റിയാദ്- സൗദി അറേബ്യന്‍ വിദ്യാഭ്യാസ മന്ത്രി യുസഫ് ബിന്‍ അബ്ദുള്ള അല്‍-ബുന്യാന്റെ നേതൃത്വത്തില്‍ റിയാദിലെ ഗ്ലോബല്‍ ടെക്‌നിക്കല്‍ കോളേജ് ഫോര്‍ ഏവിയേഷന്‍ സയന്‍സസ് 2025-2026 അധ്യയന വര്‍ഷത്തെ ബിരുദദാന ചടങ്ങ് പ്രൗഢഗംഭീരമായി ആഘോഷിച്ചു. എയര്‍ക്രാഫ്റ്റ് എഞ്ചിനീയറിംഗ്, മെയിന്റനന്‍സ് തുടങ്ങിയ മേഖലകളില്‍ വൈദഗ്ധ്യം നേടിയ 1,611 വിദ്യാര്‍ത്ഥികളാണ് ഇത്തവണ ബിരുദം സ്വീകരിച്ചത്. രാജകുടുംബാംഗങ്ങള്‍, സൈനിക-സിവില്‍ ഉദ്യോഗസ്ഥര്‍, പ്രമുഖ വ്യോമയാന കമ്പനികളുടെ പ്രതിനിധികള്‍ തുടങ്ങിയവര്‍ ചടങ്ങില്‍ പങ്കെടുത്തു.

സൗദി വ്യോമയാന ചരിത്രത്തില്‍ പുതിയ അധ്യായം കുറിച്ചുകൊണ്ട്, എയര്‍ക്രാഫ്റ്റ് എഞ്ചിനീയറിംഗ് ആന്‍ഡ് മെയിന്റനന്‍സ് മേഖലയില്‍ നിന്നുള്ള ആദ്യത്തെ സൗദി വനിതാ ബാച്ചിന്റെ ബിരുദദാനവും ഇതോടൊപ്പം നടന്നു. 48 വനിതാ വിദ്യാര്‍ത്ഥിനികളാണ് ഈ ബാച്ചില്‍ വിജയകരമായി പരിശീലനം പൂര്‍ത്തിയാക്കിയത്. അത്യാധുനിക സാങ്കേതിക മേഖലകളില്‍ സൗദി വനിതകളുടെ സാന്നിധ്യം ശക്തമാക്കുന്നതിന്റയും അവരെ ശാക്തീകരിക്കുന്നതിന്റെയും തെളിവായി ഈ നേട്ടം മാറി. പഠനം പൂര്‍ത്തിയാക്കി ആറ് മാസത്തിനുള്ളില്‍ തന്നെ ഈ ബാച്ചിലെ 88 ശതമാനം പേര്‍ക്കും മികച്ച തൊഴില്‍ കണ്ടെത്താന്‍ സാധിച്ചു എന്നത് കോളേജിലെ പരിശീലന മികവും തൊഴില്‍ വിപണിയുമായുള്ള ശക്തമായ പങ്കാളിത്തവും അടിവരയിടുന്നു.

ചടങ്ങില്‍ സംസാരിച്ച 'കോളേജസ് ഓഫ് എക്‌സലന്‍സ്' സി.ഇ.ഒ എന്‍ജിനീയര്‍ അയ്മന്‍ ബിന്‍ മുസ്തഫ അല്‍ അബ്ദുള്ള, 2014-ല്‍ സ്ഥാപിതമായ ശേഷം ഈ കോളേജില്‍ നിന്ന് പതിനായിരത്തിലധികം വിദ്യാര്‍ത്ഥികള്‍ ബിരുദം നേടിയിട്ടുണ്ടെന്ന് വ്യക്തമാക്കി. റിയാദ് എയര്‍ലൈന്‍സ് ഹ്യൂമന്‍ റിസോഴ്‌സസ് സീനിയര്‍ വൈസ് പ്രസിഡന്റ് നഹാര്‍ അല്‍-ജുഹാനി സംസാരിക്കവേ, തങ്ങള്‍ സ്‌പോണ്‍സര്‍ ചെയ്ത 27 വനിതാ ട്രെയിനികള്‍ ഈ ആദ്യ വനിതാ ബാച്ചില്‍ ഉള്‍പ്പെട്ടിട്ടുണ്ടെന്ന് അഭിമാനത്തോടെ അറിയിച്ചു. രാജ്യത്തിന്റെ 'വിഷന്‍ 2030' ലക്ഷ്യങ്ങള്‍ കൈവരിക്കുന്നതിനും സൗദി വ്യോമയാന മേഖലയുടെ ഭാവി വളര്‍ച്ചയ്ക്കും ഈ യുവപ്രതിഭകള്‍ വലിയ സംഭാവന നല്‍കുമെന്നും അദ്ദേഹം പ്രത്യാശ പ്രകടിപ്പിച്ചു.