റിയാദ്: വിശുദ്ധ ഖുര്‍ആന്‍ മനഃപാഠമാക്കല്‍, പാരായണം, വ്യാഖ്യാനം എന്നിവയ്ക്കായുള്ള പ്രശസ്തമായ കിംഗ് അബ്ദുല്‍ അസീസ് അന്താരാഷ്ട്ര മല്‍സരത്തിന്റെ 46-ാം പതിപ്പിന് മക്കയില്‍ തുടക്കമായി. നാല് പതിറ്റാണ്ടിലേറെ പഴക്കമുള്ള മല്‍സരത്തിന്റെ ചരിത്രത്തിലെ ഏറ്റവും വലിയ പങ്കാളിത്തമാണ് ഇത്തവണത്തേത്. 133 രാജ്യങ്ങളില്‍ നിന്നായി 334 മല്‍സരാര്‍ത്ഥികളാണ് പരിപാടിയില്‍ മാറ്റുരയ്ക്കുന്നത്. തിരുഗേഹങ്ങളുടെ സേവകന്‍ സല്‍മാന്‍ രാജാവിന്റെ രക്ഷാകര്‍തൃത്വത്തില്‍, ഇസ്ലാമിക കാര്യ മന്ത്രാലയത്തിന്റെ നേതൃത്വത്തിലാണ് മല്‍സരം സംഘടിപ്പിച്ചിരിക്കുന്നത്. ആഗസ്റ്റ് 6 മുതല്‍ 19 വരെയാണ് മല്‍സരങ്ങള്‍ നടക്കുന്നത്. മല്‍സര ചരിത്രത്തില്‍ ആദ്യമായി വനിതാ വിഭാഗത്തിന് മാത്രമായി പ്രത്യേക മല്‍സരവും സമാപന ചടങ്ങും മക്കയിലെ ഹില്‍ട്ടണ്‍ കണ്‍വെന്‍ഷന്‍ ഹോട്ടലില്‍ നടക്കുന്നുവെന്നത് ഇത്തവണത്തെ പ്രധാന പ്രത്യേകതയാണ്. അന്താരാഷ്ട്ര തലത്തിലുള്ള വളര്‍ച്ചയും സമൂഹത്തില്‍ സ്ത്രീകള്‍ക്ക് നല്‍കുന്ന പ്രാധാന്യവുമാണ് ഇത് വ്യക്തമാക്കുന്നത്.

102.6 ലക്ഷം സൗദി റിയാല്‍ (ഏകദേശം 2.74 ദശലക്ഷം യു.എസ് ഡോളര്‍) ആണ് സമ്മാനത്തുക. മല്‍സര ചരിത്രത്തിലെ ഏറ്റവും വലിയ സമ്മാനത്തുകയാണിത്. മക്കയിലെ ഗ്രാന്‍ഡ് മോസ്‌ക് (പുരുഷ വിഭാഗം ഫൈനലും സമാപനവും), ഹില്‍ട്ടണ്‍ കണ്‍വെന്‍ഷന്‍ ഹോട്ടല്‍ (വനിതാ വിഭാഗം മല്‍സരങ്ങളും സമാപനവും) ആണ് വേദികള്‍.

യുവാക്കളായ മുസ്ലിം യുവതീ-യുവാക്കളെ ഖുര്‍ആന്‍ പഠനത്തിലേക്കും മനഃപാഠമാക്കുന്നതിലേക്കും ആകര്‍ഷിക്കുക, ഗ്രന്ഥത്തോടുള്ള ആത്മബന്ധം വളര്‍ത്തുക, സൗദി അറേബ്യയുടെ ഇസ്ലാമിക സേവനങ്ങള്‍ ലോകത്തിന് മുന്നില്‍ അടയാളപ്പെടുത്തുക എന്നിവയാണ് ഈ മല്‍സരത്തിന്റെ പ്രധാന ലക്ഷ്യങ്ങളെന്ന് സംഘാടകര്‍ വ്യക്തമാക്കി.

അഞ്ച് വ്യത്യസ്ത വിഭാഗങ്ങളിലായാണ് മല്‍സരങ്ങള്‍ നടക്കുന്നത്: ഏഴ് ആധികാരിക പാരായണരീതികളോടെയുള്ള (ഏഴ് കിറാഅത്തുകള്‍) സമ്പൂര്‍ണ്ണ ഖുര്‍ആന്‍ മനഃപാഠം. ഖുര്‍ആന്‍ പൂര്‍ണ്ണമായി മനഃപാഠമാക്കുന്നതോടൊപ്പം പദങ്ങളുടെ വ്യാഖ്യാനവും സഹിതം. സമ്പൂര്‍ണ്ണ ഖുര്‍ആന്‍ മനഃപാഠം. ഖുര്‍ആനിലെ 15 ജുസ്ഉകള്‍ (ഭാഗങ്ങള്‍) മനഃപാഠം. തുടര്‍ച്ചയായ 5 ജുസ്ഉകള്‍ (ഭാഗങ്ങള്‍) മനഃപാഠം.

ഗ്രാന്‍ഡ് മോസ്‌കിന് സമീപമാണ് ഡെലിഗേഷനുകള്‍ക്ക് താമസ സൗകര്യം ഒരുക്കിയിട്ടുള്ളത്. ഇതിനുപുറമെ, മക്കയിലെയും മദീനയിലെയും ചരിത്രപ്രധാനമായ സ്ഥലങ്ങള്‍ സന്ദര്‍ശിക്കാനുള്ള അവസരവും സാംസ്‌കാരിക പരിപാടികളും സംഘാടര്‍ ഒരുക്കിയിട്ടുണ്ട്. കഴിഞ്ഞ വര്‍ഷം നടന്ന 45-ാം പതിപ്പില്‍ ചാഡില്‍ നിന്നുള്ള മുഹമ്മദ് ആദം മുഹമ്മദ് ഒന്നാം സ്ഥാനം നേടി 1,33,151 ഡോളര്‍ സമ്മാനത്തുക സ്വന്തമാക്കിയിരുന്നു. സൗദി അറേബ്യയുടെ അനസ് ബിന്‍ മാജിദ് അബ്ദുല്ല അല്‍-ഹാസ്മി രണ്ടാം സ്ഥാനവും, നൈജീരിയയുടെ സനുസി ബുഖാരി ഇദ്രീസ് മൂന്നാം സ്ഥാനവും കരസ്ഥമാക്കിയിരുന്നു.