കുവൈറ്റ് സിറ്റി: പുതിയ മന്ത്രിതല ഉത്തരവിലെ വ്യവസ്ഥകള്‍ പാലിക്കാത്തതിനെത്തുടര്‍ന്ന്, കുവൈറ്റില്‍ സന്ദര്‍ശക വിസകള്‍ റെസിഡന്‍സി പെര്‍മിറ്റുകളാക്കി മാറ്റുന്നതിനായി സമര്‍പ്പിച്ച നൂറുകണക്കിന് അപേക്ഷകള്‍ തള്ളി. പുതിയ നിയമങ്ങള്‍ എല്ലാ സന്ദര്‍ശകര്‍ക്കും ബാധകമാണെന്ന് തെറ്റിദ്ധരിച്ച് രാജ്യത്തെ ആറ് ഗവര്‍ണറേറ്റുകളിലെയും റസിഡന്‍സി അഫയേഴ്‌സ് വകുപ്പുകളില്‍ നിരവധി പ്രവാസികളാണ് അപേക്ഷ സമര്‍പ്പിച്ചത്. എന്നാല്‍ പല അപേക്ഷകരും ആവശ്യമായ നിബന്ധനകള്‍ പാലിച്ചിട്ടില്ലാത്തതിനാല്‍ അധികൃതര്‍ അപേക്ഷകള്‍ നിരസിക്കുകയായിരുന്നു. മറ്റു ചില അപേക്ഷകള്‍ ബന്ധപ്പെട്ട അധികാരികളുടെ അനുമതിക്കായി പരിശോധനയിലാണ്.

ആര്‍ട്ടിക്കിള്‍ 17, 18, 20, 22 പ്രകാരമുള്ള വിസ മാറ്റങ്ങള്‍ എല്ലാ പ്രവാസികള്‍ക്കും ദേശീയതകള്‍ക്കും ലഭ്യമാക്കില്ല. ഓരോ കേസും വ്യക്തിഗതമായി പരിശോധിച്ച് ജനറല്‍ ഡിപ്പാര്‍ട്ട്‌മെന്റ് ഓഫ് റെസിഡന്‍സി അഫയേഴ്‌സ് ഡയറക്ടര്‍ ജനറലിന്റെ അനുമതിക്കനുസൃതമായി മാത്രമായിരിക്കും അനുവദിക്കുക. ചില വിഭാഗങ്ങള്‍ക്ക് ആഭ്യന്തര മന്ത്രാലയത്തിലെ ഉയര്‍ന്ന ഉദ്യോഗസ്ഥരുടെ പ്രത്യേക അനുമതിയും ആവശ്യമാണ്.

പുതിയ നിയമപ്രകാരം പങ്കാളികള്‍, 18 വയസ്സിന് താഴെയുള്ള ആണ്‍മക്കള്‍, 21 വയസ്സിന് താഴെയുള്ള പെണ്‍മക്കള്‍ എന്നിവരുടെ സന്ദര്‍ശക വീസകള്‍ റെസിഡന്‍സിയാക്കി മാറ്റാന്‍ സ്‌പോണ്‍സര്‍ ചെയ്യുന്നയാള്‍ക്ക് കുറഞ്ഞത് 800 കുവൈറ്റ് ദിനാര്‍ പ്രതിമാസ ശമ്പളം ഉണ്ടായിരിക്കണം. ഇതിനു പുറമെ കണ്‍വേര്‍ഷന്‍ ഫീസും ആരോഗ്യ ഇന്‍ഷുറന്‍സ്, റെസിഡന്‍സി ഫീസുകളും ഒടുക്കണം. അമ്മയ്ക്ക് ഇതിനകം സാധുവായ റെസിഡന്‍സി ഉള്ള പക്ഷം 5 വയസ്സിന് താഴെയുള്ള കുട്ടികളെ കൊണ്ടുവരുന്ന മാതാപിതാക്കള്‍, ഒരു വര്‍ഷത്തില്‍ താഴെ മാത്രം കാലാവധി കഴിഞ്ഞ റെസിഡന്‍സിയുള്ള ഭാര്യമാരെ സ്‌പോണ്‍സര്‍ ചെയ്യുന്ന ഭര്‍ത്താക്കന്മാര്‍ തുടങ്ങിയവര്‍ക്ക് ഔദ്യോഗിക അനുമതിയോടെ ചില ഇളവുകള്‍ അനുവദിക്കും.

തൊഴില്‍ വിസകളിലേക്കുള്ള മാറ്റം:

പങ്കാളികളുടെയും കുട്ടികളുടെയും പേരിലുള്ള സന്ദര്‍ശക വിസകള്‍ ആര്‍ട്ടിക്കിള്‍ 18 പ്രകാരമുള്ള തൊഴില്‍ വിസകളിലേക്ക് മാറ്റാന്‍ സാധിക്കില്ല. സര്‍ക്കാര്‍ വിസകളില്‍ കുവൈറ്റിലെത്തി ഉയര്‍ന്ന വിദ്യാഭ്യാസ യോഗ്യതയോ പ്രത്യേക സാങ്കേതിക കഴിവുകളോ ഉള്ളവര്‍ക്കും, നിലവിലുള്ള ചട്ടങ്ങള്‍ക്ക് വിധേയമായ ചില ഗാര്‍ഹിക തൊഴിലാളികള്‍ക്കും മാത്രമാണ് തൊഴില്‍ റെസിഡന്‍സിയിലേക്ക് മാറാന്‍ അനുമതിയുള്ളത്. തൊഴില്‍ വിപണിയുടെ ആവശ്യകതകളും പുതിയ മന്ത്രിതല ഉത്തരവിലെ വ്യവസ്ഥകളും അടിസ്ഥാനമാക്കിയായിരിക്കും വരും ദിവസങ്ങളിലും എല്ലാ അപേക്ഷകളും വിലയിരുത്തുകയെന്ന് അധികൃതര്‍ വ്യക്തമാക്കി.