റിയാദ്: സൗദി അറേബ്യയില്‍ കഴിഞ്ഞ കാല്‍ നൂറ്റാണ്ടിനിടയിലെ ഏറ്റവും കുറഞ്ഞ മണല്‍-പൊടിക്കാറ്റ് നിരക്ക് രേഖപ്പെടുത്തിയതായി ദേശീയ കാലാവസ്ഥാ നിരീക്ഷണ കേന്ദ്രം സി.ഇ.ഒ-യും റീജിയണല്‍ സെന്റര്‍ ഫോര്‍ ഡസ്റ്റ് ആന്‍ഡ് സാന്‍ഡ്സ്റ്റോംസ് ജനറല്‍ സൂപ്പര്‍വൈസറുമായ ഡോ. അയ്മന്‍ ബിന്‍ സലേം ഗുലാം വ്യക്തമാക്കി. 2026 ജൂണില്‍ രാജ്യത്ത് മണല്‍ക്കാറ്റുകളുടെ എണ്ണത്തില്‍ ഏതാണ്ട് പൂജ്യം ശതമാനത്തിനടുത്തുള്ള കുറവാണ് രേഖപ്പെടുത്തിയത്. ഇത് മുന്‍കാല ചരിത്ര നിരക്കുകളുമായി താരതമ്യം ചെയ്യുമ്പോള്‍ 99 ശതമാനത്തോളം കുറവാണെന്നും അദ്ദേഹം വെളിപ്പെടുത്തി.
റീജിയണല്‍ സെന്റര്‍ ഫോര്‍ ഡസ്റ്റ് ആന്‍ഡ് സാന്‍ഡ്സ്റ്റോംസ് പുറത്തുവിട്ട ഏറ്റവും പുതിയ റിപ്പോര്‍ട്ട് പ്രകാരം രാജ്യത്തിന്റെ വടക്കന്‍ അതിര്‍ത്തി മേഖലകളില്‍ മണല്‍ക്കാറ്റിന്റെ സാന്നിധ്യം 100 ശതമാനവും ഇല്ലാതായിട്ടുണ്ട്. വായുവിന്റെ ഗുണനിലവാരത്തില്‍ ഉണ്ടായ ഈ ശ്രദ്ധേയമായ പുരോഗതി ജനജീവിതത്തിന് ഏറെ ആശ്വാസകരമാണ്. കൂടാതെ, റിയാദ്, ഖസിം, അല്‍-ഖര്‍ജ് എന്നിവയുള്‍പ്പെടുന്ന മധ്യമേഖലയിലും, അല്‍-അഹ്‌സ, ദമ്മാം, ദഹ്‌റാന്‍ എന്നിവയുള്‍പ്പെടുന്ന കിഴക്കന്‍ പ്രവിശ്യയിലും പൊടിക്കാറ്റിന്റെ നിരക്കില്‍ 99 ശതമാനം കുറവ് രേഖപ്പെടുത്തിയതായി റിപ്പോര്‍ട്ട് വ്യക്തമാക്കുന്നു.
സൗദി അറേബ്യ അടുത്തിടെ നടപ്പിലാക്കിയ ശക്തമായ പരിസ്ഥിതി-കാലാവസ്ഥാ പ്രതിരോധ പ്രവര്‍ത്തനങ്ങളാണ് ഈ നേട്ടത്തിന് പിന്നിലെ പ്രധാന കാരണം. പരിസ്ഥിതി മലിനീകരണവും മരുഭൂവല്‍ക്കരണവും തടയുക എന്ന ലക്ഷ്യത്തോടെയുള്ള 'സൗദി ഗ്രീന്‍ ഇനിഷ്യേറ്റീവ്', കൃത്രിമ മഴ പെയ്യിക്കുന്നതിനുള്ള 'ക്ലൗഡ് സീഡിംഗ്' പ്രോഗ്രാം, ഹരിതാഭ വര്‍ദ്ധിപ്പിക്കല്‍, ശാസ്ത്രീയമായ രീതിയിലുള്ള കന്നുകാലി മേയ്ക്കല്‍ നിയന്ത്രണം എന്നിവ ഇതില്‍ പ്രധാന പങ്കുവഹിച്ചു. കൂടാതെ ഈ കാലയളവില്‍ അന്തരീക്ഷത്തില്‍ പൊടിപടലങ്ങള്‍ ഉയര്‍ത്തുന്ന വായുപ്രവാഹങ്ങളുടെ ശക്തി കുറഞ്ഞതും ഇതിന് കാരണമായി.
ഉപഗ്രഹ വിവരങ്ങള്‍, എയറോസോള്‍ മോണിറ്ററിങ് സംവിധാനങ്ങള്‍, ലിഡാര്‍ സാങ്കേതികവിദ്യകള്‍, പൊടിയുടെ വ്യാപനം മുന്‍കൂട്ടി പ്രവചിക്കാനുള്ള അത്യാധുനിക ന്യൂമറിക്കല്‍ മോഡലുകള്‍ എന്നിവയടങ്ങുന്ന വിപുലമായ സംവിധാനത്തിലൂടെ റീജിയണല്‍ സെന്റര്‍ ഇത്തരം കാലാവസ്ഥാ മാറ്റങ്ങളെ സൂക്ഷ്മമായി നിരീക്ഷിച്ചുവരികയാണ്. ഇത്തരം ആധുനിക സംവിധാനങ്ങള്‍ കൃത്യമായ മുന്‍കൂര്‍ മുന്നറിയിപ്പുകള്‍ നല്‍കാന്‍ സഹായിക്കുന്നുണ്ട്. ഇത് കാലാവസ്ഥാ വ്യതിയാനങ്ങള്‍ നേരിടാന്‍ ബന്ധപ്പെട്ട അധികാരികളെ സജ്ജമാക്കുന്നതിനൊപ്പം ആരോഗ്യം, പരിസ്ഥിതി, സാമ്പത്തിക മേഖലകള്‍ എന്നിവയില്‍ പൊടിക്കാറ്റ് ഉണ്ടാക്കുന്ന ആഘാതം കുറയ്ക്കാനും സഹായിക്കുന്നു.
Related News
