ജിദ്ദ- നിര്‍ദ്ധരരും നിരാലംബരുമായ രോഗികള്‍ക്ക് ചികിത്സാ ധനസഹായ പദ്ധതിയുമായി ജിദ്ദ പാലക്കാട് ജില്ലാ കെ.എം.സി.സി. കെയര്‍ ആന്റ് ക്യൂര്‍ എന്ന പേരില്‍ പാലക്കാട് ജില്ലയില്‍ നിന്നുള്ള അര്‍ഹരായ മുന്നൂറോളം രോഗികളെയാണ് പദ്ധതിയിലേക്ക് പരിഗണിക്കുന്നത്.
ഇതിന്റെ ഭാഗമായി 10 ലക്ഷത്തില്‍പരം രൂപയുടെ ആരോഗ്യ ജീവകാരുണ്യപ്രവര്‍ത്തനങ്ങള്‍ക്ക്് ആദ്യഘട്ടത്തില്‍ തുടക്കം കുറിക്കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. ഇതിന്റെ ഉദ്ഘാടനം അടുത്ത മാസം ചെര്‍പ്പുളശ്ശേരിയില്‍ നടത്തും.
ജിദ്ദയിലെ കലാ, കായിക ജീവകാരുണ്യ മേഖലകളില്‍ സജീവ സാന്നിദ്ധ്യമായ പാലക്കാട് ജില്ലാ കെ.എം.സി.സി രണ്ട് വര്‍ഷത്തിനിടെ, ഒരു കോടിയിലധികം രൂപയുടെ പ്രവര്‍ത്തന പദ്ധതികള്‍ നടപ്പാക്കിയിരുന്നു. കഴിഞ്ഞ വര്‍ഷം പാലക്കാട് ജില്ലയിലെ 250 ഓളം സമര്‍ഥരായ വിദ്യാര്‍ഥികള്‍ക്ക് സി.എച്ച് മുഹമ്മദ് കോയയുടെ പേരില്‍ എജ്യുസ്‌കോളര്‍ഷിപ്പ് പദ്ധതി വഴി 15 ലക്ഷത്തോളം രൂപ വിതരണം ചെയ്തിരുന്നു.
പാവപ്പെട്ട രോഗികള്‍ക്ക് കരുതലാവുക എന്ന ലക്ഷ്യത്തോടെയാണ് ഈ വര്‍ഷം ആരോഗ്യ മേഖലയിലേക്ക് ശ്രദ്ധ കേന്ദ്രീകരിച്ചത്. ഇതിനായി ജില്ലാ കമ്മിറ്റിക്ക് കീഴിലുള്ള 12 മണ്ഡലം കമ്മിറ്റികളുടെയും 40 ഓളം പഞ്ചായത്ത് കമ്മിറ്റികളുടെയും നേതൃത്വത്തിലാണ് പദ്ധതി നടപ്പാക്കുക. മണ്ണാര്‍ക്കാട് സി.എച്ച് സെന്ററിനും ജിദ്ദ ആലത്തൂര്‍ മണ്ഡലം കെ.എം.സി.സി വൈസ് പ്രസിഡന്റ് അന്‍ഷാദിന്റെ മകന്‍ മുഹമ്മദ് അഹിയാന്റെ ചികിത്സക്കും ധനസഹായം നല്‍കും.
പത്രസമ്മേളനത്തില്‍ ജില്ലാ പ്രസിഡന്റ് ഹബീബുള്ള പട്ടാമ്പി, ജനറല്‍ സെക്രട്ടറി കുഞ്ഞിമുഹമ്മദ് കോട്ടോപ്പാടം, ട്രഷറര്‍ ഷഹീന്‍ തച്ചമ്പാറ, ഓര്‍ഗനൈസിങ് സെക്രട്ടറി യൂസഫലി തിരുവേഗപ്പുറ വൈസ് പ്രസിഡന്റ് മുഹമ്മദലി കാഞ്ഞിരപ്പുഴ എന്നിവര്‍ സംബന്ധിച്ചു.
Related News
