ശ്രീഹരിക്കോട്ട- രാജ്യത്തെ സ്വകാര്യ ബഹിരാകാശ ഗവേഷണ രംഗത്ത് പുതിയൊരു ചരിത്ര അധ്യായം കുറിച്ച് 'വിക്രം-1' റോക്കറ്റ് വിജയകരമായി വിക്ഷേപിച്ചു. ഹൈദരാബാദ് ആസ്ഥാനമായ പ്രമുഖ ബഹിരാകാശ സ്റ്റാര്‍ട്ടപ്പ് കമ്പനിയായ 'സ്‌കൈറൂട്ട് എയ്റോസ്പേസ്' തദ്ദേശീയമായി രൂപകല്‍പ്പന ചെയ്ത് വികസിപ്പിച്ചെടുത്തതാണ് ഈ ഓര്‍ബിറ്റല്‍-ക്ലാസ് റോക്കറ്റ്. ശ്രീഹരിക്കോട്ടയിലെ സതീഷ് ധവാന്‍ സ്പേസ് സെന്ററിലെ ഒന്നാം വിക്ഷേപണ പാഡില്‍ നിന്നായിരുന്നു ഈ അഭിമാന നിമിഷം അരങ്ങേറിയത്.

'മിഷന്‍ ആഗമന്‍' എന്ന് പേരിട്ടിരിക്കുന്ന ഈ ദൗത്യം, ആഗോള ഉപഗ്രഹ വിക്ഷേപണ വിപണിയില്‍ ഇന്ത്യയിലെ സ്വകാര്യ മേഖലയുടെ സാന്നിധ്യം ശക്തമായി ഉറപ്പിക്കുന്നതാണ്. വിക്ഷേപണത്തിന് മുന്നോടിയായി പൊതുജന സുരക്ഷ മുന്‍നിര്‍ത്തി വ്യോമ-നാവിക ഗതാഗത നിയന്ത്രണ ഏജന്‍സികള്‍ കര്‍ശനമായ ജാഗ്രതാ നിര്‍ദ്ദേശങ്ങള്‍ പുറപ്പെടുവിച്ചിരുന്നു. റോക്കറ്റിന്റെ സഞ്ചാരപഥം ഉള്‍പ്പെടുന്ന മേഖലകളില്‍ പ്രത്യേക നിയന്ത്രണങ്ങളും ഏര്‍പ്പെടുത്തിയിരുന്നു.

ഇന്ത്യന്‍ ബഹിരാകാശ ശാസ്ത്രത്തിന്റെ പിതാവായ വിക്രം സാരാഭായിയോടുള്ള ആദരസൂചകമായാണ് റോക്കറ്റിന് 'വിക്രം' എന്ന് പേരിട്ടിരിക്കുന്നത്. വളര്‍ന്നുവരുന്ന ആഗോള ബഹിരാകാശ സമ്പദ്വ്യവസ്ഥയില്‍ വലിയൊരു പങ്ക് സ്വന്തമാക്കുക എന്ന ലക്ഷ്യത്തോടെ, ചെറിയ ഉപഗ്രഹങ്ങള്‍ക്ക് വളരെ കുറഞ്ഞ ചെലവില്‍ വിക്ഷേപണ സൗകര്യം ഒരുക്കുകയാണ് സ്‌കൈറൂട്ട് ഇതിലൂടെ ലക്ഷ്യമിടുന്നത്.

എന്താണ് വിക്രം-1? സവിശേഷതകള്‍ അറിയാം:

