വാഷിംഗ്ടണ്: ഗാസയില് ഹമാസിന്റെ പൂര്ണ്ണമായ നിരായുധീകരണത്തിന് ധാരണയായതായി യു.എസ് പ്രസിഡന്റ് ഡൊണാള്ഡ് ട്രംപ് പ്രഖ്യാപിച്ചു. പുതിയ ഫലസ്തീന് ഗവണ്മെന്റിന്റെ രൂപീകരണത്തിലേക്കുള്ള നിര്ണ്ണായക ചുവടുവെയ്പ്പാണ് ഇതെന്നും അദ്ദേഹം വിശേഷിപ്പിച്ചു. കരാറിനെക്കുറിച്ച് ഹമാസിന്റെ ഭാഗത്തുനിന്ന് ഉടനടി ഔദ്യോഗിക പ്രതികരണങ്ങളൊന്നും ഉണ്ടായിട്ടില്ല. എങ്കിലും, ആയുധങ്ങള് ഉപേക്ഷിക്കുന്നതുമായി ബന്ധപ്പെട്ട ചര്ച്ചകള് പുരോഗമിക്കുകയാണെന്ന് കെയ്റോയിലെ മാധ്യസ്ഥരുമായി ബന്ധപ്പെട്ട വൃത്തങ്ങള് വെളിപ്പെടുത്തി.
ഹമാസിന്റെയും ഗാസയിലെ മറ്റ് സായുധ സംഘങ്ങളുടെയും പൂര്ണ്ണമായ നിരായുധീകരണത്തിനായി 'ബോര്ഡ് ഓഫ് പീസ്' ചരിത്രപരമായ ഒരു കരാറിലെത്തിയിരിക്കുന്നുവെന്ന് ട്രംപ് തന്റെ ട്രൂത്ത് സോഷ്യല് പ്ലാറ്റ്ഫോമില് കുറിച്ചു. ശാശ്വത സമാധാനത്തിനും സുരക്ഷയ്ക്കും വേണ്ടിയുള്ള വലിയൊരു ചുവടുവെയ്പ്പാണിതെന്നും ഘട്ടംഘട്ടമായാണ് നിരായുധീകരണം നടപ്പിലാക്കുകയെന്നും അദ്ദേഹം കൂട്ടിച്ചേര്ത്തു.
നിരായുധീകരണം പൂര്ത്തിയാകുന്ന മുറയ്ക്ക് ഇസ്രായേല് സേന പിന്മാറ്റം നടത്തും. തുടര്ന്ന് അന്താരാഷ്ട്ര സമാധാന സേനയും പുതിയ ഫലസ്തീന് പോലീസ് സേനയും ചേര്ന്ന് ഗാസയിലെ ജനങ്ങളുടെയും അയല്രാജ്യങ്ങളുടെയും സുരക്ഷ ഉറപ്പാക്കുമെന്നും ട്രംപ് വ്യക്തമാക്കി. ഈ ശ്രമങ്ങളില് പങ്കാളികളായ ഈജിപ്ത്, ഖത്തര്, തുര്ക്കി എന്നീ രാജ്യങ്ങളിലെ മാധ്യസ്ഥര്ക്കും അദ്ദേഹം നന്ദി അറിയിച്ചു.
ഒക്ടോബര് മുതല് ഇസ്രായേലും ഹമാസും തമ്മില് നിലവിലുള്ള വെടിനിര്ത്തല് കരാറിലെ പ്രധാന തര്ക്കവിഷയങ്ങളിലൊന്നായിരുന്നു ഹമാസിന്റെ നിരായുധീകരണം. വെടിനിര്ത്തല് നിലവിലുണ്ടെങ്കിലും ഗാസയില് ആക്രമണങ്ങള് തുടരുകയാണ്. വ്യാഴാഴ്ചയുണ്ടായ ഇസ്രായേല് വ്യോമാക്രമണത്തില് രണ്ട് കുട്ടികള് ഉള്പ്പെടെ കുറഞ്ഞത് നാല് പേര് കൊല്ലപ്പെട്ടതായി ആരോഗ്യവകുപ്പ് അധികൃതര് അറിയിച്ചു.
അതേസമയം, ഗാസ വെടിനിര്ത്തല് ചര്ച്ചകളിലെ മാധ്യസ്ഥരുടെ യോഗം കെയ്റോയില് ഉടന് ചേരുമെന്ന് ഈജിപ്ഷ്യന് വാര്ത്താ ഏജന്സിയായ അല്-ഖാഹിറ ന്യൂസ് റിപ്പോര്ട്ട് ചെയ്തു. യു.എസ്, ഖത്തര്, തുര്ക്കിയ തുടങ്ങിയ രാജ്യങ്ങളും ഇതില് ഉള്പ്പെടുന്നുണ്ട്. യോഗം എപ്പോഴായിരിക്കുമെന്ന് വ്യക്തമാക്കിയിട്ടില്ലെങ്കിലും, ഗാസ വെടിനിര്ത്തല് പദ്ധതിയുടെ രണ്ടാം ഘട്ടം നടപ്പിലാക്കുന്നത് യോഗം ചര്ച്ച ചെയ്യും. ഹമാസും മറ്റ് ഫലസ്തീന് വിഭാഗങ്ങളും ഇതിനായുള്ള റോഡ്മാപ്പ് അംഗീകരിച്ചിട്ടുണ്ട്. യുദ്ധാനന്തര ഗാസയുടെ ഇടക്കാല ഭരണച്ചുമതല ഫലസ്തീന് ടെക്നോക്രാറ്റുകളുടെ സംഘടനയായ നാഷണല് കമ്മിറ്റി ഫോര് ദി അഡ്മിനിസ്ട്രേഷന് ഓഫ് ഗാസ (NCAG) ഏറ്റെടുക്കുമെന്നും പദ്ധതിയില് വ്യവസ്ഥ ചെയ്യുന്നുണ്ട്.
Related News
