ജിദ്ദ: ഇന്ത്യന്‍ സ്‌കൂള്‍ പാരന്റ്സ് ഫോറം 'ഇസ്പാഫ് പാരന്റ്സ് എക്സലന്സ് അവാര്‍ഡ്‌സ് 2026' പുരസ്‌കാര വിതരണത്തില്‍ രക്ഷിതാക്കളെയും കുട്ടികളെയും ആദരിച്ചു. ജിദ്ദ അല്‍ റൗദയിലെ സിദാന ഹാളില്‍ നടന്ന ചടങ്ങില്‍ ഇന്റര്‍നാഷണല്‍ ഇന്ത്യന്‍ സ്‌കൂള്‍ ജിദ്ദയിലെ പത്താം ക്ലാസ്, പന്ത്രണ്ടാം ക്ലാസ് പരീക്ഷകളില്‍ ഉന്നത വിജയം നേടിയ വിദ്യാര്‍ത്ഥികളുടെ രക്ഷിതാക്കളെയും വിവിധ മേഖലകളില്‍ മികവ് തെളിയിച്ച വിദ്യാര്‍ത്ഥികളെയുമാണ് പുരസ്‌കാരങ്ങള്‍ നല്‍കി ആദരിച്ചത്. വിദ്യാര്‍ത്ഥികളുടെ അക്കാദമിക നേട്ടങ്ങളെ അംഗീകരിക്കുകയും അവര്‍ക്ക് കൂടുതല്‍ പ്രചോദനം നല്‍കുകയുമാണ് ഈ സംരംഭത്തിലൂടെ ഇസ്പാഫ് ലക്ഷ്യമിട്ടത്.
നസ്റിന്‍ സിറാജും ജൊഹറ നവ്‌റീനും അവതാരകരായിരുന്നു. മുഹമ്മദ് ഹിഫ്‌സു ഖുര്‍ആന്‍ പാരായണം നടത്തി. അന്‍വര്‍ലാലും അഹ്ലം അന്‍വര്‍ലാലും ചേര്‍ന്ന് ഇസ്പാഫിന്റെ പ്രവര്‍ത്തനങ്ങളെക്കുറിച്ചുള്ള അവതരണം നടത്തി. പ്രസിഡന്റ് എഞ്ചിനീയര്‍ മുഹമ്മദ് ബൈജു അധ്യക്ഷത വഹിച്ചു. മുഖ്യാതിഥി ഇന്റര്‍നാഷണല്‍ ഇന്ത്യന്‍ സ്‌കൂള്‍ ജിദ്ദ മാനേജ്മെന്റ് കമ്മിറ്റി ചെയര്‍മാന്‍ ഡോ. മുഹമ്മദ് അസ്ലം മുഖ്യപ്രഭാഷണം നടത്തി. വിദ്യാര്‍ത്ഥികളുടെ നേട്ടങ്ങള്‍ക്ക് പിന്നില്‍ മാതാപിതാക്കളുടെ സമര്‍പ്പണവും അധ്യാപകരുടെ പിന്തുണയും നിര്‍ണായകമാണെന്ന് അദ്ദേഹം ഓര്‍മ്മിപ്പിച്ചു.
പന്ത്രണ്ടാം ക്ലാസ് സയന്‍സ്, ഹ്യൂമാനിറ്റീസ്, കൊമേഴ്‌സ് വിഭാഗങ്ങളില്‍ മികച്ച വിജയം കൈവരിച്ച വിദ്യാര്‍ത്ഥികളുടെ രക്ഷിതാക്കള്‍ക്ക് ചടങ്ങില്‍ പുരസ്‌കാരങ്ങള്‍ സമ്മാനിച്ചു. വിജയികളായ വിദ്യാര്‍ത്ഥികള്‍ തങ്ങളുടെ അനുഭവങ്ങള്‍ സദസ്സുമായി പങ്കുവെച്ചു. ഇസ്പാഫ് കുടുംബാംഗങ്ങളുടെ മക്കളില്‍ പത്താം ക്ലാസിലും പന്ത്രണ്ടാം ക്ലാസിലും മികച്ച പ്രകടനം കാഴ്ചവെച്ചവര്‍ക്ക് പ്രത്യേക അവാര്‍ഡുകള്‍ നല്‍കി. സ്‌കൂളിലെ വിവിധ വകുപ്പ് മേധാവികളും വിദ്യാഭ്യാസ പ്രവര്‍ത്തകരുമാണ് പുരസ്‌കാരങ്ങള്‍ വിതരണം ചെയ്തത്. പത്താം ക്ലാസില്‍ ഉന്നത വിജയം നേടിയ വിദ്യാര്‍ത്ഥികളുടെ രക്ഷിതാക്കള്‍ക്കുള്ള അവാര്‍ഡുകള്‍ ജിദ്ദയിലെ സാമൂഹിക, വിദ്യാഭ്യാസ, ബിസിനസ് മേഖലകളിലെ പ്രമുഖര്‍ വിതരണം ചെയ്തു. ചടങ്ങിന് പിന്തുണ നല്‍കിയ വിവിധ സ്ഥാപനങ്ങളുടെ പ്രതിനിധികളെയും ഇസ്പാഫ് ആദരിച്ചു. അക്കാദമിക മികവിനൊപ്പം നേതൃഗുണം, സഹപാഠ്യ പ്രവര്‍ത്തനങ്ങളിലെ പങ്കാളിത്തം, സാമൂഹിക ഉത്തരവാദിത്തബോധം എന്നിവ പരിഗണിച്ച് വിദ്യാര്‍ത്ഥികള്‍ക്ക് പ്രത്യേക അവാര്‍ഡുകളും നല്‍കി. പരിപാടിയുടെ വിജയകരമായ നടത്തിപ്പിന് നേതൃത്വം നല്‍കിയ അവതാരകരെയും ചടങ്ങില്‍ ആദരിച്ചു.
ഇസ്പാഫ് ജനറല്‍ സെക്രട്ടറി ഡോ. മുഹമ്മദ് ഫൈസല്‍ സ്വാഗതവും വൈസ് പ്രസിഡന്റും അവാര്‍ഡ്‌സ്-2026 കണ്‍വീനറുമായ എഞ്ചിനീയര്‍ റിയാസ് പി.കെ. നന്ദിയും പറഞ്ഞു. വിദ്യാഭ്യാസ രംഗത്ത് കുട്ടികളുടെ മികവിനെ പിന്തുണച്ച രക്ഷിതാക്കളെ ആദരിക്കുകയും വിദ്യാര്‍ത്ഥികള്‍ക്ക് പ്രചോദനം നല്‍കുകയും ചെയ്ത ഈ പുരസ്‌കാര വിതരണ ചടങ്ങ് ജിദ്ദയിലെ ഇന്ത്യന്‍ സമൂഹത്തിനിടയില്‍ ശ്രദ്ധേയമായി.
