ജിദ്ദ: കേരള നദ്വത്തുല്‍ മുജാഹിദീന്‍ (കെ എന്‍ എം) 2025-2026 വര്‍ഷം മെയ് മാസത്തില്‍ നടത്തിയ, കേരളത്തിന് പുറത്തുള്ള മദ്രസകളുടെ പൊതുപരീക്ഷാ ഫലം പ്രസിദ്ധീകരിച്ചു. ജിദ്ദ ഇന്ത്യന്‍ ഇസ്ലാഹി സെന്ററില്‍ പരീക്ഷ എഴുതിയ ശൈഖുല്‍ ഇസ്ലാം ഇബ്‌നു തൈമിയ്യ മദ്രസയിലെ മുഴുവന്‍ വിദ്യാര്‍ത്ഥികളും ഉന്നത വിജയം കരസ്ഥമാക്കി. റുവാ ഹനീന്‍, അമാന്‍ ആഷിഖ്, ഹാതിം ഖൂനി, സെബാ വസീം, സാറ ഫാത്തിമ സമീര്‍, അംന കെ.ടി, യസാന്‍ സാബിര്‍ എന്നിവര്‍ മുഴുവന്‍ വിഷയങ്ങളിലും എ-പ്ലസ് നേടിയാണ് തിളക്കമാര്‍ന്ന വിജയം സ്വന്തമാക്കിയത്.

ശൈഖുല്‍ ഇസ്ലാം ഇബ്‌നു തൈമിയ്യ മദ്രസയില്‍ ദീനി വിഷയങ്ങള്‍ക്കും പരിശുദ്ധ ഖുര്‍ആന്റെ പാരായണത്തിനും പഠനത്തിനുമൊപ്പം മലയാളമടക്കമുള്ള ഭാഷാ പഠനത്തിനും പ്രത്യേക പരിഗണന നല്‍കുന്നുണ്ട്. പാഠ്യവിഷയങ്ങള്‍ക്ക് പുറമെ പാഠ്യേതര വിഷയങ്ങളിലുള്ള മോട്ടിവേഷന്‍ ക്ലാസുകള്‍, ആരോഗ്യം, ഫയര്‍ ആന്‍ഡ് സേഫ്റ്റി എന്നിവയിലുള്ള ബോധവല്‍ക്കരണ ക്ലാസുകള്‍ തുടങ്ങിയവ സംഘടിപ്പിച്ചു വരുന്നു.

കൂടാതെ, രക്ഷിതാക്കള്‍ക്കായി പാരന്റിംഗ് അടക്കമുള്ള വിഷയങ്ങളില്‍ പ്രത്യേക പരിശീലന ക്ലാസുകളും നടത്തുന്നുണ്ട്. കുട്ടികളുടെ കലാ-കായിക കഴിവുകള്‍ പരിപോഷിപ്പിക്കുന്നതിനായി മത്സരങ്ങളും സംഘടിപ്പിക്കാറുണ്ട്. സ്മാര്‍ട്ട് ക്ലാസ് റൂമും മള്‍ട്ടിമീഡിയയും ഉള്‍പ്പെടെയുള്ള ആധുനിക പഠന മാധ്യമങ്ങള്‍ ഉപയോഗപ്പെടുത്തിക്കൊണ്ടുള്ള പഠന രീതിയാണ് ഈ മദ്രസയില്‍ പിന്തുടരുന്നത്.

അവധിക്കാല ക്ലാസുകളും പ്രവേശനവും
മദ്രസയില്‍ പുതിയ അഡ്മിഷന്‍ തുടരുന്നതായും പൊതുപരീക്ഷയില്‍ വിജയിച്ച മുഴുവന്‍ വിദ്യാര്‍ത്ഥികളെയും പഠനത്തിന് നേതൃത്വം നല്‍കിയ അധ്യാപകരെയും ഭാരവാഹികള്‍ അഭിനന്ദിച്ചു. അവധിക്കാല ക്ലാസുകള്‍ ജൂലൈ 12-ന് ആരംഭിക്കുന്നതാണ്. പ്രവേശനത്തിനായി www.islahicenter.org എന്ന വെബ്‌സൈറ്റ് സന്ദര്‍ശിക്കുകയോ 012-6532022, 0556278966 എന്നീ നമ്പറുകളില്‍ ബന്ധപ്പെടുകയോ ചെയ്യാവുന്നതാണ്.