ദമ്മാം: സൗദി മലയാളി സമാജം സംഘടിപ്പിക്കുന്ന സൗദി മലയാളി ലിറ്റററി ഫെസ്റ്റിന്റെ രണ്ടാം പതിപ്പിന് സെപ്റ്റംബര്‍ 23ന് ഔദ്യോഗിക തുടക്കമാകും. പ്രവാസ ഭൂമികയില്‍ മലയാളികള്‍ സംഘടിപ്പിക്കുന്നതില്‍ വെച്ചേറ്റവും ശ്രദ്ധേയമായ സാഹിത്യോത്സവം ഇത്തവണ ഒരു മാസം നീണ്ടുനില്‍ക്കും. സെപ്റ്റംബര്‍ 23ന് ആരംഭിച്ച് ഒക്ടോബര്‍ 31നാണ് സാഹിത്യോത്സവം സമാപിക്കുന്നത്.

സെപ്റ്റംബര്‍ 23ന് നടക്കുന്ന ഉദ്ഘാടനച്ചടങ്ങില്‍ പ്രശസ്ത എഴുത്തുകാരനും പ്രഭാഷകനുമായ എം.എന്‍. കാരശ്ശേരി എസ്.എം.എല്‍.എഫ്. ഫെസ്റ്റ് ഉദ്ഘാടനം ചെയ്യും. എഴുത്തുകാരിയും കവയത്രിയുമായ റോസ്‌മേരി, സംവിധായകനും ദേശീയ അവാര്‍ഡ് ജേതാവുമായ വി.സി. അഭിലാഷ്, ഡോക്യുമെന്ററി സംവിധായിക ഷൈനി ബെഞ്ചമിന്‍, എഴുത്തുകാരിയും വിവര്‍ത്തകയുമായ ഷൈല രവീന്ദ്രന്‍ എന്നിവരും ഉദ്ഘാടന സമ്മേളനത്തില്‍ പങ്കെടുക്കും.

ഉദ്ഘാടനത്തോടനുബന്ധിച്ച് രണ്ട് ദിവസം നീണ്ടുനില്‍ക്കുന്ന ചലച്ചിത്ര ശില്‍പശാല, സാംസ്‌കാരിക പ്രഭാഷണം, പുസ്തക പ്രകാശനങ്ങള്‍, ഡോക്യുമെന്ററി പ്രദര്‍ശനം, ഗസല്‍ സന്ധ്യ തുടങ്ങിയ പരിപാടികള്‍ അരങ്ങേറും.

ഒക്ടോബര്‍ 9ന് നടക്കുന്ന കാവ്യോത്സവത്തില്‍ പ്രശസ്ത നടന്‍ ഇര്‍ഷാദ് അലി മുഖ്യാതിഥിയായിരിക്കും. പ്രവാസി കവികളുമായുള്ള മുഖാമുഖം, കവിതകള്‍ അവതരിപ്പിക്കുന്ന കവിതാസ്വാദന സദസ്സ്, കാവ്യസമാഹാരങ്ങളുടെ പവിലിയന്‍, കൂടാതെ ഇര്‍ഷാദ് അലിയുടെ 'പൂക്കാതിരിക്കാന്‍ എനിക്കാവാതില്ലേ' എന്ന കവിതാലാപനവും പറച്ചിലും പരിപാടിയും അരങ്ങേറും.

ഒക്ടോബര്‍ 16ന് നടക്കുന്ന ആര്‍ട്ട് ഫെസ്റ്റിനോടനുബന്ധിച്ച ചിത്രരചന ശില്‍പശാലയില്‍ പ്രശസ്ത എഴുത്തുകാരനും ചിത്രകാരനുമായ മുക്താര്‍ ഉദരംപൊയില്‍ മുഖ്യാതിഥിയാകും. 'മലയാള സാഹിത്യം' എന്ന വിഷയത്തെ ആസ്പദമാക്കി തത്സമയ ചിത്രരചന, പ്രമുഖ പ്രവാസി ചിത്രകാരന്മാരുടെ ചിത്രപ്രദര്‍ശനം, കുട്ടികള്‍ക്കും മുതിര്‍ന്നവര്‍ക്കുമായി മത്സരങ്ങള്‍, 'വരയിടം' തുടങ്ങിയ പരിപാടികള്‍ ആര്‍ട്ട് ഫെസ്റ്റിന്റെ ഭാഗമാകും.

ഒക്ടോബര്‍ 29, 30, 31 തീയതികളിലായി നടക്കുന്ന സമാപന സമ്മേളനത്തില്‍ സത്യന്‍ അന്തിക്കാട്, ടി.ഡി. രാമകൃഷ്ണന്‍, ശിഹാബുദ്ദീന്‍ പൊയ്ത്തുംകടവ്, പ്രൊഫ. വീരാന്‍കുട്ടി, ഇന്ദു മേനോന്‍ എന്നിവരും പ്രവാസലോകത്തെ പ്രമുഖ എഴുത്തുകാരും പങ്കെടുക്കും. വിവിധ വിഷയങ്ങളിലായി പത്തോളം ചര്‍ച്ചാസെഷനുകള്‍, പുസ്തകമേള, പുസ്തകപ്രകാശനങ്ങള്‍, സമാജത്തിന്റെ പത്താം വാര്‍ഷിക സുവനീര്‍ പ്രകാശനം എന്നിവയും സമാപന പരിപാടികളുടെ ഭാഗമായി നടക്കും.

പ്രവാസ സാഹിത്യരംഗത്തെ കഥ, കവിത, നോവല്‍, സഞ്ചാരസാഹിത്യം, സിനിമ തുടങ്ങിയ മേഖലകളിലെ സംഭാവനകള്‍ പരിഗണിച്ച് ഏര്‍പ്പെടുത്തിയ സമാജം പ്രവാസ മുദ്ര പുരസ്‌കാരം 2026 സമാപന സമ്മേളനത്തില്‍ ശിഹാബുദ്ദീന്‍ പൊയ്ത്തുംകടവിന് സമ്മാനിക്കും. ലിറ്റററി ഫെസ്റ്റിനോടനുബന്ധിച്ച് ജി.സി.സി. തലത്തില്‍ സംഘടിപ്പിച്ച കഥ, കവിതാ രചനാ മത്സരങ്ങളിലെ വിജയികള്‍ക്കുള്ള പുരസ്‌കാരങ്ങളും ഇതേ വേദിയില്‍ വിതരണം ചെയ്യുമെന്നും ദേശീയ തലത്തില്‍ ശ്രദ്ധേയരായ ചില അപ്രതീക്ഷിത അതിഥികള്‍ കൂടി പങ്കെടുക്കുമെന്നും സൗദി മലയാളി സമാജം ദേശീയ പ്രസിഡന്റ് മാലിക് മഖ്ബൂല്‍ ആലുങ്ങല്‍, ദമ്മാം റീജണല്‍ പ്രസിഡന്റ് സാജിദ് ആറാട്ടുപുഴ, ജനറല്‍ സെക്രട്ടറി ഡോ. സിന്ധു ബിനു, ട്രഷറര്‍ ഫബിന നജ്മുസമാന്‍, ഓര്‍ഗനൈസിംഗ് സെക്രട്ടറി ഷനീബ് അബൂബക്കര്‍, ഭാരവാഹികളായ ജേക്കബ് ഉതുപ്പ്, മുരളീധരന്‍, മുഷാല്‍ തഞ്ചേരി, ഹുസൈന്‍ ചമ്പോളില്‍ എന്നിവര്‍ വാര്‍ത്താക്കുറിപ്പിലൂടെ അറിയിച്ചു.