മുംബൈ: മുംബൈയിലെ ബൈക്കുളയില്‍ മുഹറം ഘോഷയാത്രക്കിടെ വിഷഗുളികകള്‍ വിതരണം ചെയ്ത യുവാവ് അറസ്റ്റില്‍. 15,000 പേരെ കൊല്ലുകയായിരുന്നു തന്റെ ലക്ഷ്യമെന്ന് പ്രതിയായ ഫയാസ് പ്രേംജി പോലീസ് മൊഴി നല്‍കി.

റീ റോഡിലെ റഹ്‌മതാബാദ് സെമിത്തേരിക്ക് സമീപം നടന്ന ഘോഷയാത്രക്കിടെയാണ് സംഭവമുണ്ടായത്. വേദനസംഹാരികളാണെന്ന് വിശ്വസിപ്പിച്ചാണ് ഇയാള്‍ ആളുകള്‍ക്ക് ഗുളികകള്‍ നല്‍കിയത്. ഘോഷയാത്രയില്‍ പങ്കെടുക്കാനെത്തിയ മൂന്ന് വനിതാ വോളന്റിയര്‍മാരുടെ സംശയമാണ് പ്രതിയെ കുടുക്കാന്‍ സഹായിച്ചത്. ഇയാളുടെ പെരുമാറ്റത്തില്‍ സംശയം തോന്നിയ ഇവര്‍ ഗുളികകള്‍ പരിശോധിക്കുകയും ഉള്ളില്‍ പൊടിരൂപത്തിലുള്ള പദാര്‍ഥം കണ്ടെത്തുകയും ചെയ്തു.

തുടര്‍ന്ന് പോലീസിനെ വിവരമറിയിക്കുകയും ഗുളികകള്‍ കഴിക്കരുതെന്ന് ഉച്ചഭാഷിണിയിലൂടെ മുന്നറിയിപ്പ് നല്‍കുകയും ചെയ്തു. ഗുളിക കഴിച്ച 11 പേര്‍ക്ക് ശാരീരിക അസ്വസ്ഥതകള്‍ അനുഭവപ്പെട്ടതിനെത്തുടര്‍ന്ന് ഇവരെ ആശുപത്രിയില്‍ പ്രവേശിപ്പിച്ചു. നിലവില്‍ ഇവര്‍ അപകടനില തരണം ചെയ്തിട്ടുണ്ട്.

പ്രതിയുടെ പക്കല്‍നിന്ന് 14,900 ഗുളികകളാണ് പോലീസ് പിടിച്ചെടുത്തത്. കൂടാതെ, 30,000 ഒഴിഞ്ഞ ക്യാപ്സ്യൂളുകള്‍ക്കും 50 കിലോ ഫോസ്ഫറസിനും ഇയാള്‍ ഓര്‍ഡര്‍ നല്‍കിയിരുന്നതായി ഡെപ്യൂട്ടി പോലീസ് കമ്മീഷണര്‍ ജയന്ത് മീന അറിയിച്ചു.

എലിവിഷത്തില്‍ അടങ്ങിയിരിക്കുന്ന അതീവ അപകടകാരിയായ സിങ്ക് ഫോസ്‌ഫൈഡ് എന്ന രാസവസ്തുവാണ് ഗുളികകളില്‍ അടങ്ങിയിരുന്നതെന്ന് പരിശോധനയില്‍ വ്യക്തമായി. ഇത് വയറ്റിലെ ആസിഡുമായി കലരുമ്പോള്‍ ഫോസ്ഫിന്‍ വാതകം ഉത്പാദിപ്പിക്കുകയും ഹൃദയം, ശ്വാസകോശം, വൃക്ക തുടങ്ങിയ അവയവങ്ങളുടെ പ്രവര്‍ത്തനത്തെ ബാധിക്കുകയും ചെയ്യും.

പ്രതിക്ക് ഭീകരവാദികളുമായി ബന്ധമുണ്ടോയെന്ന് പോലീസ് അന്വേഷിച്ചുവരികയാണ്. ഇയാള്‍ക്കെതിരെ ഭാരതീയ ന്യായ സംഹിതയിലെ സെക്ഷന്‍ 123 പ്രകാരം കേസെടുത്തു. കോടതി പ്രതിയെ രണ്ടു ദിവസത്തെ പോലീസ് കസ്റ്റഡിയില്‍ വിട്ടു.