടലിലേക്ക് ചാടാന്‍ ശ്രമിച്ചതായി 'നേവി ടൈംസ്', 'സ്റ്റാര്‍സ് ആന്‍ഡ് സ്‌ട്രൈപ്‌സ്' തുടങ്ങിയ മാധ്യമങ്ങള്‍ റിപ്പോര്‍ട്ട് ചെയ്യുന്നു.

മെയില്‍ സംവിധാനത്തിലെ താളപ്പിഴകള്‍ കാരണം ജീവനക്കാര്‍ക്കുള്ള അവശ്യ സാധനങ്ങളും കെയര്‍ പാക്കേജുകളും മാസങ്ങളായി എത്തിച്ചേരുന്നില്ല. അങ്ങേയറ്റം അപകടാവസ്ഥയുള്ള ജെറ്റ് എന്‍ജിനുകള്‍, ഇന്ധനം, ആയുധങ്ങള്‍ എന്നിവയ്ക്ക് സമീപം ജോലി ചെയ്യുന്ന നാവികര്‍ കടുത്ത മാനസിക-ശാരീരിക ക്ഷീണത്തിലാണെന്നും ഇത് വലിയ അപകടങ്ങള്‍ക്ക് കാരണമായേക്കാമെന്നും സെനറ്റര്‍ മുന്നറിയിപ്പ് നല്‍കി.

ഇറാനുമായുള്ള സൈനിക നടപടികളുടെ പശ്ചാത്തലത്തില്‍ മിഡില്‍ ഈസ്റ്റില്‍ അമേരിക്കന്‍ നാവിക സാന്നിധ്യം നീണ്ടുപോകുന്നതാണ് കപ്പലിന്റെ ദൗത്യം അനന്തമായി നീളാന്‍ കാരണം. കപ്പലിലെ 5,000-ത്തോളം വരുന്ന നാവികരുടെയും മറൈന്‍ സൈനികരുടെയും ക്ഷേമവും സുരക്ഷയും അവഗണിച്ച് കൊണ്ടുള്ള ഇത്തരം നീക്കങ്ങള്‍ നാവികസേനയുടെ ഭാവി പ്രവര്‍ത്തനക്ഷമതയെ ബാധിക്കുമെന്ന് സെനറ്റര്‍ ബ്ലൂമെന്റല്‍ സെനറ്റ് ആംഡ് സര്‍വീസസ് കമ്മിറ്റിക്ക് അയച്ച കത്തില്‍ വ്യക്തമാക്കി.

ഈ ദൗത്യവുമായി ബന്ധപ്പെട്ട് കപ്പലിലെ ജീവനക്കാരുടെ മാനസികാരോഗ്യം, ക്ഷീണം, സുരക്ഷാ പ്രശ്‌നങ്ങള്‍, അടിയന്തര സാഹചര്യങ്ങള്‍ എന്നിവ നിരീക്ഷിക്കാന്‍ സ്വീകരിച്ച നടപടികളെക്കുറിച്ചും, ദൗത്യം ഇനിയും നീളുന്നതിന്റെ കൃത്യമായ സൈനിക ലക്ഷ്യങ്ങളെക്കുറിച്ചും വ്യക്തത വരുത്താന്‍ പെന്റഗണോട് സെനറ്റര്‍ ആവശ്യപ്പെട്ടിട്ടുണ്ട്.