തിരൂര്‍: ഫുട്‌ബോള്‍ ചരിത്രത്തിലെ ഏറ്റവും വികാരനിര്‍ഭരമായ നിമിഷങ്ങളിലൊന്നായ ലയണല്‍ മെസിയുടെ ലോകകപ്പ് കിരീടനേട്ടം ഇനി നോവല്‍ രൂപത്തില്‍ വായിക്കാം. ഖത്തര്‍ ലോകകപ്പിന്റെ പശ്ചാത്തലത്തില്‍ ഫുട്‌ബോള്‍, മനുഷ്യബന്ധങ്ങള്‍, യാത്ര, സംസ്‌കാരം, ആരാധകരുടെ വികാരങ്ങള്‍ എന്നിവ കോര്‍ത്തിണക്കിയാണ് നോവല്‍ ഒരുക്കിയിരിക്കുന്നത്. 'ഖനീസ' എന്നാണ് നോവലിന്റെ പേര്. തിരൂര്‍ പുതുപ്പള്ളി ശാസ്താ എ.എല്‍.പി.സ്‌കൂള്‍ അധ്യാപകന്‍ റിഫാഷെലീസ് ചേന്നരയാണ് നോവലിസ്റ്റ്. ഖത്തര്‍ ലോകകപ്പ് നേരില്‍ കാണാന്‍ റിഫാഷെലീസ് പോയിരുന്നു.

സെവന്‍സ് ഫുട്‌ബോളില്‍ സജീവമായിരുന്ന മലപ്പുറത്തെ ഒരു ചെറുപ്പക്കാരന് അപ്രതീക്ഷിതമായുണ്ടായ പരിക്കിനെത്തുടര്‍ന്ന് കളിക്കളത്തില്‍ നിന്നും വിട്ടു നില്‍ക്കേണ്ടിവരുന്നു. എന്നാല്‍ തന്റെ ഇച്ഛാശക്തിയും ഫുട്‌ബോളിനോടുള്ള അടങ്ങാത്ത അഭിനവേശവും കൊണ്ട് വ്‌ലോഗിങ്ങിലൂടെ കളത്തിന് പുറത്ത് ഫുട്‌ബോള്‍ വിശേഷങ്ങളുമായി യാത്ര ചെയ്യുന്നു. ഈ കഥാപാത്രത്തിന്റെ 32 ദിവസം നീണ്ടുനിന്ന ഖത്തര്‍ യാത്രയാണ് നോവലിന്റെ ഇതിവൃത്തം.

2022 ഫിഫ കപ്പ് ഉയര്‍ത്തിപ്പിടിച്ച ഭിന്നശേഷിസൗഹൃദ ഭൂമിക എന്ന ആശയത്തെ നോവല്‍ ഫോക്കസ് ചെയ്യുന്നുണ്ട്. അതോടൊപ്പം നീണ്ട 36 വര്‍ഷത്തിനുശേഷം അര്‍ജന്റീന ടീം മെസിയുടെ ക്യാപ്റ്റന്‍സിയില്‍ കനക കിരീടം ഉയര്‍ത്തുന്നതും വൈകാരികമായി നോവലില്‍ അവതരിപ്പിച്ചിട്ടുണ്ട്. 36 അധ്യായങ്ങളിലായി 208 പേജ് നോവലിനുണ്ട്. ഖത്തറിലെ സൗഹൃദകൂട്ടായ്മയുടെ നേതൃത്വത്തില്‍ ഒലിവ് റിഡ്‌ലിയാണ് പ്രസാധകര്‍.

ആലത്തിയൂര്‍ കെ.എച്ച്.എം.എച്ച്.എസ്.സ്‌കൂളിലെ അധ്യാപിക ഫിദ മുണ്ടശ്ശേരിയാണ് റിഫാഷെലീസിന്റെ ഭാര്യ. മക്കള്‍: ഈലാഫ് സെയ്ന്‍, ഈമാന്‍ സെയ്ന്‍. ചേന്നര പെരുന്തിരുത്തിയിലെ റിട്ട.പ്രധാന അധ്യാപകരായ സി.പി. സൈനുദ്ദീന്റെയും പി. ഫാത്തിമയുടെയും മകനാണ്. ഡോക്യുമെന്ററികളും ഷോട്ട്ഫിലിമുകളും സംവിധാനം ചെയ്തിട്ടുണ്ട്. 2011 ല്‍ കലാമൂല്യമുള്ള മികച്ച ഡോക്യുമെന്ററിക്കുള്ള കേരള കലാമണ്ഡലം അവാര്‍ഡും റിഫാഷെലീസിന് ലഭിച്ചിട്ടുണ്ട്. 'ഖനീസ' പ്രഥമ നോവലാണ്. ഇംഗ്ലീഷ്, അറബി ഭാഷകളിലേക്ക് നോവല്‍ വിവര്‍ത്തനം ചെയ്യുന്നതിന്റെ പണിപ്പുരയിലാണ് ഇപ്പോള്‍. - റിഫാഷെലീസ് ചേന്നര (9846888789).
- കെ.പി.ഒ. റഹ്‌മത്തുല്ല