ഈസ്റ്റ് റദര്‍ഫോര്‍ഡ്: 2026 ഫുട്‌ബോള്‍ ലോകകപ്പ് ഫൈനലില്‍ സ്‌പെയിന്‍ ചാമ്പ്യന്മാരായപ്പോള്‍, കളിയേക്കാള്‍ അധികം വാര്‍ത്തകളില്‍ നിറഞ്ഞത് അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ സാന്നിധ്യമായിരുന്നു. അര്‍ജന്റീനയെ പരാജയപ്പെടുത്തി സ്‌പെയിന്‍ കിരീടം ഉയര്‍ത്തിയ വേളയില്‍, വിജയികള്‍ക്കൊപ്പം വേദിയില്‍ ഏറെനേരം ചെലവഴിച്ച ട്രംപ് സ്വന്തം ശൈലിയില്‍ ശ്രദ്ധയാകര്‍ഷിച്ചു.
മെറ്റ്ലൈഫ് സ്റ്റേഡിയത്തില്‍ ഫൈനലിന് ശേഷം നടന്ന സമ്മാനദാന ചടങ്ങില്‍ ഫിഫ പ്രസിഡന്റ് ജിയാനി ഇന്‍ഫാന്റിനോയ്‌ക്കൊപ്പമാണ് ട്രംപ്
ഗ്രൗണ്ടിലിറങ്ങിയത്. സ്റ്റേഡിയത്തിലെത്തിച്ചേര്‍ന്ന പ്രസിഡന്റിനെ കാണികള്‍ കൂവലുകളോടെയാണ് വരവേറ്റത്. എന്നാല്‍ ഇതൊന്നും വകവെക്കാതെ, തന്റെ ട്രേഡ്മാര്‍ക്ക് 'ട്രംപ് ഡാന്‍സ്' വേദിയില്‍ സ്പാനിഷ് താരങ്ങള്‍ക്ക് മുന്നില്‍ അദ്ദേഹം അവതരിപ്പിച്ചു. സ്പാനിഷ് ടീം ട്രോഫിയുമായി ആഘോഷിക്കുന്നതിനിടെ, ഇന്‍ഫാന്റിനോ അദ്ദേഹത്തെ വേദിയില്‍ നിന്ന് കൊണ്ടുപോകാന്‍ ശ്രമിച്ചെങ്കിലും ട്രംപ് അവിടെത്തന്നെ നിലയുറപ്പിച്ചു.
കാനഡ പ്രധാനമന്ത്രി മാര്‍ക്ക് കാര്‍ണി, മെക്‌സിക്കന്‍ പ്രസിഡന്റ് ക്ലോഡിയ ഷീന്‍ബാം എന്നിവര്‍ക്കൊപ്പമാണ് ട്രംപ് ഇരുന്നത്. ഇവര്‍ മൂവരും തമ്മിലുള്ള നയതന്ത്ര ബന്ധങ്ങള്‍ നിലവില്‍ അത്ര സുഖകരമല്ല. കാട്ടുതീ മൂലം വടക്കുകിഴക്കന്‍ അമേരിക്കയിലെ വായുനിലവാരം മോശമായതിനെ തുടര്‍ന്ന് കാനഡയ്ക്കെതിരെ താരിഫ് ഏര്‍പ്പെടുത്തുമെന്ന് ട്രംപ് ഭീഷണി മുഴക്കിയിരുന്നു. മെക്‌സിക്കോയുമായുള്ള ബന്ധം കുടിയേറ്റ പ്രശ്‌നങ്ങളും ഡ്രഗ് ട്രാഫിക്കര്‍മാര്‍ക്കെതിരായ സൈനിക നടപടി ഭീഷണിയും കാരണം വഷളാണ്. കൂടാതെ, ഇറാന്‍ യുദ്ധത്തില്‍ പിന്തുണ നല്‍കുന്നില്ലെന്നും നാറ്റോ വിഹിതം കുറവാണെന്നും കുറ്റപ്പെടുത്തിയിട്ടുള്ള സ്പാനിഷ് പ്രധാനമന്ത്രി പെഡ്രോ സാഞ്ചസുമായും അദ്ദേഹം ഹസ്തദാനം നടത്തി.
2025 ജനുവരിയില്‍ അധികാരമേറ്റ ശേഷം ലോകകപ്പിനെ തന്റെ രാഷ്ട്രീയ ബ്രാന്‍ഡുമായി ട്രംപ് ചേര്‍ത്തുനിര്‍ത്തിയിരുന്നു. ടൂര്‍ണമെന്റില്‍ ഉടനീളം അദ്ദേഹം സജീവമായി ഇടപെട്ടു. യുഎസ് താരം ഫോളറിന്‍ ബാലോഗുന് ലഭിച്ച റെഡ് കാര്‍ഡ് റദ്ദാക്കണമെന്ന് ആവശ്യപ്പെട്ട് ഫിഫ പ്രസിഡന്റിനെ വിളിച്ചത് വലിയ വിവാദമായിരുന്നു. എങ്കിലും, ലോകചരിത്രത്തിലെ തന്നെ ഏറ്റവും മികച്ച കായിക മാമാങ്കമാണ് ഇതെന്ന് വിശേഷിപ്പിക്കാന്‍ അദ്ദേഹം മറന്നില്ല. 'നമ്മള്‍ ഒരു ഫുട്‌ബോള്‍ രാജ്യമാണെന്ന് ഈ ടൂര്‍ണമെന്റ് തെളിയിച്ചു,' ട്രംപ് പറഞ്ഞു.
കഴിഞ്ഞ വര്‍ഷം നടന്ന ക്ലബ് ലോകകപ്പിനിടെ ചെല്‍സി ടീം സമ്മാനം വാങ്ങിയ വേളയിലും ട്രംപ് വേദി വിട്ടുപോകാതെ നിന്നത് അന്ന് താരങ്ങളെ ആശയക്കുഴപ്പത്തിലാക്കിയിരുന്നു. ആ ട്രോഫി താന്‍ വൈറ്റ് ഹൗസിലേക്ക് കൊണ്ടുപോയെന്ന് അന്ന് ട്രംപ് അവകാശപ്പെട്ടെങ്കിലും, അത് പകര്‍പ്പ് മാത്രമാണെന്ന് ഫിഫ പിന്നീട് വ്യക്തമാക്കിയിരുന്നു.
അര്‍ജന്റീനയുടെ പ്രസിഡന്റ് ജാവിയര്‍ മിലെയുമായി തനിക്ക് അടുത്ത സൗഹൃദമുണ്ടെന്ന് ട്രംപ് ആവര്‍ത്തിച്ചെങ്കിലും, അര്‍ജന്റീനയുടെ തോല്‍വിയിലും സ്‌പെയിനിന്റെ കിരീടധാരണത്തിലും ട്രംപിന്റെ അമിത സാന്നിധ്യം ഫുട്‌ബോള്‍ ആരാധകര്‍ക്കിടയില്‍ ചര്‍ച്ചയായിരിക്കുകയാണ്.
.jpg)
