റിയാദ്: പ്രാദേശിക കര്ഷകരെയും ഉല്പ്പന്നങ്ങളെയും പിന്തുണയ്ക്കുന്നതിനും തദ്ദേശീയമായ ഉല്പ്പന്നങ്ങളുടെ ഗുണനിലവാരം പ്രദര്ശിപ്പിക്കുന്നതിനുമായി റിയാദില് അല്-റബ്വ ഈന്തപ്പഴ സീസണിന് ശനിയാഴ്ച തുടക്കമാകും. കാര്ഷിക സേവനങ്ങള്ക്കായുള്ള നാഷണല് കമ്പനിയുടെ ആഭിമുഖ്യത്തിലാണ് മേള സംഘടിപ്പിക്കുന്നത്. വിവിധ പരിപാടികളിലൂടെ പ്രാദേശിക കര്ഷകര്ക്കും പ്രദര്ശകര്ക്കും പിന്തുണയേകാനും ഈ മേഖലയിലെ വില്പ്പന ഉത്തേജിപ്പിക്കാനുമാണ് മേള ലക്ഷ്യമിടുന്നത്.
അല്-റബ്വ മാര്ക്കറ്റില് സെപ്റ്റംബര് 28 വരെയാണ് മേള നടക്കുക. ഈന്തപ്പഴങ്ങളും മറ്റ് കാര്ഷിക, സംസ്കരിച്ച ഉല്പ്പന്നങ്ങളും പ്രദര്ശിപ്പിക്കുന്നതിനും വില്ക്കുന്നതിനുമായി പ്രത്യേക മേഖലയും ഇതില് ഒരുക്കിയിട്ടുണ്ട്. ഇത് കര്ഷകര്ക്കും പ്രാദേശിക ഉല്പ്പാദകര്ക്കും മികച്ച വിപണന സാധ്യതകളാണ് തുറന്നുനല്കുന്നത്. റിയാദിലെ പൗരന്മാര്ക്കും താമസക്കാര്ക്കും തദ്ദേശീയമായി ഉല്പ്പാദിപ്പിക്കുന്ന വൈവിധ്യമാര്ന്ന ഈന്തപ്പഴങ്ങള് ഇവിടെ നിന്നും പരിചയപ്പെടാനും വാങ്ങാനും സാധിക്കും.
ഇത്തരം കാലാനുസൃതമായ പരിപാടികള് സൗദി കയറ്റുമതിയുടെ മൂല്യം വര്ദ്ധിപ്പിക്കുന്നതിനും പ്രാദേശിക നിക്ഷേപങ്ങളെ പ്രോത്സാഹിപ്പിക്കുന്നതിനും ഈന്തപ്പഴ അടിസ്ഥാന ഉല്പ്പന്നങ്ങള് വികസിപ്പിക്കാന് കമ്പനികള്ക്ക് അവസരമൊരുക്കുന്നതിനും സഹായിക്കുമെന്ന് നാഷണല് കമ്പനി വ്യക്തമാക്കി. കര്ഷകരെയും ഉല്പ്പാദകരെയും പിന്തുണയ്ക്കുക, സൗദി ഈന്തപ്പഴങ്ങളെ പ്രോത്സാഹിപ്പിക്കുക, അവയുടെ ഗുണനിലവാരവും വൈവിധ്യവും ലോകത്തിന് മുന്നില് അവതരിപ്പിക്കുക എന്നിവയാണ് ഈ പദ്ധതിയുടെ ലക്ഷ്യങ്ങള്. കാര്ഷിക മേഖലയെ ശക്തിപ്പെടുത്തുന്നതിനും ദേശീയ സമ്പദ്വ്യവസ്ഥയിലേക്കുള്ള അതിന്റെ സംഭാവന വര്ദ്ധിപ്പിക്കുന്നതിനുമുള്ള സൗദി വിഷന് 2030 ലക്ഷ്യങ്ങളുമായി ഒത്തുപോകുന്നതാണ് ഈ ഉദ്യമം.
സൗദി അറേബ്യ തങ്ങളുടെ കാര്ഷിക കയറ്റുമതി വ്യാപിപ്പിക്കുകയും ആഗോള ഈന്തപ്പഴ ഉല്പ്പാദകന് എന്ന നിലയിലുള്ള സ്ഥാനം ശക്തിപ്പെടുത്തുകയും ചെയ്യുന്ന പശ്ചാത്തലത്തില്, റിയാദില് നടക്കുന്ന ഇത്തരം പ്രദര്ശനങ്ങള് കാര്ഷിക മേഖലയിലെ സുസ്ഥിര വളര്ച്ചയ്ക്കും സാമ്പത്തിക അവസരങ്ങള്ക്കും വലിയ പിന്തുണയാണ് നല്കുന്നത്. 37 ദശലക്ഷത്തിലധികം ഈന്തപ്പനകളുള്ള സൗദി അറേബ്യ പ്രതിവര്ഷം 1.9 ദശലക്ഷത്തിലധികം ടണ് ഈന്തപ്പഴമാണ് ഉല്പ്പാദിപ്പിക്കുന്നത്. ഇത് ആഭ്യന്തര ആവശ്യങ്ങള് നിറവേറ്റുന്നതിനൊപ്പം ആഗോള വിപണിയിലേക്കുള്ള കയറ്റുമതിക്കും കരുത്ത് പകരുന്നു.
Related News
