മക്ക: ഈ വര്‍ഷം ഉംറ സീസണ്‍ ആരംഭിച്ചത് മുതല്‍ (ദുല്‍ഹിജ്ജ 15) മുഹറം മാസാന്ത്യം വരെയുള്ള കാലയളവില്‍ ഉംറ വിസയില്‍ എത്തുന്നവരുടെ എണ്ണത്തില്‍ 22.5 ശതമാനം വര്‍ധന രേഖപ്പെടുത്തിയതായി സൗദി ഹജ്ജ്-ഉംറ മന്ത്രാലയവും പില്‍ഗ്രിം എക്‌സ്പീരിയന്‍സ് പ്രോഗ്രാമും അറിയിച്ചു.

അന്താരാഷ്ട്ര ഉംറ തീര്‍ഥാടകരുടെ എണ്ണം 1.27 ദശലക്ഷം കടന്നു. സൗദി വിഷന്‍ 2030-ന്റെ ഭാഗമായി നടപ്പിലാക്കി വരുന്ന പ്രവര്‍ത്തനങ്ങളുടെ ഭാഗമായി ഡിജിറ്റല്‍, ഓപ്പറേഷണല്‍ സേവനങ്ങളിലുണ്ടായ പുരോഗതിയും, ഭരണകൂടത്തിന്റെ ശക്തമായ പിന്തുണയും വിവിധ ഏജന്‍സികള്‍ തമ്മിലുള്ള ഏകോപനവുമാണ് തീര്‍ഥാടകരുടെ എണ്ണത്തില്‍ ഇത്രയധികം വര്‍ധനയുണ്ടാകാന്‍ കാരണമായതെന്ന് മന്ത്രാലയം വ്യക്തമാക്കി.

എത്തിയവരില്‍ 75 ശതമാനം പേരും വിമാനമാര്‍ഗമാണ് സൗദിയിലെത്തിയത്. ഏറ്റവും കൂടുതല്‍ തീര്‍ഥാടകര്‍ എത്തിയത് പാക്കിസ്ഥാനില്‍ നിന്നാണ് (2,00,000 പേര്‍). തൊട്ടുപിന്നാലെ ഇന്തോനേഷ്യയില്‍ നിന്ന് 1,70,000 പേരും, ഇറാഖില്‍ നിന്ന് 1,30,000 പേരും ഉംറ നിര്‍വഹിക്കാനെത്തി.

തീര്‍ഥാടകരുടെ യാത്ര ആസൂത്രണം ചെയ്യുന്നത് മുതല്‍ മടക്കയാത്ര വരെയുള്ള എല്ലാ ഘട്ടങ്ങളിലും കൂടുതല്‍ സൗകര്യപ്രദവും ഉയര്‍ന്ന നിലവാരമുള്ളതുമായ സേവനങ്ങള്‍ ഉറപ്പാക്കുന്നതിനായി ഉംറ സംവിധാനത്തിന്റെ ഡിജിറ്റല്‍ ലഭ്യതയും പ്രവര്‍ത്തനക്ഷമതയും മെച്ചപ്പെടുത്തുന്നത് തുടരുമെന്ന് മന്ത്രാലയം കൂട്ടിച്ചേര്‍ത്തു.