ന്യൂഡല്‍ഹി: ബക്രീദ് ദിനത്തിലോ മറ്റേതെങ്കിലും ദിവസങ്ങളിലോ തമിഴ്നാട്ടില്‍ ഗോവധ നിരോധം ഉറപ്പാക്കണമെന്ന് സംസ്ഥാന സര്‍ക്കാരിനോട് നിര്‍ദ്ദേശിച്ച മദ്രാസ് ഹൈക്കോടതി ഉത്തരവ് സുപ്രീം കോടതി സ്റ്റേ ചെയ്തു. ഹൈക്കോടതി ഉത്തരവിനെതിരെ തമിഴ്നാട് സര്‍ക്കാര്‍ സമര്‍പ്പിച്ച ഹരജി പരിഗണിച്ച ജസ്റ്റിസ് വിക്രം നാഥ്, ജസ്റ്റിസ് സന്ദീപ് മേത്ത എന്നിവരടങ്ങിയ ബെഞ്ചാണ് അടിയന്തിരമായി സ്റ്റേ ഉത്തരവ് പുറപ്പെടുവിച്ചത്. കേസിലെ എതിര്‍കക്ഷികള്‍ക്ക് കോടതി നോട്ടീസ് അയച്ചിട്ടുണ്ട്. ഇനി ഉത്തരവുണ്ടാകുന്നത് വരെ ഹൈക്കോടതി നിര്‍ദ്ദേശങ്ങള്‍ക്ക് സ്റ്റേ നിലനില്‍ക്കും.

1958-ലെ തമിഴ്നാട് മൃഗസംരക്ഷണ നിയമത്തിലെ സെക്ഷന്‍ 4 പ്രകാരം അനുവദനീയമായ കേസുകളിലൊഴികെ, സംസ്ഥാനത്ത് ഗോവധം പൂര്‍ണ്ണമായി നിരോധിച്ചുകൊണ്ടായിരുന്നു മദ്രാസ് ഹൈക്കോടതിയുടെ ഉത്തരവ്. എന്നാല്‍, ഇത് 1958-ലെ തമിഴ്നാട് മൃഗസംരക്ഷണ നിയമത്തിന് വിരുദ്ധമാണെന്ന് ചൂണ്ടിക്കാട്ടിയാണ് രണ്ടാഴ്ച മുന്‍പ് സംസ്ഥാന സര്‍ക്കാര്‍ സുപ്രീം കോടതിയെ സമീപിച്ചത്. ഹൈക്കോടതി ഉത്തരവ് അടിയന്തിരമായി 'തിരുത്തല്‍' അര്‍ഹിക്കുന്നതാണെന്ന് സുപ്രീം കോടതി നിരീക്ഷിച്ചു.

തമിഴ്നാട്ടിലെ നിലവിലെ നിയമപ്രകാരം മൃഗത്തിന് 10 വയസ്സില്‍ കൂടുതല്‍ പ്രായമുണ്ടെങ്കിലോ, അവ പ്രജനനത്തിനോ കാര്‍ഷിക ആവശ്യങ്ങള്‍ക്കോ അനുയോജ്യമല്ലെങ്കിലോ, ബന്ധപ്പെട്ട അധികാരികളുടെ സര്‍ട്ടിഫിക്കറ്റിന് വിധേയമായി കന്നുകാലികളെ അറുക്കാന്‍ അനുമതിയുണ്ട്. മെയ് 27-ന് ജസ്റ്റിസ് ജി.ആര്‍. സ്വാമിനാഥന്‍, ജസ്റ്റിസ് വി. ലക്ഷ്മീനാരായണന്‍ എന്നിവരടങ്ങിയ മദ്രാസ് ഹൈക്കോടതി ബെഞ്ചാണ് വിവാദ ഉത്തരവ് പുറപ്പെടുവിച്ചത്. അംഗീകൃത അറവുശാലകളില്‍ മാത്രമേ മൃഗങ്ങളെ അറുക്കാവൂ എന്ന് വ്യക്തമാക്കിയ കോടതി, അതോടൊപ്പം ബക്രീദ് ദിനത്തിലോ അതിനുശേഷമോ പശുക്കളെ അറുക്കുന്നില്ലെന്ന് ഉറപ്പാക്കാന്‍ ചീഫ് സെക്രട്ടറിക്കും മുതിര്‍ന്ന പോലീസ് ഉദ്യോഗസ്ഥര്‍ക്കും നിര്‍ദ്ദേശം നല്‍കുകയായിരുന്നു.

പൊതുസ്ഥലങ്ങളില്‍ നിയമവിരുദ്ധമായി പശുക്കളെ അറുക്കുന്നത് തടയണമെന്ന് ആവശ്യപ്പെട്ട് 'ഇന്ദു മക്കള്‍ കക്ഷി' സംസ്ഥാന ജനറല്‍ സെക്രട്ടറി സൂര്യ സമര്‍പ്പിച്ച ഹര്‍ജിയിലായിരുന്നു ഹൈക്കോടതിയുടെ ഈ ഇടപെടല്‍. ഭരണഘടനയുടെ 48-ാം അനുച്ഛേദം (നിര്‍ദ്ദേശക തത്വങ്ങള്‍) മുന്‍നിര്‍ത്തിയാണ് ഹൈക്കോടതി പശുഹത്യ കര്‍ശനമായി വിലക്കിയത്. എന്നാല്‍, പൂര്‍ണ്ണമായ നിരോധം ഏര്‍പ്പെടുത്തിയതിലൂടെ ഹൈക്കോടതി നിയമപരമായ പരിധികള്‍ ലംഘിച്ചുവെന്നും പരസ്പര വിരുദ്ധമായ വിധിന്യായമാണ് പുറപ്പെടുവിച്ചതെന്നും തമിഴ്നാട് സര്‍ക്കാര്‍ സുപ്രീം കോടതിയില്‍ വാദിച്ചു. കോടതികളില്‍ നടപ്പിലാക്കാന്‍ നിയമപരമായ ബാധ്യതയില്ലാത്ത നിര്‍ദ്ദേശക തത്വങ്ങളെ മുന്‍നിര്‍ത്തി നിലവിലുള്ള നിയമത്തിന് വിരുദ്ധമായി പ്രവര്‍ത്തിക്കാന്‍ കഴിയില്ലെന്ന വാദമാണ് ഇവിടെ ഉയര്‍ന്നുവരുന്നത്.