റിയാദ് / തിരുവനന്തപുരം: ഒഐസിസി റിയാദ് സെന്‍ട്രല്‍ കമ്മിറ്റി ഏര്‍പ്പെടുത്തിയ പ്രഥമ 'ഉമ്മന്‍ ചാണ്ടി മെമ്മോറിയല്‍ എക്‌സലന്‍സി പുരസ്‌കാരം' കരുനാഗപ്പള്ളി എം.എല്‍.എ സി.ആര്‍. മഹേഷിന് സമ്മാനിച്ചു. തിരുവനന്തപുരം കെ.പി.സി.സി ആസ്ഥാനത്ത് നടന്ന ചടങ്ങില്‍ സാംസ്‌കാരിക-ടൂറിസം വകുപ്പ് മന്ത്രി പി.സി. വിഷ്ണുനാഥ് ഒരു ലക്ഷം രൂപയും പ്രശസ്തിപത്രവും ഫലകവും അടങ്ങുന്ന പുരസ്‌കാരം സമ്മാനിച്ചു. ഒഐസിസി റിയാദ് സെന്‍ട്രല്‍ കമ്മിറ്റി പ്രസിഡന്റ് സലീം കളക്കര അധ്യക്ഷത വഹിച്ച യോഗം മന്ത്രി ഉദ്ഘാടനം ചെയ്തു. സെന്‍ട്രല്‍ കമ്മിറ്റി സീനിയര്‍ വൈസ് പ്രസിഡന്റ് രഘുനാഥ് പറശ്ശിനിക്കടവ് ആമുഖപ്രഭാഷണം നടത്തി.
കരുനാഗപ്പള്ളി മണ്ഡലത്തിലെ സാമൂഹിക, സാംസ്‌കാരിക, വിദ്യാഭ്യാസ, ജീവകാരുണ്യ പ്രവര്‍ത്തനങ്ങളും, മദ്യം, മയക്കുമരുന്നിനെതിരെയുള്ള ബോധവല്‍ക്കരണവും, പിന്നാക്കവിഭാഗങ്ങളുടെ ശാക്തീകരണ പദ്ധതികളും പരിഗണിച്ചാണ് സി.ആര്‍. മഹേഷിനെ ഈ പുരസ്‌കാരത്തിനായി തെരഞ്ഞെടുത്തത്. ഒഐസിസി റിയാദ് സെന്‍ട്രല്‍ കമ്മിറ്റി സംഘടിപ്പിച്ച ഉമ്മന്‍ ചാണ്ടി അനുസ്മരണ സമ്മേളനത്തിലാണ് ചാണ്ടി ഉമ്മന്‍ എം.എല്‍.എ പുരസ്‌കാര ജേതാവിനെ പ്രഖ്യാപിച്ചത്. കെ.പി.സി.സി ജനറല്‍ സെക്രട്ടറി പി.എ. സലീം, സി. ഹരിദാസ്, സോണി സെബാസ്റ്റ്യന്‍ എന്നിവരടങ്ങുന്ന ജൂറിയാണ് ജേതാവിനെ കണ്ടെത്തിയത്.
ചടങ്ങില്‍ കെ.പി.സി.സി ജനറല്‍ സെക്രട്ടറിമാരായ നെയ്യാറ്റിന്‍കര സനല്‍, പി.എ. സലീം, ബാലകൃഷ്ണന്‍ പെരിയ, ഒഐസിസി നേതാക്കളായ അബ്ദുള്ള വല്ലാഞ്ചിറ, മുഹമ്മദലി മണ്ണാര്‍ക്കാട്, അമീര്‍ പട്ടണത്ത്, സക്കീര്‍ ദാനത്ത്, യഹിയ കൊടുങ്ങല്ലൂര്‍, സലീം അര്‍ത്തിയില്‍, ഹക്കീം പട്ടാമ്പി, ജോണ്‍സണ്‍ മാര്‍ക്കോസ്, നാസര്‍ വലപ്പാട്, നസീര്‍ ഹനീഫ കൊല്ലം എന്നിവര്‍ ആശംസകള്‍ നേര്‍ന്നു. സെന്‍ട്രല്‍ കമ്മിറ്റി ജനറല്‍ സെക്രട്ടറി നിഷാദ് ആലങ്കോട് സ്വാഗതവും സെക്രട്ടറി റഫീഖ് വെമ്പായം നന്ദിയും രേഖപ്പെടുത്തി. അശ്‌റഫ് വടക്കേവിള, ടി.കെ. അശ്‌റഫ് പൊന്നാനി, അയ്യൂബ് ഖാന്‍, ജലാല്‍ മൈനാഗപ്പള്ളി, ഇസ്മായില്‍ എരുമേലി, കെ.എം നൗഷാദ്, അനീഷ് കുരിശിങ്കല്‍, എസ്.പി ഷാനവാസ്, സക്കീര്‍ ആലുവ, അബ്ദുള്ള കൊറളായി തുടങ്ങിയ നേതാക്കളും ചടങ്ങില്‍ സന്നിഹിതരായിരുന്നു.
Related News
