റിയാദ്: താമസ, തൊഴില്‍, അതിര്‍ത്തി സുരക്ഷാ നിയമങ്ങള്‍ ലംഘിച്ചതിന് സൗദിയില്‍ ഒരു ആഴ്ചയ്ക്കിടെ 14,970 പേര്‍ അറസ്റ്റില്‍. ഇഖാമ നിയമങ്ങള്‍ ലംഘിച്ചതിന് 7,103 പേരും, അതിര്‍ത്തി കടക്കാന്‍ അനധികൃതമായി ശ്രമിച്ചതിന് 3,654 പേരും, തൊഴില്‍ നിയമ ലംഘനങ്ങളുടെ പേരില്‍ 3,397 പേരുമാണ് പിടിയിലായത്.

രാജ്യത്തേക്ക് അനധികൃതമായി പ്രവേശിക്കാന്‍ ശ്രമിക്കുന്നതിനിടയില്‍ പിടിയിലായ 1,418 പേരില്‍ 54 ശതമാനം പേര്‍ എത്യോപ്യക്കാരും 45 ശതമാനം പേര്‍ യെമന്‍ പൗരന്മാരും ബാക്കി 1 ശതമാനം പേര്‍ മറ്റ് രാജ്യക്കാരുമാണെന്നും ഔദ്യോഗിക റിപ്പോര്‍ട്ട് വ്യക്തമാക്കുന്നു. അയല്‍രാജ്യങ്ങളിലേക്ക് അതിര്‍ത്തി കടക്കാന്‍ ശ്രമിച്ച 23 പേരും, നിയമലംഘകര്‍ക്ക് യാത്രാസൗകര്യവും പാര്‍പ്പിടവും ഒരുക്കി നല്‍കിയതിന് 17 പേരും പിടിയിലായിട്ടുണ്ട്.

അനധികൃതമായി രാജ്യത്തേക്ക് പ്രവേശിക്കാന്‍ സഹായിക്കുന്നവര്‍ക്കും, വാഹനം അല്ലെങ്കില്‍ അഭയം നല്‍കുന്നവര്‍ക്കും പരമാവധി 15 വര്‍ഷം വരെ തടവും 10 ലക്ഷം സൗദി റിയാല്‍ വരെ പിഴയും ലഭിക്കാമെന്നും, കുറ്റകൃത്യത്തിന് ഉപയോഗിക്കുന്ന വാഹനങ്ങളും സ്വത്തുക്കളും കണ്ടുകെട്ടുമെന്നും ആഭ്യന്തര മന്ത്രാലയം മുന്നറിയിപ്പ് നല്‍കി.

നിയമലംഘനങ്ങള്‍ ശ്രദ്ധയില്‍ പെട്ടാല്‍ മക്ക, റിയാദ് മേഖലകളില്‍ 911 എന്ന ടോള്‍ ഫ്രീ നമ്പറിലും, രാജ്യത്തെ മറ്റ് പ്രദേശങ്ങളില്‍ 999 അല്ലെങ്കില്‍ 996 എന്നീ നമ്പറുകളിലും ബന്ധപ്പെട്ട് വിവരം അറിയിക്കാവുന്നതാണ്.