ഡമാസ്‌കസ്: സിറിയന്‍ സന്ദര്‍ശനത്തിനിടയില്‍ ഫ്രഞ്ച് പ്രസിഡന്റ് ഇമ്മാനുവല്‍ മാക്രോണ്‍ താമസിച്ചിരുന്ന ഹോട്ടലിന് സമീപം ബോംബ് സ്‌ഫോടനം. സംഭവത്തില്‍ നാല് പൊലീസുകാരുള്‍പ്പെടെ 18 പേര്‍ക്ക് പരുക്കേറ്റതായി സിറിയന്‍ ഔദ്യോഗിക വാര്‍ത്താ ഏജന്‍സി റിപ്പോര്‍ട്ട് ചെയ്തു. മാക്രോണ്‍ സുരക്ഷിതനാണെന്നും പരുക്കുകളൊന്നുമില്ലെന്നും എലിസി പാലസ് (ഫ്രഞ്ച് പ്രസിഡന്റിന്റെ കാര്യാലയം) വ്യക്തമാക്കി. സ്‌ഫോടനത്തിന് തൊട്ടുപിന്നാലെ അദ്ദേഹം സിറിയന്‍ പ്രസിഡന്റ് അഹമ്മദ് അല്‍-ഷറായുമായി കൂടിക്കാഴ്ച നടത്തി.
ഫ്രഞ്ച് പ്രസിഡന്റിന്റെ വാഹനവ്യൂഹം കടന്നുപോകുമ്പോഴോ ഹോട്ടലില്‍ ആയിരിക്കുമ്പോഴോ സ്‌ഫോടന ശബ്ദം കേട്ടിരുന്നില്ലെന്ന് എലിസി പാലസ് അറിയിച്ചു. മാക്രോണിനൊപ്പമുണ്ടായിരുന്ന റോയിട്ടേഴ്‌സ് മാധ്യമപ്രവര്‍ത്തകനും സ്‌ഫോടന ശബ്ദമോ മറ്റ് അസ്വസ്ഥതകളോ ശ്രദ്ധയില്‍പ്പെട്ടിരുന്നില്ല. തുടര്‍ന്ന് സിറിയന്‍ പ്രസിഡന്‍ഷ്യല്‍ പാലസില്‍ വെച്ചാണ് മാക്രോണും അല്‍-ഷറായുമായുള്ള കൂടിക്കാഴ്ച നടന്നത്.
സ്‌ഫോടനമുണ്ടായത് ബോംബ് നിര്‍വീര്യമാക്കുന്നതിനിടയില്‍
'ഫീല്‍ഡ് ഓപ്പറേഷനുകള്‍ക്കിടയില്‍ സുരക്ഷാ സേന രണ്ട് സ്‌ഫോടകവസ്തുക്കള്‍ കണ്ടെത്തിയിരുന്നു. തുടര്‍ന്ന് വിദഗ്ധ സംഘം ഇവ നിര്‍വീര്യമാക്കാനുള്ള നടപടികള്‍ സ്വീകരിക്കുന്നതിനിടയിലാണ് സ്‌ഫോടനം ഉണ്ടായത്.' - ഔദ്യോഗിക വൃത്തങ്ങള്‍ അറിയിച്ചു.
റോഡരികില്‍ നിര്‍ത്തിയിട്ടിരുന്ന ഒരു വാഹനത്തിനകത്തും മറ്റൊന്ന് ചവറ്റുകുട്ടയിലുമാണ് സ്‌ഫോടകവസ്തുക്കള്‍ സ്ഥാപിച്ചിരുന്നതെന്ന് പ്രാഥമിക പരിശോധനയില്‍ വ്യക്തമായി. സംഭവത്തില്‍ സമഗ്രമായ അന്വേഷണം പുരോഗമിക്കുകയാണ്. സ്‌ഫോടനത്തെ തുടര്‍ന്ന് പ്രദേശത്ത് റോഡുകള്‍ അടയ്ക്കുകയും കര്‍ശന സുരക്ഷാ ക്രമീകരണങ്ങള്‍ ഏര്‍പ്പെടുത്തുകയും ചെയ്തു.
ബഷാര്‍ അല്‍-അസാദിന്റെ ഭരണകൂടത്തെ വിമതര്‍ അട്ടിമറിച്ചതിന് ശേഷം സിറിയ സന്ദര്‍ശിക്കുന്ന ആദ്യ യൂറോപ്യന്‍ യൂണിയന്‍ രാഷ്ട്രത്തലവനാണ് ഇമ്മാനുവല്‍ മാക്രോണ്‍. അല്‍-ഷറായുടെ നേതൃത്വത്തിലുള്ള വിമതര്‍ അധികാരം പിടിച്ചെടുത്ത ശേഷമുള്ള രാജ്യത്തെ സുരക്ഷാ വെല്ലുവിളികളിലേക്കാണ് ഈ ആക്രമണം വിരല്‍ ചൂണ്ടുന്നത്.
അസാദിന്റെ അഞ്ച് പതിറ്റാണ്ടിലേറെ കാലത്തെ ഭരണത്തിന് അന്ത്യം കുറിച്ച അല്‍-ഷറായ്ക്ക് കീഴില്‍ വലിയ രാഷ്ട്രീയ മാറ്റങ്ങള്‍ക്കാണ് സിറിയ സാക്ഷ്യം വഹിക്കുന്നത്. അല്‍-ഖ്വയ്ദയുടെ മുന്‍ കമാന്‍ഡറായിരുന്ന അല്‍-ഷറായ്ക്ക് പടിഞ്ഞാറന്‍ ശക്തികളുമായും മിഡില്‍ ഈസ്റ്റ് രാജ്യങ്ങളുമായും അടുപ്പമുണ്ടാക്കാന്‍ സാധിച്ചിട്ടുണ്ട്. എന്നാല്‍ രാജ്യത്ത് സമാധാനം പുനഃസ്ഥാപിക്കാനും എല്ലാവരെയും ഉള്‍ക്കൊള്ളുന്ന ഒരു ഭരണക്രമം കൊണ്ടുവരാനുമുള്ള അദ്ദേഹത്തിന്റെ ശ്രമങ്ങള്‍ പലപ്പോഴും വംശീയ-മത വിഭാഗങ്ങള്‍ തമ്മിലുള്ള സംഘര്‍ഷങ്ങളാല്‍ വെല്ലുവിളി നേരിടുന്നുണ്ട്. കഴിഞ്ഞ വര്‍ഷം മാത്രം ഇത്തരം സംഘര്‍ഷങ്ങളില്‍ നൂറുകണക്കിന് ആളുകള്‍ കൊല്ലപ്പെട്ടിരുന്നു. ആക്രമണത്തെ അതിജീവിച്ച മാക്രോണ്‍ തന്റെ ഔദ്യോഗിക സന്ദര്‍ശനം തുടര്‍ന്നു കൊണ്ടിരിക്കുകയാണ്.
