ദമാസ്‌കസ്: സിറിയന്‍ തലസ്ഥാനമായ ദമാസ്‌കസിലെ മധ്യഭാഗത്തുള്ള ഒരു കഫേയില്‍ വ്യാഴാഴ്ചയുണ്ടായ ബോംബ് സ്‌ഫോടനത്തില്‍ ആറുപേര്‍ കൊല്ലപ്പെടുകയും 22 പേര്‍ക്ക് പരിക്കേല്‍ക്കുകയും ചെയ്തതായി സിറിയന്‍ അധികൃതര്‍ അറിയിച്ചു.
സര്‍ക്കാര്‍ ഓഫീസുകള്‍ സ്ഥിതി ചെയ്യുന്ന സുപ്രധാന മേഖലയായ 'പാലസ് ഓഫ് ജസ്റ്റിസി'ന് സമീപമാണ് സ്‌ഫോടനം നടന്നത്. തിരക്കേറിയ പ്രദേശത്ത് സ്‌ഫോടനം നടന്നതോടെ ജനങ്ങള്‍ പരിഭ്രാന്തരായി ചിതറിയോടി. വിവരമറിഞ്ഞയുടന്‍ ആംബുലന്‍സുകള്‍ സൈറണ്‍ മുഴക്കി സംഭവസ്ഥലത്തേക്ക് പാഞ്ഞു. സുരക്ഷാസേന പ്രദേശം പൂര്‍ണ്ണമായും വളഞ്ഞ് പരിശോധന നടത്തിവരികയാണ്.
കഫേയില്‍ ഒളിപ്പിച്ചുവെച്ച സ്‌ഫോടകവസ്തുവാണ് സ്‌ഫോടനത്തിന് കാരണമെന്ന് ഔദ്യോഗിക ടെലിവിഷന്‍ ചാനല്‍ റിപ്പോര്‍ട്ട് ചെയ്തു. സ്‌ഫോടനത്തിന്റെ ഉറവിടം കണ്ടെത്താന്‍ അധികൃതര്‍ അന്വേഷണം ആരംഭിച്ചിട്ടുണ്ട്.
ഉച്ചയ്ക്ക് 3 മണിയോടെയാണ് വലിയ ശബ്ദത്തോടെ സ്‌ഫോടനമുണ്ടായതെന്ന് സംഭവസ്ഥലത്തിന് സമീപം കട നടത്തുന്ന നൂര്‍ ഖയാത്ത് പറഞ്ഞു. സ്‌ഫോടനത്തിന്റെ ആഘാതത്തില്‍ കടയുടെ മുന്‍വശം കുലുങ്ങിയതായും അദ്ദേഹം കൂട്ടിച്ചേര്‍ത്തു. തുടര്‍ന്ന് ആളുകള്‍ ഓടിക്കൂടുകയും ഉടന്‍ തന്നെ ആംബുലന്‍സിനെ വിവരമറിയിക്കുകയുമായിരുന്നു. സ്‌ഫോടനസ്ഥലത്ത് രക്തം തളംകെട്ടിക്കിടക്കുന്ന ഭയാനകമായ കാഴ്ചയാണ് കണ്ടതെന്ന് സമീപത്തെ കടയുടമയായ മുഹമ്മദ് അല്‍-സാഹബി പറഞ്ഞു.
2024 ഡിസംബറില്‍ ബഷര്‍ അല്‍ അസാദിന്റെ ഭരണകൂടം വീണതിന് ശേഷം അധികാരത്തില്‍ വന്ന പുതിയ ഭരണകൂടത്തിന് കീഴിലും ദമാസ്‌കസില്‍ പലതവണ ആക്രമണങ്ങള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്. 2025 ജൂണില്‍ ഒരു പള്ളിക്ക് നേരെയുണ്ടായ ചാവേര്‍ ആക്രമണത്തില്‍ 25 പേര്‍ കൊല്ലപ്പെട്ടതായിരുന്നു ഇതിനുമുന്‍പ് നടന്ന ഏറ്റവും വലിയ ആക്രമണമാണിത്. ഈ സംഭവത്തിന്റെ ഉത്തരവാദിത്തം ഒരു സുന്നി തീവ്രവാദ ഗ്രൂപ്പ് ഏറ്റെടുത്തിരുന്നുവെങ്കിലും, ഐസിസ് (Daesh) ഗ്രൂപ്പിനാണ് ഇതില്‍ പങ്കെന്ന് അധികൃതര്‍ ആരോപിച്ചിരുന്നു.
Related News
