അസീര്‍: സൗദി അറേബ്യയിലെ അസീര്‍ മേഖലയിലുള്ള 'വാദി റിസോര്‍ട്ട്' മറ്റൊരു ചരിത്രനേട്ടത്തിന് സാക്ഷ്യം വഹിച്ചു. ലോകത്തിലെ ഏറ്റവും ഉയരം കൂടിയ മൂന്നാമത്തെയും, മിഡില്‍ ഈസ്റ്റിലെ രണ്ടാമത്തെയും, സൗദി അറേബ്യയിലെ ഏറ്റവും വലുതുമായ ജലധാര ഇവിടെ ഉദ്ഘാടനം ചെയ്തു.

മേഖലയിലെ ടൂറിസം രംഗത്ത് വലിയ കുതിച്ചുചാട്ടമുണ്ടാക്കാന്‍ പോകുന്നതാണ് ഈ പദ്ധതി.

120 മീറ്റര്‍ ഉയരമുള്ള ജലധാരയുടെ നിര്‍മാണത്തിന് 16 ദശലക്ഷത്തിലധികം സൗദി റിയാല്‍ ചെലവു വന്നു. ഏഴ് മില്യണിലധികം ലിറ്റര്‍ വെള്ളമാണ് ഇതിലൂടെ പമ്പ് ചെയ്യുന്നത്.
3 ലക്ഷത്തിലധികം ചതുരശ്ര മീറ്റര്‍ വിസ്തൃതിയില്‍ വ്യാപിച്ചുകിടക്കുന്ന ബൃഹത്തായ ടൂറിസം പദ്ധതിയുടെ ഭാഗമായാണ് ഈ ജലധാര നിര്‍മ്മിച്ചിരിക്കുന്നത്. വര്‍ഷം മുഴുവനും സന്ദര്‍ശകര്‍ക്കും കുടുംബങ്ങള്‍ക്കും ഒരേപോലെ ആസ്വദിക്കാന്‍ കഴിയുന്ന വിനോദ സൗകര്യങ്ങളാണ് ഇവിടെ ഒരുക്കിയിരിക്കുന്നത്.

അസീര്‍ മേഖലയുടെ തനതായ സംസ്‌കാരവും പൈതൃകവും വിളിച്ചോതുന്ന രീതിയില്‍ 60,000 ചതുരശ്ര മീറ്ററില്‍ ഒരു പൈതൃക ഗ്രാമം റിസോര്‍ട്ടില്‍ സജ്ജീകരിച്ചിട്ടുണ്ട്. പ്രാദേശിക സംസ്‌കാരം പ്രതിഫലിപ്പിക്കുന്ന ജനപ്രിയ വിപണികളും കടകളും ഇവിടെയുണ്ട്. കൂടാതെ, മേഖലയുടെ ചരിത്രം വ്യക്തമാക്കുന്ന സമഗ്രമായ ഒരു ഹെറിറ്റേജ് മ്യൂസിയം അടുത്ത മാസം ഇവിടെ പൊതുജനങ്ങള്‍ക്കായി തുറന്നുകൊടുക്കും.

വേനല്‍ക്കാല ടൂറിസം സജീവമാക്കുന്നതിന്റെ ഭാഗമായി ദിവസവും ഉച്ചയ്ക്ക് 1 മണി മുതല്‍ അര്‍ധരാത്രി 12 മണി വരെ വിപുലമായ വിനോദ പരിപാടികളാണ് ഇവിടെ ആസൂത്രണം ചെയ്തിരിക്കുന്നത്. സംഗീതത്തിനൊപ്പം ചുവടുവെക്കുന്ന ജലധാരാ പ്രദര്‍ശനങ്ങള്‍, നാടകങ്ങള്‍, മറ്റ് അനുബന്ധ പരിപാടികള്‍ എന്നിവ ഇതില്‍ ഉള്‍പ്പെടുന്നു.