ഏകദേശം ഒരു ഏഴ് നില കെട്ടിടത്തിന്റെ ഉയരമുള്ള വിക്രം-1 സാങ്കേതിക വിദ്യയില്‍ ഏറെ മുന്നിലാണ്. പൂര്‍ണ്ണമായും കാര്‍ബണ്‍ കോമ്പോസിറ്റുകള്‍ ഉപയോഗിച്ചാണ് ഈ മള്‍ട്ടി-സ്റ്റേജ് റോക്കറ്റ് നിര്‍മ്മിച്ചിരിക്കുന്നത്. പൂര്‍ണ്ണമായും ആഭ്യന്തരമായി വികസിപ്പിച്ച 3ഉ പ്രിന്റഡ് റോക്കറ്റ് എഞ്ചിനുകളും ഹൈ-ത്രസ്റ്റ് സോളിഡ് റോക്കറ്റ് മോട്ടോറുകളുമാണ് ഇതിന് കരുത്ത് പകരുന്നത്.
350 കിലോഗ്രാം വരെയുള്ള പേലോഡുകളെ ഭൂമിയുടെ താഴ്ന്ന ഭ്രമണപഥത്തില്‍ എത്തിക്കാന്‍ ഇതിന് ശേഷിയുണ്ട്.
ഗ്രാഹ സ്പേസ്, കോസ്മോസര്‍വ്, ഡിക്യൂബ്ഡ് എന്നിവയുടെ സാങ്കേതികവിദ്യാ പ്രദര്‍ശന പേലോഡുകള്‍ക്കൊപ്പം സ്‌കൈറൂട്ടിന്റെ സ്വന്തം 'SCOPE' പേലോഡും വിക്രം-1 ഭ്രമണപഥത്തില്‍ എത്തിക്കും.

ബഹിരാകാശ രംഗത്ത് പുതിയ വിപ്ലവം

2020-ലാണ് ഇന്ത്യ ബഹിരാകാശ മേഖല സ്വകാര്യ പങ്കാളികള്‍ക്കായി തുറന്നുകൊടുത്തത്. വെറും ആറ് വര്‍ഷത്തിനുള്ളില്‍ ഒരു സ്വകാര്യ കമ്പനി സ്വന്തമായി റോക്കറ്റ് നിര്‍മ്മിച്ച് ഭ്രമണപഥത്തില്‍ എത്തിക്കുന്നു എന്നത് രാജ്യത്തിന് വലിയൊരു നേട്ടമാണ്. 2022 നവംബറില്‍ സ്‌കൈറൂട്ട് വിജയകരമായി പൂര്‍ത്തിയാക്കിയ 'വിക്രം-എസ്' സബ്ഓര്‍ബിറ്റല്‍ ദൗത്യത്തിന്റെ തുടര്‍ച്ചയായാണ് ഈ പുതിയ കുതിപ്പ്.

പതിറ്റാണ്ടുകളായി രാജ്യത്തിന്റെ ശാസ്ത്രീയ ദൗത്യങ്ങളും വാണിജ്യ വിക്ഷേപണങ്ങളും ഒറ്റയ്ക്ക് കൈകാര്യം ചെയ്തിരുന്നത് ഐഎസ്ആര്‍ഒ ആയിരുന്നു. വിക്രം-1 പോലുള്ള സ്വകാര്യ വിക്ഷേപണ വാഹനങ്ങള്‍ സജീവമാകുന്നതോടെ ചെറിയ വാണിജ്യ ഉപഗ്രഹങ്ങളുടെ വിക്ഷേപണത്തിനായി കാത്തിരിപ്പ് കാലാവധി ഒഴിവാകും. ഇത് ഐഎസ്ആര്‍ഒയ്ക്ക് ഗഗന്‍യാന്‍, ചന്ദ്രയാന്‍ തുടങ്ങിയ വലിയ ദൗത്യങ്ങളില്‍ കൂടുതല്‍ ശ്രദ്ധ കേന്ദ്രീകരിക്കാന്‍ അവസരമൊരുക്കും.

ഐഎസ്ആര്‍ഒയോടൊപ്പം തോളോട് തോള്‍ ചേര്‍ന്ന് രാജ്യത്തിന്റെ ബഹിരാകാശ സ്വപ്നങ്ങള്‍ക്ക് ചിറകുനല്‍കാന്‍ സ്വകാര്യ സംരംഭങ്ങള്‍ക്കും കഴിയുമെന്ന് തെളിയിക്കുന്നതോടെ, ബഹിരാകാശ ഗവേഷണ രംഗത്ത് ഇന്ത്യ ഒരു പുതിയ യുഗത്തിലേക്ക് ചുവടുവെക്കുകയാണ്.