കീവ്: ഉക്രെയ്‌നിലുടനീളം റഷ്യ നടത്തിയ വ്യോമാക്രമണങ്ങളില്‍ കുറഞ്ഞത് ഒമ്പത് പേര്‍ കൊല്ലപ്പെടുകയും ഡസന്‍ കണക്കിന് പേര്‍ക്ക് പരിക്കേല്‍ക്കുകയും ചെയ്തതായി ചൊവ്വാഴ്ച അധികൃതര്‍ അറിയിച്ചു. ഉത്തര കൊറിയയില്‍ നിന്ന് റഷ്യ കൂടുതല്‍ ബാലിസ്റ്റിക് മിസൈലുകള്‍ കൈപ്പറ്റിയതായി ഉക്രെയ്ന്‍ മുന്നറിയിപ്പ് നല്‍കിയതിന് തൊട്ടുപിന്നാലെയാണ് ഈ ആക്രമണങ്ങള്‍.
കീവ്, സപോറീഷ്യ, ഡ്‌നിപ്രോപെട്രോവ്‌സ്‌ക് എന്നീ മേഖലകളെ ലക്ഷ്യമിട്ടായിരുന്നു ആക്രമണങ്ങള്‍. കീവിലും സപോറീഷ്യയിലുമുള്ള സൈനിക-വ്യവസായ സ്ഥാപനങ്ങളും ഗതാഗത കേന്ദ്രങ്ങളും ലക്ഷ്യമിട്ട് കരയില്‍നിന്നുള്ള കൃത്യതയുള്ള ആയുധങ്ങള്‍ ഉപയോഗിച്ച് ഗ്രൂപ്പ് സ്‌ട്രൈക്ക് നടത്തിയതായി റഷ്യന്‍ പ്രതിരോധ മന്ത്രാലയം അവകാശപ്പെട്ടു.
സപോറീഷ്യയില്‍ മിസൈലുകളും ഗൈഡഡ് വ്യോമ ബോംബുകളും ഉപയോഗിച്ച് റഷ്യന്‍ സേന വന്‍ ആക്രമണം നടത്തിയതായി പ്രാദേശിക മിലിട്ടറി അഡ്മിനിസ്‌ട്രേഷന്‍ മേധാവി ഇവാന്‍ ഫെഡോറോവ് അറിയിച്ചു. ആക്രമണത്തില്‍ ആറ് പേര്‍ കൊല്ലപ്പെടുകയും 19 പേര്‍ക്ക് പരിക്കേല്‍ക്കുകയും ചെയ്തു.
കിഴക്കന്‍ ഡ്‌നിപ്രോപെട്രോവ്‌സ്‌ക് മേഖലയിലെ അഞ്ച് ജില്ലകളില്‍ റഷ്യ നടത്തിയ ഡ്രോണ്‍, പീരങ്കി ആക്രമണങ്ങളില്‍ മൂന്ന് പേര്‍ കൊല്ലപ്പെടുകയും അഞ്ച് പേര്‍ക്ക് പരിക്കേല്‍ക്കുകയും ചെയ്തതായി ഭരണകൂട തലവന്‍ ഒലെക്‌സാണ്ടര്‍ ഗാഞ്ച ടെലിഗ്രാമിലൂടെ വ്യക്തമാക്കി.
തലസ്ഥാനമായ കീവില്‍ അര്‍ദ്ധരാത്രിക്ക് ശേഷം ശക്തമായ സ്‌ഫോടന ശബ്ദങ്ങള്‍ കേട്ടതായി വാര്‍ത്താ ഏജന്‍സിയായ എ.എഫ്.പി റിപ്പോര്‍ട്ട് ചെയ്തു. കീവിന് നേരെ ബാലിസ്റ്റിക് മിസൈല്‍ ആക്രമണമാണ് നടന്നതെന്ന് മേയര്‍ വിറ്റാലി ക്ലിറ്റ്ഷ്‌കോ അറിയിച്ചു. ആക്രമണത്തില്‍ ഒരു വെയര്‍ഹൗസിന് തീപിടിക്കുകയും ഒരാള്‍ക്ക് പരിക്കേല്‍ക്കുകയും ചെയ്തു.
റഷ്യ കൂടുതല്‍ ഉത്തര കൊറിയന്‍ സൈനികരെ വിന്യസിക്കാന്‍ ഒരുങ്ങുകയാണെന്നും പ്യോങ്യാംഗില്‍ നിന്ന് പുതിയ ബാലിസ്റ്റിക് മിസൈലുകള്‍ കൈപ്പറ്റിയിട്ടുണ്ടെന്നും ഉക്രെയ്ന്‍ പ്രസിഡന്റ് വോളോഡിമിര്‍ സെലെന്‍സ്‌കി നേരത്തെ വ്യക്തമാക്കിയിരുന്നു.
യു.എസ് നിര്‍മ്മിത പേട്രിയറ്റ് ഉള്‍പ്പെടെയുള്ള ചില പ്രത്യേക വ്യോമപ്രതിരോധ സംവിധാനങ്ങള്‍ക്ക് മാത്രമേ ബാലിസ്റ്റിക് മിസൈലുകളെ പ്രതിരോധിക്കാന്‍ സാധിക്കൂ. എന്നാല്‍, ഫെബ്രുവരിയില്‍ അമേരിക്കയും ഇസ്രായേലും ഇറാന് നേരെ ആരംഭിച്ച യുദ്ധത്തെ തുടര്‍ന്ന് പി.എ.സി-3 ഇന്റര്‍സെപ്റ്ററുകളുടെ ലഭ്യതക്കുറവ് രൂക്ഷമായിട്ടുണ്ട്. അതേസമയം, അതിര്‍ത്തിയില്‍ നിന്ന് അകലെയുള്ള റഷ്യന്‍ നഗരങ്ങള്‍ക്ക് നേരെയുള്ള ആക്രമണം ഉക്രെയ്‌നും ശക്തമാക്കിയിട്ടുണ്ട്.
.jpg)
Related News
